Mutton: గొర్రె మాంసాన్ని మటన్ అని పిలిస్తే.. మరి మేక మాంసాన్ని ఏమంటారు?
Mutton: ఆదివారం వచ్చిందంటే నాన్ వెజ్ ప్రియులకు మొదట గుర్తొచ్చది మటన్, చికెన్ మాత్రమే. మటన్ కర్రీ అంటే ఎంతో మందికి ఇష్టం. అయితే గొర్రె మాంసాన్ని మటన్ అని ఎందుకు పిలుస్తారు? మేక మాంసాన్ని ఏమంటారు? ఇలా ఎప్పుడైనా ఆలోచించారా?
మటన్ అంటే
మటన్ చికెన్ లేకుండా చాలా ఇళ్లల్లో ఆదివారం గడవదు. పండుగలు, వేడుకలుఏవైనా సరే ఇంట్లో స్పెషల్ వంటకాలు మటన్, చికెన్ తోనే తయారవుతాయి. మాంసాహారం తినడం అనేది పూర్వకాలం నుంచి వస్తున్న పద్ధతే. ముఖ్యంగా ఆదివారం వచ్చిందంటే మరికొంచెం స్పెషల్ కూరలు ఉండాలి. అయితే ఎప్పుడైనా ఆలోచించారా? గొర్రె మాంసాన్ని మటన్ అని ఎందుకు పిలుస్తారు? అలా అయితే మేక మాంసాన్ని ఏమంటారు? ఈ ఆసక్తికరమైన సమాచారం తెలుసుకోండి.
మటన్ వెనుక కథ
గొర్రె మాంసాన్ని మటన్ అని పిలుస్తారు? మటన్ అనేది ఒక ఫ్రెంచ్ పదం. ఇప్పుడు ఫ్రాన్స్ లో కూడా ఈ పదాన్ని వాడడం లేదు. పాత ఫ్రెంచ్ పదం అయినా మౌటన్ అనే పదం నుండి మటన్ పుట్టుకొచ్చింది. మౌటన్ అంటే గొర్రె అని అర్థం. ఫ్రెంచ్ భాష నుంచి ఇంగ్లాండులోకి ఈ పదం ప్రవేశించింది. ఫ్రెంచ్ భాష కూడా ఆంగ్లంలో కలిసిపోయాక మటన్ అనే పదం ఇంగ్లాండులో బాగా ప్రాచుర్యం అయింది. ఇది ఇప్పటికీ గొర్రె మాంసం అనే అర్ధాన్ని ఇస్తుంది. ఇక బ్రిటీషర్లు మన ఇండియాకు వచ్చి మనల్ని ఆక్రమించుకున్నాక మనకు కూడా మటన్ పదం అలవాటైపోయింది.
మేక మాంసాన్ని ఏమంటారు?
గొర్రె మాంసాన్ని మటన్ అంటారు సరే.. కానీ మేక మాంసాన్ని ఏమని పిలుస్తారు? దానికంటూ ఒక పదం ఉందా? సాధారణంగా మేక మాంసాన్ని ఇతర దేశాల్లో గోట్ మీట్ అని పిలుస్తూ ఉంటారు. కానీ మేక వంశాన్ని చెవాన్ అని పిలవాలి. ఇది కూడా పాత ఫ్రెంచ్ పదమే. ఇక బ్రిటన్, ఆస్ట్రేలియా, న్యూజిలాండ్ వంటి దేశాల్లో మటన్ అనే పదాన్ని వేరువేరుగా వాడుతారు. బాగా ముదిరిన గొర్రె మాంసాన్ని మటన్ అని, అదే లేత గొర్రె పిల్ల మాంసం అయితే ల్యాంబ్ అని పిలుస్తారు. అదే మేక మాంసం అయితే గోట్ మీట్ అని పిలుచుకుంటారు. మన దేశంలో మాత్రం అన్నింటికీ కలిపి ఒకటే పేరు.. అదే మటన్.
మనదేశంలో గొర్రె మాంసం కావాలన్నా మేక మాంసం కావాలన్నా మటన్ అనే అడుగుతారు. అదే తెలుగులో స్పష్టంగా అడిగితే అప్పుడు మేక మాంసం, గొర్రె మాంసం విడివిడిగా దొరుకుతుంది. మన దేశంలో ఉన్నంతకాలం మటన్ పదాన్ని ఎలా అయినా వాడొచ్చు. విదేశాలకు వెళ్తే మాత్రం కచ్చితంగా సరైన పదజాలం తెలుసుకోవాల్సిన అవసరం ఉంది.
