Facts: సాలెపురుగులు గూడును ఎలా కట్టుకుంటాయి.. ఇంతకీ ఆ తాడ్లు ఎలా వస్తాయి.?

ప్రతీ ఒక్కరి ఇంట్లో సాలెపురుగులు ఉండడం సర్వసాధారణం. రెండు రోజులు ఇంట్లో మనుషులు లేకపోతే చాలు సాలెపురుగులు గూడులు కట్టి ఇంటిని అసహ్యంగా మార్చేస్తాయి. సాలెపురుగులు గూళ్లు ఎందుకు కడతాయి.? అసలు ఆ తాడు ఎలా వస్తుంది.? ఇలాంటి ఆసక్తికర విషయాలు ఇప్పుడు తెలుసుకుందాం..  

spiders

సాలెపురుగులను స్పైడర్లుగా కూడా పిలుస్తారు. స్పైడర్‌ వదిలే తాడును స్పైడర్‌ సిల్క్‌గా చెబుతుంటారు. వీటి సహాయంతోనే సాలెపురుగులు గూళ్లను నిర్మిస్తుంటాయి. సాలెపురుగులు నిర్మించే ఈ గూడ్లు ఎంతో ఆకర్షణీయంగా ఉంటాయి. ఇంతకీ ఈ స్పైడర్‌ సిల్క్‌ ఎలా తయారవుతుందో ఎప్పుడైనా ఆలోచించారా.? ఇది ముఖ్యంగా ప్రోటీన్లతో తయారవుతుంది.

సాలెపురుగుల పొట్టలో ప్రత్యేకమైన గ్రంథులు ఉంటాయి. ఇవి సిల్క్ ఉత్పత్తికి ఉపయోగపడతాయి. ప్రతి స్పైడర్‌కి పలు రకాల సిల్క్ గ్రంథులు ఉంటాయి, అవి వేర్వేరు ఉపయోగాల కోసం తాడులను ఉత్పత్తి చేస్తాయి. స్పైడర్ శరీరం "సిల్క్ ప్రోటీన్లు" అనే పదార్థాన్ని ఉత్పత్తి చేస్తుంది. ఈ ప్రోటీన్లు ద్రవ రూపంలో ఉంటాయి. స్పైడర్ వెనుక భాగంలో "Spinnerets" అనే చిన్న రంధ్రాల ద్వారా ఈ ప్రోటీన్ ద్రవం బయటకు వస్తుంది.

ఈ సిల్క్‌ బయటకు వచ్చిన వెంటనే గాలి తగలడంతో గట్టిపడి తాడులా మారుతుంది. అందుకే సాలెపురుగులు నిర్మించిన గూడులు బలంగా మారుతాయి. ఇంతకీ సాలెపురుగులు ఈ సిల్క్‌ను ఎందుకు విడుదల చేస్తాయంంటే. ఈ సిల్క్‌ సహాయంతో తమను తాము ఒక చోట నుంచి మరో చోటుకి వెళ్తాయి. ఆహారాన్ని పట్టుకోవడానికి గుడును నిర్మిస్తాయి. కొన్ని రకాల స్పైడర్లు విడుదల చేసే సిల్క్‌ స్టీల్‌ కంటే బలంగా ఉంటాయని చెబుతుంటారు. 

సాలెపురుగులు ఇతర స్పైడర్లను ఆకర్షించేందుకు కూడా భిన్న రకాల సిల్క్‌ తాడులను విడుదల చేస్తాయి. ఈ తాడును ప్రకృతిలో అత్యంత బలమైన నైలాన్ గా కొందరు శాస్త్రవేత్తలు చెబుతుంటారు. చిన్న చిన్న కీటకాలను వేటాడేందుకు కూడా వీటిని ఉపయోగిస్తాయి. ఇవి ఏర్పాటు చేసిన గూళ్లలో ఇరుక్కుపోయిన కీటకాలను తింటాయి.