కాళ్లు, చేతులు, కీళ్లలో నొప్పి ఉందా..? అయితే మీ శరీరంలో ఇది లోపించిందేమో చూసుకోండి..

శరీరంలో కాల్షియం లోపిస్తే.. కాళ్లు, చేతులు, కీళ్లలో నొప్పి పుట్టడం మొదలవుతుంది. అయితే కొన్ని చిట్కాలను ఫాలో అయితే ఈ సమస్య నుంచి గట్టెక్కొచ్చు.  

మానవ శరీర అభివృద్ధిలో కాల్షియం ముఖ్యమైన పాత్ర పోషిస్తుంది.  మీకు తెలుసా 70 శాతం ఎముకలు కాల్షియం, ఫాస్ఫేట్ తోనే తయారవుతాయి. కాబట్టి ఎముకలను బలంగా ఉంచుకోవడానికి కాల్షియాన్ని పుష్కలంగా తీసుకోవాలి. ఈ కాల్షియం జుట్టు, గోళ్ళ పోషణకు కూడా ప్రయోజనకరంగా ఉంటుంది. కానీ మారుతున్న ఆహారపు అలవాట్ల వల్ల చాలా మంది బలహీనమైన ఎముకలతో బాధపడుతున్నారు. ఎంతో మంది తీసుకునే ఆహారంలో కాల్షియం లేకపోవడం వల్ల శరీరంలో కాల్షియం లోపం ఏర్పడుతుంది. దీంతో శరీరంలో అక్కడక్కడ నొప్పి పెడుతుంది. ఈ సమస్యలన్నీ పోవాలంటే కాల్షియం ఎక్కువ మొత్తంలో ఉండే ఆహారాలను తప్పకుండా తినాలి. 

కాల్షియం లోపిస్తే వచ్చే సమస్యలు

కండరాల నొప్పి

మన శరీరంలో కాల్షియం లోపిస్తే ఎన్నో అనారోగ్య సమస్యలు పుట్టుకొస్తాయి. వీటిలో ముఖ్యమైనది కండరాల తిమ్మిరి. ఇది కాల్షియం లోపం ప్రారంభ లక్షణం. దీనివల్ల మన చేతుల్లో, కాళ్ళలో నొప్పి వస్తుంది. డ్యాన్స్ చేస్తున్నప్పుడు లేదా ఉదయం లేవగానే ఎముకల్లో తిమ్మిరిగా అనిపిస్తుంది. కాల్షియం లోపం వల్ల కొన్నికొన్ని సార్లు చేతులు, పాదం, కాలు, నోటి చుట్టూ కూడా తిమ్మిరి ఏర్పడుతుంది.

చర్మం, గోరు సమస్య, జుట్టు రాలడం

క్యాల్షియం చర్మం, గోళ్లను కూడా ప్రభావితం చేస్తుంది. కాల్షియం లోపిస్తే చర్మం పొడిబారుతుంది. అంతేకాదు చర్మంపై గీతలు కూడా ఏర్పడుతాయి. దీనికి తోడు చర్మం ఉబ్బడం ప్రారంభిస్తుంది. గోళ్ల ఎదుగుదల ఆగిపోతుంది. అలాగే తెల్లగా మారతాయి. ఇక దంతాలల్లో కూడా సమస్యలు ఏర్పడతాయి. కాల్షియం లోపం వల్ల చిగుళ్ళ నొప్పి, దంత క్షయం వంటి సమస్యలు వస్తాయి. వీటితో పాటుగా జుట్టు కూడా విపరీతంగా ఊడిపోవడం మొదలవుతుంది. 

calcium

కాల్షియం లోపానికి నివారణలు

కాల్షియం లోపం పోవాలంటే కాల్షియం ఎక్కువగా ఉండే ఆహారాలను ఎక్కువగా తినాలి. వీటిలో ముఖ్యమైనది సోయాబీన్. సోయా ఉత్పత్తుల్లో కాల్షియం ఎక్కువ మొత్తంలో ఉంటుంది. ఈ ఉత్పత్తుల్లో విటమిన్ డి కూడా పుష్కలంగా ఉంటుంది. ఇది ఎముకలను బలోపేతం చేయడానికి సహాయపడుతుంది. ఆకు కూరల్లో కూడా కాల్షియం పుష్కలంగా ఉంటుంది. ఇందుకోసం బచ్చలికూర, క్యాబేజీ, పాలకూర మొదలైన వాటిని మీ రోజు వారి ఆహారంలో చేర్చుకోండి. ఈ కూరగాయలు ఎముకలను బలంగా చేయడానికి సహాయపడతాయి. దంతాలను బలోపేతం కూడా చేస్తాయి. 

పాలు, పెరుగు వంటి పాల ఉత్పత్తుల్లో ప్రోటీన్ తో పాటుగా కాల్షియం కూడా ఎక్కువగానే ఉంటుంది. అలాగే గుడ్లను కూడా మీ డైట్ లో చేర్చుకోండి. ఈ ఆహారాలు ఇవి ఎముకలను గట్టిపరచడానికి ఉపయోగపడతాయి. గుడ్లలో ప్రోటీన్, కాల్షియం, విటమిన్ డి కూడా పుష్కలంగా ఉంటాయి. రోజూ ఒక ఉడకబెట్టిన గుడ్డును తింటే మీ ఎముకలు స్ట్రాంగ్ గా ఉంటాయి. 

కొన్ని రకాల పండ్లలో కూడా కాల్షియం కంటెంట్ ఎక్కువ మొత్తంలో ఉంటుంది. ఇందుకోసం నారింజ, పైనాపిల్, అరటి, అవకాడో, కివి, అత్తి పండ్లు, ఖర్జూరాలు, మల్బరీ వంటి పండ్లను రోజూ కొన్ని తినండి. 

శరీరంలో కాల్షియం లోపాన్ని పోగొట్టడానికి కృత్రిమ సప్లిమెంట్లను తీసుకునే బదులు.. అవసరమైనంత వరకు కాల్షియం అధికంగా ఉండే ఆహారాలనే తినడం మంచిది. ఇవి ఇతర ఎన్నో అనారోగ్య సమస్యలను తగ్గిస్తాయి. నొప్పి నుంచి కూడా ఉపశమనం కలిగిస్తాయి.