Jobs : AI జమానాలోనూ ఎంత సేఫ్ జాబ్స్..! ఏవో తెలుసా..?
Artificial Intelligence (AI) : టెక్నాలజీ పెరుగుతున్న కొద్దీ మనిషి ఉపాధి అవకాశాలు తగ్గుతున్నట్లే… ఏఐ విప్లవం కూడా ఇదే సూచిస్తోంది. అయితే ఏఐ ఎంత డెవలప్ అయినా ఏం చేయలేని ఉద్యోగాలు కూడా అనేకం ఉన్నాయి.
AI ఎఫెక్ట్ లేని జాబ్స్ ఇవే..
ఆర్టిఫిషియల్ ఇంటెలిజెన్స్ (AI) తో ఉద్యోగ భద్రత లేకుండా పోయింది. ఐటీ, టెక్నాలజీతో పాటు అనేక రంగాల్లో AI వినియోగం పెరిగింది... మనుషులు చేయాల్సిన పనిని ఇదే చేస్తోంది. అందుకే చిన్నచిన్న స్టార్టప్స్ నుండి గ్లోబల్ దిగ్గజ సంస్థల వరకు లేఆఫ్స్ కు సిద్దమయ్యాయి... భారీగా ఉద్యోగులను తొలగిస్తున్నాయి. అయితే ఏఐ ఎంత వేగంగా ఎదుగుతున్నా కొన్ని ఉద్యోగాలను మాత్రం అది టచ్ కూడా చేయలేదు. రాబోయే 100 ఏళ్లపాటు 100% భద్రత ఉండే ఆ ఉద్యోగాల గురించి ఇక్కడ తెలుసుకుందాం.
AI జమానాలో సేఫ్ జాబ్స్ ఇవే..
ఇప్పుడు ఎక్కడ చూసినా 'ఆర్టిఫిషియల్ ఇంటెలిజెన్స్' (AI) గురించే చర్చ. చాట్జీపీటీ, జెమిని లాంటి టూల్స్ వల్ల సాఫ్ట్వేర్ ఇంజనీర్ల నుంచి కంటెంట్ రైటర్ల వరకు 'ఉద్యోగం పోతుందేమో?' అని భయపడుతున్నారు. అయితే టెక్నాలజీ అవసరం లేకుండా పక్కా మనుషులు అవసరమయ్యే ఉద్యోగాలు అనేకం ఉన్నాయి. అలాంటివే ప్లంబింగ్, ఎలక్ట్రికల్, వడ్రంగి వంటి చేతిపనులు.. వీటిని ఏ టెక్నాలజీ, ఏ రోబోలు రీప్లేస్ చేయలేవు. అందుకే కోడింగ్ చేసేవారి కంటే వెల్డర్ లేదా ప్లంబర్ ఉద్యోగం సురక్షితం.
చేతి నైపుణ్యాలదే ఇక హవా
ప్లంబర్లు, ఎలక్ట్రీషియన్లు, కార్పెంటర్లు : ప్రతి ఇంటి నిర్మాణం వేరువేరుగా ఉంటుంది... ఒక్కో ఇంట్లో రిపేర్లు వేర్వేరుగా ఉంటాయి. దీనికి అవసరమైన శారీరక నైపుణ్యం, ఆయా ప్రదేశానికి తగినట్లు ఆలోచించే సామర్థ్యం రోబోలకు ఇంకా రాలేదు. అందుకే ప్లంబర్లు, ఎలక్ట్రీషియన్లకు ఏఐతో దోకా లేదు.
నిర్మాణ కార్మికులు & ఆర్కిటెక్ట్లు: సైట్ వాతావరణానికి అనుగుణంగా మారే పనులకు మనుషుల ప్రత్యక్ష ప్రమేయం అవసరం. ఇంటికి అవసరమైన నిర్మాణాలు, అందంగా తీర్చిదిద్దేలా చేయడం మనుషులతోనే సాధ్యం. అందుకే నిర్మాణరంగంపై ఏఐ ఎఫెక్ట్ పెద్దగా ఉండదు.
నాయకత్వ బాధ్యతలు (Leadership & Strategy)
సంస్థలను నడిపించే బాధ్యతల్లో AI కేవలం డేటాను మాత్రమే ఇవ్వగలదు.. నిర్ణయాలు తీసుకోలేదు.
సీఈఓలు & బిజినెస్ లీడర్లు : ఒక సంస్థ భవిష్యత్ ప్రణాళిక, సంస్కృతి, మానవ వనరులను (ఉద్యోగులను) నిర్వహించడం వంటి వాటికి నాయకత్వ లక్షణాలు (Leadership) తప్పనిసరి. ఏఐ ఈ పనులు చేయలేదు.
రాజకీయ నాయకులు & పాలసీ మేకర్స్ : చట్టాలు చేయడం, ప్రజల మనోభావాలను అర్థం చేసుకుని పథకాలను అమలు చేయడం వంటి వాటికి సామాజిక అవగాహన అవసరం. అందుకే టెక్నాలజీ ఎంత అడ్వాన్స్ అయినా పాలకులుగా మాత్రం మనుషులే ఉంటారు. ప్రభుత్వాలను యంత్రాలు నడిపించలేవు.. పాలన సాంగించలేవు.
ఈ రంగాలపై ఏఐ ఎఫెక్ట్ ఉండదు..
ఉపాధ్యాయులు & ప్రొఫెసర్లు : AI ఒక పాఠాన్ని చెప్పగలదు, కానీ ఒక విద్యార్థి వ్యక్తిగత ప్రతిభను గుర్తించి, అతడిని ప్రోత్సహించి, మంచి క్రమశిక్షణ నేర్పించే 'గురువు'గా మారలేదు.
స్పోర్ట్స్ కోచ్లు : క్రీడాకారుల శారీరక, మానసిక స్థితిని తెలుసుకుని, వారిని ఉత్తేజపరిచి గెలిపించే కళ మనుషులకు మాత్రమే సొంతం. కాబట్టి క్రీడారంగంలో యువత అవసరం ఎప్పటికీ ఉంటుంది.
