Sleep: రాత్రిపూట నిద్రపట్టడం లేదా? కారణం ఇదే..!

మంచి నిద్ర ఆరోగ్యానికి చాలా అవసరం. సరైన నిద్రలేకపోతే మానసిక ఆరోగ్యంపై చెడు ప్రభావం చూపిస్తుంది. మరి, రాత్రిళ్లు నిద్ర పట్టకపోవడానికి కారణాలేంటో చూద్దాం... 

ఉదయం నుంచి సాయంత్రం వరకు రోజంతా కష్టపడిన తర్వాత.. రాత్రి పడుకోగానే నిద్రపోతే ఎంత హాయిగా ఉంటుందో కదా.  కానీ... ఈ రోజుల్లో నిద్ర పట్టడం కూడా చాలా కష్టంగా మారిపోతోంది. ఎంత నిద్రపోవాలని ప్రయత్నించినా కూడా నిద్ర రావడం లేదని చాలా మంది వాపోతూ ఉంటారు.  కానీ, మనం సరిగా నిద్రపోకపోతే చాలా ఆరోగ్య సమస్యలు వస్తాయి. ముఖ్యంగా ఉబకాయం, డయాబెటీస్, గుండెపోటు వంటి సమస్యలు వస్తాయి. మరి, నిద్ర పట్టకపోవడానికి కారణాలేంటో చూద్దాం...

పడుకునేటప్పుడు కాఫీ తాగడం..

చాలా మందికి కాఫీ తాగే అలవాటు ఉంటుంది. ఏ సమయంలో పడితే ఆ సమయంలో కాఫీ తాగుతూ ఉంటారు. కానీ.. రాత్రిపూట మాత్రం తాగకూడదు.  రాత్రి పడుకునే ముందు కాఫీ తాగే అలవాటు ఉంటే మానుకోండి. ఇది మీ నిద్రకు ఆటంకం కలిగిస్తుంది. దీనివల్ల నిద్రలేమి, ఆందోళన, పీడకలలు వచ్చే అవకాశం ఉంది. కాఫీ ఎక్కువగా తాగితే నిద్రపట్టదు.

ఎక్కువ వెలుతురులో ఉండటం..

వెలుతురు మీ నిద్రను నియంత్రిస్తుంది. మొబైల్ నుంచి వచ్చే నీలిరంగు వెలుతురు మెలటోనిన్‌ను తగ్గిస్తుంది. దీనివల్ల రాత్రిళ్లు నిద్రపోయే సామర్థ్యం తగ్గుతుంది. వీలైనంత వరకు వెలుతురు లేకుండా చూడాలి. అప్పుడు చక్కగా నిద్రపడుతుంది.

నిద్రకు సంబంధించిన సమస్య

నిద్రలేమి, రెస్ట్‌లెస్ లెగ్ సిండ్రోమ్ వంటి సమస్యల వల్ల సరిగ్గా నిద్రపట్టదు. ఆహారం సరిగ్గా తీసుకోవడం, ఒత్తిడిని తగ్గించుకోవడం లేదా డాక్టర్‌ను సంప్రదించడం మంచిది. ఆలస్యం చేస్తే...మరిన్ని సమస్యలు వచ్చే అవకాశం ఉంది.

మీరు చాలా ఒత్తిడిలో ఉన్నారు

ఒత్తిడి, ఆందోళనల వల్ల నిద్ర సరిగ్గా పట్టదు. చాలామంది రాత్రిళ్లు ఆందోళనగా ఫీలవుతారు. ఒత్తిడి కనిపించకుండా మనల్ని దెబ్బ తీస్తుంది. ప్రశాంతత లేకపోతే సరిగా నిద్రపట్టదు. అందుకే.. ముందు ఒత్తిడిని  తగ్గించుకోవాలి.  ఒత్తిడిని తగ్గించుకోవడానికి యోగా లేదా ధ్యానం చేయండి.

గది ఉష్ణోగ్రతను గమనించండి

పడుకునే గది చల్లగా ఉండాలి. వేడిగా ఉంటే నిద్రకు ఆటంకం కలుగుతుంది. అలాగే, చల్లగా ఉన్నా కూడా నిద్రకు ఇబ్బందిగా ఉంటుంది.