బ్రౌన్ రైస్ ఎక్కువగా తింటున్నారా? అయితే మీకు ఈ సమస్యలు తప్పవు!

ప్రస్తుతం బ్రౌన్ రైస్ ట్రెండ్ నడుస్తోంది. ఆరోగ్యానికి మేలు చేస్తుందనే ఉద్దేశంతో చాలా మంది వైట్ రైస్ కి బదులు బ్రౌన్ రైస్ తింటున్నారు. కానీ ఏదైనా మితంగా తింటేనే మేలు అంటున్నారు నిపుణులు. బ్రౌన్ రైస్ ఎక్కువ తింటే కూడా ఆరోగ్య సమస్యలు తప్పవంటున్నారు.

మన ప్రధాన ఆహారం అన్నం. అన్నం లేకుండా మనకు భోజనమే లేదు. కానీ చాలా మంది ఆరోగ్యానికి మంచిదని వైట్ రైస్ బదులు బ్రౌన్ రైస్ తింటుంటారు. వైట్ రైస్ తో పోలిస్తే, బ్రౌన్ రైస్ లో పోషకాలు ఎక్కువగా ఉంటాయి.

ఎక్కువ పోషకాలు

బ్రౌన్ రైస్‌లో గ్లైసెమిక్ ఇండెక్స్ తక్కువగా ఉంటుంది. ఇది రక్తంలో చక్కెర స్థాయిలను నియంత్రిస్తుంది. ఫైబర్, పొటాషియం ఉంటాయి, ఇవి గుండె సమస్యలు, పక్షవాతం ప్రమాదాన్ని తగ్గిస్తాయి. బ్రౌన్ రైస్‌లో ఇన్ని పోషకాలు ఉన్నప్పటికీ, కొన్ని దుష్ప్రభావాలు కూడా ఉన్నాయట.

ఎక్కువ ఫైబర్

బ్రౌన్ రైస్‌లో ఫైబర్ చాలా ఎక్కువ. ఎక్కువ ఫైబర్ తింటే ఉబ్బరం, మలబద్ధకం, గ్యాస్ సమస్యలు వస్తాయి. ఫైబర్ ఎక్కువైతే ప్రేగులలో అడ్డంకి ఏర్పడి కడుపు నొప్పి వస్తుంది.

ఆర్సెనిక్ ప్రమాదం
బ్రౌన్ రైస్‌లో తెల్ల బియ్యం కంటే 1.5 రెట్లు ఎక్కువ ఆర్సెనిక్ ఉంటుంది. ఆర్సెనిక్ ఒక భారీ లోహం. ఎక్కువగా తింటే శరీరానికి విషం. గర్భిణీ స్త్రీలకు గర్భస్రావం అయ్యే ప్రమాదం కూడా ఉంటుందట.

బరువు తగ్గడం

బ్రౌన్ రైస్ తింటే బరువు తగ్గుతారు. ఇది బాడీ మాస్ ఇండెక్స్‌ను తగ్గిస్తుంది, కానీ కొంతమందికి బరువు త్వరగా తగ్గితే వ్యాధులు వస్తాయి. నేషనల్ మెడికల్ లైబ్రరీ అధ్యయనం ప్రకారం, బ్రౌన్ రైస్ తిన్నవారు ఇతర ఆహారం తిన్నవారి కంటే త్వరగా బరువు తగ్గారు.

జీర్ణ సమస్య

బ్రౌన్ రైస్ తయారుచేసేటప్పుడు తవుడు, జెర్మ్, ఎండోస్పెర్మ్‌ను తీయరు. అందువల్ల, ఇందులో తెల్ల బియ్యం కంటే ఎక్కువ ఫైబర్, కొవ్వు ఆమ్లాలు, ప్రోటీన్లు, ఖనిజాలు, విటమిన్లు, పిండి పదార్థం ఉంటుంది. బ్రౌన్ రైస్ ఎక్కువగా తింటే, కొంతమందికి జీర్ణ సమస్యలు వస్తాయి. ఇందులో ఫైటిక్ యాసిడ్ ఉంటుంది, ఇది జీర్ణం కావడాన్ని కష్టతరం చేస్తుంది.

ఫైటిక్ యాసిడ్ కొన్ని ఆరోగ్య ప్రయోజనాలను అందిస్తుంది, కానీ ఆహారం నుంచి ఇనుము, జింక్‌ను గ్రహించే శరీర సామర్థ్యాన్ని తగ్గిస్తుంది. వండే ముందు బియ్యాన్ని నానబెడితే పోషకాలు నిలిచి ఉంటాయి.