Tablet coding: మీరు తీసుకునే ట్యాబెట్ల పైన ఇలాంటి సీక్రెట్ కోడ్ లు ఉన్నాయా? అయితే జాగ్రత్త!

ఏ జబ్బు చేసినా టాబ్లెట్లు తప్పనిసరి. ప్రస్తుతం టాబ్లెట్ల వాడకం విపరీతంగా పెరిగిపోయింది. అయితే మనం వాడే కొన్ని మాత్రల్లో కొన్ని సీక్రెట్ కోడ్‌లు ఉంటాయని మీకు తెలుసా? ఆ కోడ్‌లు, వాటి అర్థం గురించి ఇక్కడ తెలుసుకుందాం. 

ఈ మధ్య చాలామంది ప్రతి చిన్నదానికి టాబ్లెట్లు వేసుకుంటున్నారు. చిన్న తలనొప్పి వచ్చినా కూడా వెంటనే టాబ్లెట్ వేసుకునే అలవాటు పెరిగిపోయింది. కానీ డాక్టర్ సలహా లేకుండా ఏ మాత్రలు, మందులు వాడొద్దట. కొన్ని మందుల్ని తప్పుగా వాడకుండా, బాధ్యతగా వాడేలా ప్రోత్సహించేందుకు కొన్ని రకాల టాబ్లెట్ల వెనకాల కొన్నిసీక్రెట్ కోడ్‌లు ఉంటాయి. వాటి గురించి ఇప్పుడు తెలుసుకుందాం.

రెడ్ కలర్ లైన్స్ ఉంటే?

కొన్ని రకాల మాత్రలు కొనేటప్పుడు వాటి మీద నిలువుగా రెడ్ కలర్ గీత చూసే ఉంటారు. ఆ లైన్ ఎందుకు ఉంటుందో తెలుసా? దాని వెనుక కొన్ని కారణాలు ఉన్నాయి. కొన్ని రకాల మాత్రలు, మందుల సీసాల మీద ఈ రెడ్ కలర్ గీత కనిపిస్తుంది. డాక్టర్ సలహా లేకుండా ఈ మందుల్ని ఎప్పుడూ వాడకూడదు.

అయితే ఈ రెడ్ కలర్ గీత లేని అనాసిన్, పారాసిటమాల్ లాంటి మందుల్ని మీకు అమ్మవచ్చు. కానీ డాక్టర్ ప్రిస్క్రిప్షన్ లేకుండా రెడ్ కలర్ లైన్స్ ఉన్న మాత్రలు కొనడం, అమ్మడం చట్టరీత్యా నేరం.

RX కోడ్:

రెడ్ కలర్ లైన్స్ తో పాటు మాత్రల మీద కొన్ని కోడ్‌లు కూడా చూస్తుంటాం. RX అని ఉంటే, డాక్టర్ ఒక మందుకు ప్రిస్క్రిప్షన్ రాసిస్తే, కొన్ని రోజుల తర్వాత మళ్లీ కొనాల్సి వస్తే ప్రిస్క్రిప్షన్ అవసరం లేదు. మామూలుగానే వీటిని తీసుకోవచ్చు. 

NRX కోడ్:

ఈ రకం మందుల్లో కొద్దిగా మత్తు కలిగించే రసాయనాలు ఉంటాయి. అందుకే ఈ మందుల్ని డాక్టర్ ప్రిస్క్రిప్షన్ లేకుండా అమ్మకూడదు. డాక్టర్ రాసింది 6 నెలలు మాత్రమే చెల్లుతుంది. ఆ తర్వాత మళ్లీ డాక్టర్ రాస్తేనే ఈ మందులు ఇస్తారు. NRX కోడ్ ఉన్న మందులు ఎక్కువగా డిప్రెషన్, మానసిక రోగాలు, నిద్రలేమి సమస్యలు ఉన్నవాళ్లకు ఇస్తారు.

XRX కోడ్:

XRX కోడ్ ఉన్న మందుల్ని మత్తు పదార్థాలు, మానసిక సంబంధిత మందులు అంటారు. ఈ మందులన్నీ X అనే అక్షరంతో మొదలవుతాయి. ఇవి చాలా నొప్పిని తగ్గించేవిగా, మత్తు మందులుగా పనిచేస్తాయి. ఈ మందుల్ని క్యాన్సర్ పేషెంట్లు, మానసిక రోగులు, పెద్ద ఆపరేషన్లు చేయించుకున్న వాళ్లకు ఇస్తారు. 

అందరు డాక్టర్లు ఈ మందుల్ని రాయరు. ముఖ్యంగా మానసిక వైద్యులు, మత్తు మందు నిపుణులు, క్యాన్సర్ నిపుణులు ఎక్కువగా రాస్తారు. XRX రకం ప్రిస్క్రిప్షన్‌ను రాసిన రోజు ఒక్కసారి మాత్రమే వాడాలి. ఈ ప్రిస్క్రిప్షన్‌ను మందుల షాపు వాళ్లు పేషెంట్ వివరాలతో 2 ఏళ్ల వరకు దాచిపెట్టాలట. 

మత్తుకోసం

NRX, XRX మందులు ఇవ్వడంలో ఉన్న పెద్ద సమస్య ఏంటంటే, కొందరు ఈ మందుల్ని మత్తు కోసం తప్పుగా వాడుతున్నారు. డాక్టర్లు ఈ రకం మందుల్ని పేషెంట్లకు ఒకేసారి ఆపలేరు. నెమ్మదిగా తగ్గిస్తారు. ఒకేసారి ఆపేస్తే పేషెంట్లకు సైడ్ ఎఫెక్ట్స్ వచ్చే అవకాశం ఉంది.