ఆవు పాలు, గేదె పాలు.. రెండింటిలో ఏవి తాగితే మంచిదో తెలుసా?

పాలు మన ఆరోగ్యానికి చేసే మేలు అంతా ఇంతా కాదు. అందుకే పాలు మన రోజువారి ఆహారంలో ఒక భాగమైపోయాయి. ప్రతిరోజూ పిల్లల నుంచి పెద్దల వరకు ప్రతి ఒక్కరూ పాలను తాగుతుంటారు. పాలలో ఎన్నో రకాల పోషకాలు పుష్కలంగా ఉంటాయి. ఇవి మనల్ని ఎన్నో జబ్బులకు దూరంగా ఉంచుతాయి. 

పాలలో విటమిన్ డి, కాల్షియంలు మెండుగా ఉంటాయి. ఇవి మన ఎముకలను బలంగా ఉంచడానికి, ఎముకల సమస్యలను తగ్గించడానికి బాగా సహాయపడతాయి.

అయితే కొంతమంది ఆవు పాలను తాగితే, మరికొంతమంది గేదె పాలను తాగుతుంటారు. అయితే ఈ రెండు రకాల పాలలో ఏవి మంచివి అని జనాలకు డౌట్ వస్తుంటుంది. అసలు ఈ రెండు పాల మధ్య తేడా ఏంటి? మన ఆరోగ్యానికి ఏ పాలు ఎక్కువ మంచి చేస్తాయో ఇప్పుడు తెలుసుకుందాం పదండి. 
 

ఆవు, గేదె పాల మధ్య ఉన్న తేడా

గణాంకాల ప్రకారం.. చాలా మంది ఆవు పాలను తాగడానికే ఇష్టపడుతున్నారు. ఎందుకంటే ఆవు పాలలో కొవ్వు తక్కువగా ఉంటుంది. అలాగే తేలికగా ఉంటాయి. అంటే ఆవు పాలు చాలా సులువుగా జీర్ణం అవుతాయి. అదే గేదె పాలైతే చిక్కగా, మందంగా ఉంటాయి. అందుకే ఈ పాలను టీ, కాఫీల్లో ఎక్కువగా ఉపయోగిస్తారు. 

ఏ పాలలో ప్రోటీన్లు ఎక్కువగా ఉంటాయి? 

ఆవు పాలను, గేదె పాలను రెండింటిని తాగడానికే ఉపయోగిస్తారు. అయితే ఈ రెండు పాల మధ్య కొన్ని తేడాలు ఉంటాయి.  ఆవు, గేదె రెండు పాలలో ప్రోటీన్లు ఉంటాయి. అయితే ఈ ఆవు పాలు కంటే గేదె పాలలోనే ప్రోటీన్లు ఎక్కువగా ఉంటాయని నిపుణులు చెబుతున్నారు. ఇక ఆవు పాలలో అయితే వాటర్ కంటెంట్ ఎక్కువగా ఉంటుంది. కాబట్టి ఈ పాలు పల్చగా ఉంటాయి. 
 

అదే గేదె పాలు అయితే చిక్కగా, క్రీమీగా ఉంటాయి. ఆవు పాలకంటే గేదె పాలలోనే కొవ్వు శాతం ఎక్కువగా ఉంటుంది. అంతేకాకుండా.. గేదె పొటాషియం,  కాల్షియం, భాస్వరం, మెగ్నీషియం వంటి పోషకాలు కూడా పుష్కలంగా ఉంటాయి. ఇకపోతే ఆవు పాలలో విటమిన్లు మెండుగా ఉంటాయి. ఆవు పాలు కొద్దిగా పసుపు, తెలుపు రంగులో ఉంటే.. గేదె పాలు క్రీమీ తెలుపులో ఉంటాయి. 

ఆరోగ్యానికి ఏ పాలు మంచివి? 

ఆవు, గేదె ఈ రెండు పాలలో పోషకాలు మెండుగా ఉంటాయి. అయితే ఈ రెండు రకాల పాలలో కాల్షియం, కొవ్వు, ప్రోటీన్, కార్బోహైడ్రేట్లు వంటి ముఖ్యమైన పోషకాలు కూడా పుష్కలంగా ఉంటాయి. అయితే వీటి  పరిమాణంలో కొంత తేడా ఉంటుంది. అంటే 100 మి.లీ ఆవు పాలలో సుమారుగా 3.2 గ్రాముల ప్రోటీన్క కంటెంట్ ఉంటుంది. అదే గేదె పాలలో 3.6 గ్రాముల ప్రోటీన్ ఉంటుంది.
 

అలాగే ఆవు పాలలో కొవ్వు 4.4 గ్రాములు, కార్బోహైడ్రేట్లు 4.9 గ్రాములు, కాల్షియం 118 మి.గ్రాములు ఉంటాయి. ఇకపోతే గేదె పాలలో కొవ్వు 6.6 గ్రాములు, కార్భోహైడ్రేట్లు 8.3 గ్రాములు, కాల్షియం 121 మి.గ్రాములు ఉంటాయి. ఈ రెండు రకాల పాలలో లాక్టోస్ ఉంటుంది. ఇది ఆవు పాలలో 4.28 గ్రాములు ఉంటే, గేదె పాలలో 4.12 గ్రాములు ఉంటుంది. 

గేదె పాలలో పొటాషియం, బీటా-లాక్టోగ్లోబులిన్ ఎక్కువ మొత్తంలో ఉంటాయి. ఇవి అధిక రక్తపోటును నియంత్రించడానికి సహాయపడతాయి. అలాగే ఆవు పాల కంటే గేదె పాలలోనే తక్కువ కొలెస్ట్రాల్ ఉంటుంది.

ఈ పాలు హై బీపీ, ఊబకాయం, మూత్రపిండాల సమస్యలతో బాధపడుతున్న వారికి చాలా మంచివి. ఇకపోతే ఆవు పాలలో ప్రోటీన్లు, విటమిన్లు, పోషకాలు అధికంగా ఉంటాయి. ఇవి ఎముకలను బలంగా చేయడానికి, గుండెను  ఆరోగ్యంగా ఉంచడానికి సహాయపడతాయి.