వాకింగ్‌లో ఈ రూల్ గురించి తెలుసా.. దీన్ని పాటిస్తే.. చాలా ఆరోగ్య ప్రయోజనాలు

నడక మన ఆరోగ్యాన్ని ఎన్నో విధాలుగా మెరుగుపరుస్తుంది.  రోజూ నడిచేవారికి మానసిక ఒత్తిడి తగ్గుతుందని అధ్యయనాలు చెబుతున్నాయి. నడక శరీరానికి మాత్రమే కాదు, మనసుకు కూడా మేలు చేస్తుంది. బరువు తగ్గడం, గుండె ఆరోగ్యం, కొవ్వు కరగడం, కాళ్లకు వ్యాయామం లాంటి ఎన్నో ప్రయోజనాలు ఉన్నాయి.

ఒక వ్యక్తి రోజుకు సగటున 30 నిమిషాలైనా నడవాలి. కానీ కేవలం నడవడం కంటే కొన్ని మార్పులు చేస్తే పూర్తి ప్రయోజనాలు లభిస్తాయని చాలామందికి తెలియదు. దాని గురించి ఈ పోస్ట్‌లో చూద్దాం. దానికోసం మనం 6-6-6 నియమం గురించి తెలుసుకోవాలి. 

నియమం 1 - ఉదయం 6 గంటలకు నడక: 

రోజుకు కనీసం 30 నిమిషాలు నడిచేవారికి గుండె జబ్బులు వచ్చే అవకాశం 35 శాతం తగ్గుతుందని ది హార్ట్ ఫౌండేషన్ పరిశోధకులు చెబుతున్నారు. అంటే వారి గుండె ఆరోగ్యం మెరుగుపడుతుంది. ఉదయం 6 గంటలకు నడక వల్ల జీవక్రియలు చురుగ్గా సాగుతాయి. 

ఉదయాన్నే నడక వల్ల స్వచ్ఛమైన గాలి పీల్చుకోవచ్చు. మనసు ప్రశాంతంగా ఉంటుంది. ఉదయాన్నే చురుగ్గా ఉండటం వల్ల గుండె జబ్బులు,  పక్షవాతం వంటి వ్యాధులు వచ్చే అవకాశం తగ్గుతుందని పరిశోధకులు చెబుతున్నారు. 

నియమం 2- సాయంత్రం 6 గంటలకు నడక; 

సాయంత్రం 6 గంటలకు నడక మనసుకు ప్రశాంతతనిస్తుంది. రోజంతా ఎంత కష్టపడి పనిచేసినా, ఆ ఒత్తిడి నుంచి ఉపశమనం పొందడానికి సాయంత్రం నడక ఉపయోగపడుతుంది.

సాయంత్రం నడిస్తే రాత్రిపూట మంచి నిద్ర పడుతుంది.  అంతేకాకుండా ఆ రోజు గురించి ఆలోచించడానికి ఈ సమయాన్ని ఉపయోగించుకోవచ్చు. సాయంత్రం 6 గంటలకు వేరే పని ఉంటే   ఆఫీసులోనో లేదా ఇంట్లోనో 2 నిమిషాలు వేగంగా నడవడం మంచిది. 

నియమం 3 - 60 నిమిషాల నడక:  

ఉదయం, సాయంత్రం 30  నిమిషాలు నడవడం ఆరోగ్యానికి మంచిది. అదే సమయంలో ఒకరు 60 నిమిషాలు నిరంతరాయంగా నడిస్తే శరీరంలోని కొవ్వు కరుగుతుంది. దీనివల్ల చెడు కొవ్వు శరీరంలో పేరుకుపోదు.  గుండె ఆరోగ్యం మెరుగుపడుతుంది.  ఊపిరితిత్తులు బాగా పనిచేసి శ్వాస సామర్థ్యం పెరుగుతుంది  సహనశక్తి మెరుగుపడుతుంది.

రోజూ 60 నిమిషాలు నడిచేవారి ఆయుష్షు ఎక్కువగా ఉంటుందని అధ్యయనాలు చెబుతున్నాయి. క్యాన్సర్‌ను నివారించడానికి  కండరాలను బలోపేతం చేయడానికి 30 నుండి 60 నిమిషాలు నడవడం ఉపయోగపడుతుంది. బరువు తగ్గాలనుకుంటే వారానికి కనీసం 60 నిమిషాలు చొప్పున 5 రోజులు చురుగ్గా నడవాలి. దీనివల్ల బరువు గణనీయంగా తగ్గుతుంది. కానీ ఆహారపు అలవాట్లు ఆరోగ్యకరంగా ఉండాలి.  

నియమం 4- వార్మ్ అప్: 

నడకకు ముందు శరీరాన్ని వేడెక్కించడం అవసరం. దీనివల్ల గాయాలు తగ్గుతాయి. కనీసం 6 నిమిషాలు వార్మ్ అప్  వ్యాయామాలు చేస్తే  కీళ్ళు, చేతులు, కండరాలు వంటివి చురుగ్గా మారతాయి. తేలికపాటి వ్యాయామాల వల్ల శరీరం వేడెక్కిన తర్వాత నడక మొదలుపెడితే అనవసరమైన గాయాల నుంచి రక్షణ లభిస్తుంది. రోజూ కొద్దిసేపు వార్మ్-అప్ చేస్తే రక్త ప్రసరణ మెరుగుపడుతుంది. శరీర ఉష్ణోగ్రత పెరుగుతుంది. 

నియమం 5- కూల్ డౌన్: 

నడక అయిపోయాక 6 నిమిషాలు తేలికపాటి వ్యాయామాలు చేయాలి. చురుకైన  నడక తర్వాత ఒక నిమిషంలో గుండె సాధారణ స్థితికి వస్తుంది. ఆ తర్వాత  కండరాల నొప్పులు తగ్గించడానికి, శరీరాన్ని సాగదీయడానికి 6 నిమిషాల తేలికపాటి వ్యాయామాలు అవసరం. దీనివల్ల నొప్పులు తగ్గుతాయి. 

 నియమం 6 - నిలకడ: 
 
6-6-6 అనే నియమమే నిలకడ గురించి. రోజుకు 2 సార్లు ఒక గంట నడిస్తే మంచిది. వార్మ్అప్, కూల్ డౌన్ వ్యాయామాలు చేయడం అలవాటు చేసుకోవాలి. ఇంట్లోనే ఉండి ఆరోగ్యంగా ఉండాలనుకునేవారు నడకను ఎంచుకోవచ్చు.

వారానికి ఐదు రోజులు నడక ఆరోగ్యానికి మంచిది. ఉదయం, సాయంత్రం రెండు సార్లు నడవడం వల్ల శరీరానికి ఎన్నో ప్రయోజనాలు కలుగుతాయి. దీన్ని అప్పుడప్పుడూ కాకుండా నిరంతరం చేయాలని ఈ నియమం నొక్కి చెబుతుంది. ఉదయం 6 - సాయంత్రం 6 -  6 నిమి వార్మ్ అప్ & కూల్ డౌన్ అనేదే 6-6-6 నియమం. దీన్ని సరిగ్గా పాటిస్తే నడక వల్ల పూర్తి ప్రయోజనాలు లభిస్తాయి.