Home Garden: ఖరీదైన ఈ కూరగాయలను ఇంట్లోనే పెంచుకోవచ్చని మీకు తెలుసా?

Home Garden: ఈ రోజుల్లో కూరగాయల ధరలు ఎలా ఉన్నాయో చూస్తూనే ఉన్నాం కదా.. రోజురోజుకూ వాటి ధరలు పెరిగిపోతున్నాయి. అయితే మార్కెట్ లో ఖరీదైన కొన్ని కూరగాయలను ఇంట్లోనే సులభంగా పెంచుకోవడం ద్వారా మీరు చాలా డబ్బు ఆదా చేయొచ్చు. ఇంట్లోనే పెంచే కొన్ని కూరగాయల గురించి తెలుసుకుందాం రండి. 

ఇంతకు ముందు మార్కెట్ కి వెళ్లి 100 రూపాయలు ఖర్చు పెడితే సంచి నిండా కూరలు వచ్చేవి. కాని ఇప్పుడు సంచి నిండాలంటే 500 పెట్టాల్సి వస్తోంది. అయినా కూడా ఖరీదైన కూరగాయలు ఆ లిస్టులో రావు. అందుకే చాలామంది తక్కువ ధర ఉన్న కూరగాయలనే కొంటుంటారు. ఇంట్లోనే సులభంగా కొన్ని కూరగాయాలను పెంచుకొంటే చాలా డబ్బు ఆదా చేసుకోవచ్చు 

బెంగుళూరు మిరపకాయలు

క్యాప్సికమ్ ధరలు మార్కెట్ లో ఎప్పుడూ ఎక్కువగానే ఉంటాయి. అయితే వీటిని ఇంట్లో కుండీల్లో పెంచుకుంటే కూరకు సరిపడా కాస్తాయి. దీని కోసం మీరు క్యాప్సికమ్ కట్ చేసినప్పుడు గింజలను తీసి కాస్త ఆరబెట్టండి. ఆ తర్వాత కుండీలో వేయాలి. మొలకెత్తినప్పుడు తక్కువగా నీరు పోయాలి. లేదంటే చెడిపోతాయి. వాటిని జాగ్రత్తగా పెంచితే మీ ఇంటికి సరపడా కాయలు కాస్తాయి.

ముల్లంగి

ముల్లంగిని కుండీలో కూడా పెంచొచ్చు. ముల్లంగి పెంచడానికి 10 ఇంచుల లేదా 6 ఇంచుల కుండీ తీసుకోవాలి. సేంద్రియ మట్టి వేసి తక్కువ నీరు పోస్తూ వీటిని పెంచొచ్చు. దీనికి నాణ్యమైన ఎరువు వేస్తే ఎక్కువ దుంపలు వస్తాయి. 

బఠానీలు

బఠానీల ధర కూడా రోజురోజుకు పెరుగుతోంది. మార్కెట్లో వీటి ధరలు పెరుగుతున్న కొద్దీ నకిలీవి, నాణ్యత లేనివి తయారవుతున్నాయి. అందుకే బఠానీ మొక్కను మీ ఇంటి ఆవరణలో పెంచుకుంటే ఇంటి అవసరాలకు సరిపడా కాయలు కాస్తుంది. ఈ మొక్క పెంచడానికి కనీసం 10 ఇంచుల లోతున్న కుండీ అవసరం. బఠానీ మొక్కకు 4 నుండి 5 గంటలు ఎండ ఉంటే చాలు.

స్ప్రింగ్ ఆనియన్

వంట రుచిగా ఉండాలంటే స్ప్రింగ్ ఆనియన్ కాస్త పడాల్సిందే. దీంతో కూరకు మంచి రుచితో పాటు చూడటానికి కూడా కలర్ ఫుల్ గా ఉంటుంది. దీన్ని గింజల ద్వారా లేదా దుంపల ద్వారా ఇంట్లో కుండీల్లో  పెంచుకోవచ్చు. ఇంట్లో ఎండ తగిలే ప్రదేశంలో ఈ కుండీని పెడితే మొక్క బాగా పెరుగుతుంది.