Hair Business: చిక్కు వెంట్రుకలకు గిన్నెలు ఇచ్చే వ్యాపారం.. ఆ జుట్టుతో విదేశాల్లో వేల కోట్ల బిజినెస్

Hair Business: దువ్వినప్పుడు కొంత జుట్టు రాలిపోతుంది. ఆ జుట్టును దాచి వీధుల్లో వచ్చే చిక్కు వెంట్రుకల వ్యాపారానికి ఇస్తే కొన్ని గిన్నెలు ఇస్తారు. మరి వాళ్లు ఆ జుట్టును ఏం చేస్తారు? జుట్టుతో జరిగే వ్యాపారం ఏంటి? 

Image Credit : Gemini AI

ఏమిటీ చిక్కువెంట్రుకల వ్యాపారం?

వీధుల్లో కొంతమంది మహిళలు తిరుగుతూ చిక్కు వెంట్రుకలు కొంటామని అడుగుతూ ఉంటారు. వాళ్లు వెంట్రుకలకు గిన్నెలు కూడా బదులుగా ఇస్తూ ఉంటారు. మనం దువ్వినప్పుడు జుట్టు ఎంతోకొంత రాలుతుంది. దాన్ని అలా మూడు నాలుగు నెలల పాటూ దాచి ఇలా గిన్నెలు, డబ్బులకు అమ్ముతూ ఉంటారు ప్రజలు. కానీ ఎప్పుడైనా ఆలోచించారా? ఆ ఊడిపోయిన వెంట్రుకలతో వాళ్లు ఏం చేస్తారు? మన దేశంలో మహిళల జుట్టు సహజంగానే పొడవుగా, నల్లగా, ఒత్తుగా ఉంటుంది. దీనికి ఎలాంటి కెమికల్ రంగులు పెద్దగా వాడరు. దీని వల్లే విదేశాల్లో మనదేశానికి భారీ డిమాండ్ ఉంది. భారతదేశం నుండి ప్రతి ఏటా మిలియన్ల డాలర్ల విలువైన జుట్టును చైనా, అమెరికా, యూరప్ వంటి దేశాలకు ఎగుమతి చేస్తారు. తిరుమల (TTD) వంటి ప్రముఖ పుణ్యక్షేత్రాల ఈ-వేలంలో కేవలం తలనీలాల ద్వారానే వందల కోట్ల ఆదాయం లభిస్తోంది.

Image Credit : Getty

ఈ వ్యాపారం ఎలా చేస్తారు?

వీధుల్లో తిరుగుతూ మీ దగ్గర తీసుకున్న జుట్టును నేరుగా విదేశాలకు పంపరు. దీని వెనుక పెద్ద ప్రాసెసింగ్ ప్రక్రియ జరుగుతుంది. చిన్న వ్యాపారుల నుండి సేకరించిన జుట్టును చెన్నై, కోల్‌కతా వంటి ప్రధాన హబ్‌లలోని ఫ్యాక్టరీలకు పంపిస్తారు. అక్కడ ప్రత్యేక షాంపూలతో ఆ జుట్టును శుభ్రం చేస్తారు, రసాయన ద్రావణాలలో ఉంచి క్రిమిరహితంగా మారుస్తారు. తరువాత అత్యాధునిక యంత్రాల సాయంతో చిక్కులు తీసి, స్ట్రెయిట్ చేసి, పొడవును బట్టి గ్రేడింగ్ నిర్వహిస్తారు. విదేశాల్లో విగ్గుల తయారీకి, హెయిర్ ట్రాన్స్‌ప్లాంటేషన్ ప్రక్రియల కోసం ఈ జుట్టును వాడతారు. ఇందుకోసం ముఖ్యంగా 8 అంగుళాల పొడవున్న జుట్టును ఎక్కువగా కొనుగోలు చేస్తారు. దీనికి ఎక్కువ ధరను చెల్లిస్తారు.

Image Credit : Getty

ఎంత లాభం వస్తుంది?

చిక్కు వెంట్రుకల వ్యాపారంలో జుట్టు పొడవు, జుట్టు నాణ్యతపై ఆధారపడి ఉంటాయి. మంచి నాణ్యమైన జుట్టుకు ఎక్కువ డబ్బు దక్కుతుంది.

తక్కువ నాణ్యత గల జుట్టుకు కిలోకు రూ. 10,000 నుండి రూ. 12,000 వరకు డబ్బును చెల్లిస్తారు. మీడియం నాణ్యత కలిగిన జుట్టుకు కిలోకు రూ. 25,000 నుండి రూ. 30,000 వరకు ధర లభిస్తుంది. ఇక మంచి నాణ్యత కలిగిన పొడవాటి జుట్టుకు మార్కెట్లో కిలోకు ఏకంగా రూ. 50,000 పైనే పలుకుతుంది. అందుకే కొంతమంది మహిళలు వీధుల్లో తిరుగుతూ జుట్టును సేకరిస్తారు.