Gold Loan vs Selling Gold : ఆర్థిక అవసరాల కోసం బంగారం అమ్మాలా? తాకట్టు పెట్టాలా?
అత్యవసరంగా డబ్బు అవసరమైనప్పుడు చాలామందికి ఇంట్లో ఉన్న బంగారమే గుర్తొస్తుంది. కానీ ఆ నగలను తాకట్టు పెట్టాలా లేక అమ్మేయాలా అనే ఒక్క నిర్ణయం మీ భవిష్యత్తు ఆర్థిక పరిస్థితిని మార్చేస్తుంది. ఏది, ఎప్పుడు లాభదాయకమో ఇక్కడ తెలుసుకుందాం.
నగలను తాకట్టు పెట్టాలా, లేక అమ్మేయాలా?
హఠాత్తుగా వచ్చే వైద్య ఖర్చులు, వ్యాపారంలో నష్టం, పిల్లల చదువులు లేదా కుటుంబ అవసరాలు... ఇలాంటి అత్యవసర పరిస్థితుల్లో చాలామందికి ముందుగా గుర్తొచ్చేది ఇంట్లో ఉన్న బంగారమే. కానీ ఆ సమయంలో అందరిలో మెదిలే పెద్ద ప్రశ్న, 'నగలను తాకట్టు పెట్టాలా, లేక అమ్మేయాలా?' అనేది.
నగలు తాకట్టు పెట్టడం వల్ల లాభాలు
బంగారు నగలను తాకట్టు పెట్టి లోన్ తీసుకుంటే వాటిపై యాజమాన్య హక్కు మీ దగ్గరే ఉంటుంది. అవసరమైన డబ్బు వెంటనే చేతికి వస్తుంది. అప్పు తీర్చగానే నగలను తిరిగి తీసుకోవచ్చు. ముఖ్యంగా పెళ్లి నగలు లేదా కుటుంబ వారసత్వ సంపద లాంటి వాటిని శాశ్వతంగా కోల్పోవద్దనుకునే వారికి ఇది మంచి ఆప్షన్. కానీ ఇందులో ఉన్న చిక్కేంటంటే నిర్ణీత సమయంలోగా అప్పు తీర్చకపోతే, వడ్డీ పెరిగిపోతుంది. కొన్నిసార్లు నగలు వేలానికి వెళ్లే ప్రమాదం కూడా ఉంది. కాబట్టి ఆదాయం తిరిగి వస్తుందనే నమ్మకం ఉంటేనే తాకట్టు పెట్టడం మంచిది.
నగలు అమ్మడం వల్ల ప్రయోజనం ఏంటి?
మీరు అప్పు తిరిగి చెల్లించలేని పరిస్థితిలో ఉంటే కొన్నిసార్లు నగలను అమ్మేయడమే మంచి నిర్ణయం. అమ్మేస్తే ప్రతినెలా EMI లేదా వడ్డీ కట్టాల్సిన భారం ఉండదు. ముఖ్యంగా చాలా ఏళ్లుగా వాడకుండా ఉన్న నగలు లేదా పెట్టుబడి కోసం కొన్న బంగారాన్ని అమ్మడం వల్ల, అనవసరమైన అప్పుల భారాన్ని తప్పించుకోవచ్చు.
ఎప్పుడు తాకట్టు పెట్టడం మంచిది? ఎప్పుడు అమ్మడం మంచిది?
ఎప్పుడు తాకట్టు పెట్టాలి?
కొన్ని నెలల్లో డబ్బు సమస్య తీరిపోతుందనే నమ్మకం ఉంటే.
నగలు కుటుంబానికి గుర్తుగా ఉంటే.
స్వల్పకాలిక డబ్బు అవసరం అయితే.
వడ్డీ చెల్లించే స్థోమత ఉంటే.
ఎప్పుడు అమ్మడం మంచిది?
దీర్ఘకాలిక ఆర్థిక ఇబ్బందులు ఉంటే.
అప్పు తిరిగి చెల్లించే అవకాశం తక్కువగా ఉంటే.
పాతవి లేదా వాడని నగలు అయితే.
వడ్డీ భారాన్ని తప్పించుకోవాలనుకుంటే.
ఆర్థిక నిపుణులు ఏమంటున్నారు?
‘’భావోద్వేగ బంధం ఉన్న నగలను తాకట్టు పెట్టొచ్చు. కానీ వాటిని విడిపించుకునే ప్లాన్ లేకపోతే అమ్మేయడమే మంచిది'' అని చాలామంది ఫైనాన్షియల్ అడ్వైజర్లు చెబుతున్నారు. ఒక్క విషయం గుర్తుంచుకోండి… బంగారం కేవలం ఆభరణం మాత్రమే కాదు, అది ఒక అత్యవసర ఆర్థిక రక్షణ కవచం. కానీ ఆ రక్షణను ఎలా వాడుకుంటారనే దానిపైనే మీ భవిష్యత్తు ఆధారపడి ఉంటుంది.
