Psychology: సైకాలజీ ప్రకారం భర్త మొదటి ప్రాధాన్యం ఎవరికివ్వాలి? భార్యకా.. తల్లికా?
Psychology: పెళ్లి తర్వాత భర్త మొదటి ప్రాధాన్యం ఎవరివ్వాలి అనే ప్రశ్న ప్రతి కుటుంబంలో వినిపిస్తుంది. కొందరు తల్లే మొదటి ప్రాధాన్యం అంటే.. మరికొందరు భార్యకే మొదటి స్థానం ఇవ్వాలని వాదిస్తారు. అయితే సైకాలజీ నిపుణులు దీని గురించి ఏం చెబుతున్నారో చూద్దాం.
భర్త మొదటి ప్రాధాన్యం ఎవరికివ్వాలి?
పెళ్లి తర్వాత చాలా కుటుంబాల్లో ఎక్కువగా వినిపించే ప్రశ్నల్లో ఒకటి.. భర్త మొదటి ప్రాధాన్యం భార్యకా? లేక తల్లికా? అని. ఈ అంశంపై ఎన్నో అపోహలు, వాదనలు ఉన్నప్పటికీ.. సైకాలజీ ప్రకారం.. పెళ్లి తర్వాత భర్తకు భార్యతో ఏర్పడే బంధం కొత్త కుటుంబ వ్యవస్థకు కేంద్రంగా మారుతుంది. అంటే తల్లిని ప్రేమించడం లేదా గౌరవించడం తగ్గించాలనే అర్థం కాదు. కానీ జీవిత నిర్ణయాలు, భవిష్యత్ ప్రణాళికలు, ఆర్థిక వ్యవహారాలు, పిల్లల పెంపకం వంటి అంశాల్లో భార్యాభర్తలు కలిసి నిర్ణయాలు తీసుకోవడం ఆరోగ్యకరమైన దాంపత్య జీవితానికి పునాది.
భర్త ఎలా ఉండాలంటే?
సైకాలజీ నిపుణుల ప్రకారం, భర్త తన తల్లికి ఎప్పటిలాగే ప్రేమ, గౌరవం, ఆదరణ ఇవ్వాలి. అదే సమయంలో భార్యకు భావోద్వేగ భద్రత కల్పించడం కూడా అతని ముఖ్యమైన బాధ్యత. భార్యకు తన భర్త అండగా ఉన్నాడనే నమ్మకం ఉంటే దాంపత్య బంధం మరింత బలపడుతుంది. అలాంటి బంధం పిల్లల పెంపకంపైనా, కుటుంబ వాతావరణంపైనా సానుకూల ప్రభావం చూపుతుంది. ఒకవేళ భార్యకు తాను ఎప్పుడూ రెండో స్థానంలోనే ఉన్నాననే భావన కలిగితే, అది క్రమంగా దూరానికి, అపార్థాలకు, మనస్పర్థలకు దారి తీసే అవకాశం ఉంటుంది.
ఇద్దరి మాటలను ఓపికగా వినడం
కొందరు భర్తలు భార్యకు ప్రాధాన్యం ఇవ్వాలనే ఉద్దేశంతో తల్లిని పూర్తిగా నిర్లక్ష్యం చేస్తుంటారు. ఇది సరైన పద్ధతి కాదు. వృద్ధాప్యంలో తల్లిదండ్రులకు ప్రేమ, గౌరవం, భరోసా మరింత అవసరం. వారిని చిన్నచూపు చూడడం, వారి భావాలను పట్టించుకోకపోవడం మంచిది కాదు. తల్లిని గౌరవిస్తూ, భార్యను భాగస్వామిగా నిలబెట్టడం నిజమైన సమతుల్యత. కుటుంబ విభేదాలకు ప్రధాన కారణం తమను పట్టించుకోవడం లేదనే భావన కలగడమే. సైకాలజీ ప్రకారం భర్త ఎప్పుడూ తల్లి, భార్య.. ఇద్దరి మాటలను ఓపికగా వినాలి. సమస్య వచ్చినప్పుడు ఒకరి మాట మాత్రమే నమ్మి తీర్పు చెప్పకుండా, వాస్తవ పరిస్థితిని అర్థం చేసుకుని నిర్ణయం తీసుకోవాలి.
ఒకరిని మరొకరితో పోల్చడం వద్దు
భార్య, తల్లి మధ్య అభిప్రాయ భేదాలు వచ్చినప్పుడు చాలామంది భర్తలు మౌనంగా ఉండటం లేదా పూర్తిగా ఒకరి వైపు నిలబడటం చేస్తుంటారు. కానీ నిపుణుల ప్రకారం సరైన మార్గం మధ్యవర్తిగా వ్యవహరించడం. ఇద్దరి భావాలను అర్థం చేసుకుని ప్రశాంతంగా మాట్లాడించడం, అపార్థాలు తొలిగేలా చేయడం, ఎవరికీ అవమానం జరగకుండా పరిష్కారం చూపడం భర్త బాధ్యత. అలాగే భార్యను తల్లితో పోల్చడం, లేదా తల్లిని భార్యతో పోల్చడం ఎప్పుడూ చేయకూడదు. ఈ రెండు బంధాల స్వభావం పూర్తిగా వేరు. ఇద్దరి నుంచి ఒకే విధమైన ప్రవర్తనను ఆశించడం సంబంధాలను దెబ్బతీస్తుంది. ప్రతి వ్యక్తి ప్రత్యేకమనే విషయాన్ని గుర్తుంచుకోవాలి.
ఇలా చేస్తే మరింత గౌరవం
భర్త, భార్యకు గౌరవం ఇస్తే, భార్య కూడా అత్తగారిని మరింత గౌరవించే అవకాశం ఉంటుందని సైకాలజీ నిపుణులు చెబుతున్నారు. అదే విధంగా తల్లిని ప్రేమగా చూసుకునే కొడుకుని చూసి భార్యలో కూడా సానుభూతి పెరుగుతుందట. తల్లికి గౌరవం, ప్రేమ, ఆదరణ ఇవ్వడం కొడుకు ధర్మం. భార్యతో పరస్పర నమ్మకం, సహకారం, భావోద్వేగ భద్రతతో కొత్త కుటుంబాన్ని నిర్మించడం భర్త బాధ్యత. ఈ రెండింటి మధ్య సమతుల్యతను కాపాడగలిగిన వ్యక్తే మంచి కొడుకుగా, మంచి భర్తగా నిలుస్తాడని సైకాలజీ నిపుణులు చెబుతున్నారు.
