- Home
- Entertainment
- ఏ దావత్లో చూసినా, ఏ కార్లలో విన్నా ఇదే పాట.. మిలియన్ల వ్యూస్తో దుమ్మురేపుతోన్న బాసింగ బలాలు
ఏ దావత్లో చూసినా, ఏ కార్లలో విన్నా ఇదే పాట.. మిలియన్ల వ్యూస్తో దుమ్మురేపుతోన్న బాసింగ బలాలు
Basinga Balaalu: ఇటీవల తెలంగాణ జానపద సంగీతానికి బాగా ఆదరణ లభిస్తోంది. ఈ క్రమంలోనే తాజాగా విడుదలైన ‘బాసింగ బలాలు’ పాట విడుదలైన కేవలం రెండు వారాల్లోనే 15 మిలియన్లకు పైగా వ్యూస్ సాధించి సోషల్ మీడియాలో సంచలనం సృష్టించింది.
తెలంగాణ పెళ్లి సంప్రదాయాలను గుర్తు చేసే ‘బాసింగ బలాలు’
ఈ పాట పేరు వినగానే ముందుగా గుర్తొచ్చేది తెలంగాణ పెళ్లిళ్లలో వరుడు, వధువు ధరించే బాసింగం. పెళ్లి శుభానికి ప్రతీకగా భావించే ఈ సంప్రదాయాన్ని పాటలో ప్రధానంగా తీసుకున్నారు. "జీలకర్ర-బెల్లం", "శ్రావణ మాసం", "గాజులు", "తువ్వాల కొంగు" వంటి పదాలు తెలంగాణ గ్రామీణ వివాహాల అందాన్ని కళ్లకు కట్టినట్లు చూపిస్తాయి. పాటలో ప్రతి పదం ఒక ఆచారాన్ని, ప్రతి లైన్ ఒక కుటుంబ బంధాన్ని గుర్తు చేస్తుంది. అందుకే ఈ పాటను వింటే కేవలం సంగీతం మాత్రమే కాదు.. తెలంగాణ ఇంటి పెళ్లి వాతావరణమే గుర్తుకు వస్తుంది.
అందమైన సాహిత్యం
స్వామి నరేష్ దుబ్బా రాసిన ఈ పాటలో ప్రేమను చాలా సహజంగా, గ్రామీణ భాషలో వ్యక్తపరిచారు. ప్రేమికుడు తనకు నచ్చిన అమ్మాయిని జీవిత భాగస్వామిగా ఊహించుకుంటూ చెప్పే మాటలు ఇందులో కనిపిస్తాయి. "జీలకర్ర బెల్లాల్లే కలిసున్నాయే" అనే పంక్తి ఇద్దరి మనసులు ఎప్పటికీ విడిపోకుండా ఉండాలని సూచిస్తుంది. "ఒక్క గూటి పక్షులై ఉండాలే" అనే లైన్ దాంపత్య జీవితంలో ఇద్దరూ కలిసి సంతోషంగా జీవించాలనే ఆశను వ్యక్తపరుస్తుంది. ఇందులో ఎక్కడా అతిశయోక్తి కనిపించదు. పల్లె భాషలో చెప్పిన ప్రతి మాట సహజంగా ఉండటంతో ప్రేక్షకులకు వెంటనే కనెక్ట్ అవుతోంది.
బీట్, డాన్స్, విజువల్స్..
పాటకు కళ్యాణ్ కీస్ అందించిన సంగీతం యువతను వెంటనే ఆకట్టుకునేలా ఉంది. ఫోక్ బీట్కు ఆధునిక మ్యూజిక్ టచ్ ఇవ్వడంతో అన్ని వయసులవారు ఆస్వాదించేలా మారింది. శేఖర్ వైరస్ రూపొందించిన కొరియోగ్రఫీ కూడా పాట విజయానికి కీలకంగా నిలిచింది. స్టెప్పులు చాలా సులభంగా ఉండటంతో పెళ్లిళ్లలో చిన్నారుల నుంచి పెద్దల వరకు అందరూ డాన్స్ చేస్తున్నారు. సోషల్ మీడియాలో వేలాది మంది ఈ పాటకు రీల్స్ చేయడం కూడా వ్యూస్ పెరగడానికి ప్రధాన కారణమైంది.
ప్రస్తుతం ఎక్కడ చూసినా ‘బాసింగ బలాలు’ హవానే
ఈ పాట ఇప్పుడు ఒక సాధారణ ఫోక్ సాంగ్ స్థాయిని దాటి ట్రెండ్గా మారిపోయింది. తెలంగాణలోనే కాదు.. తెలుగు రాష్ట్రాల వ్యాప్తంగా పెళ్లిళ్లు, ఎంగేజ్మెంట్లు, హల్దీ వేడుకలు, సంగీత్ కార్యక్రమాల్లో ఈ పాట తప్పనిసరిగా వినిపిస్తోంది. కార్లలో ప్రయాణిస్తున్న యువత ప్లేలిస్ట్లో కూడా ఈ పాటకు ప్రత్యేక స్థానం దక్కింది. గ్రామాల్లో డీజే సౌండ్ల నుంచి పట్టణాల్లో ఫంక్షన్ హాళ్ల వరకు ఎక్కడ చూసినా ఇదే పాట మారుమోగుతోంది. ఇన్స్టాగ్రామ్, ఫేస్బుక్, యూట్యూబ్ షార్ట్స్లో కూడా లక్షలాది వీడియోలకు ఈ పాటనే బ్యాక్గ్రౌండ్ మ్యూజిక్గా ఉపయోగిస్తున్నారు.
రెండు వారాల్లో 15 మిలియన్ల వ్యూస్..
కేవలం రెండు వారాల్లోనే 15 మిలియన్ల వ్యూస్ దాటడం ఈ పాటకు లభించిన ఆదరణకు నిదర్శనం. నిర్మాత సతీష్ రెడ్డి బండి, దర్శకుడు-కొరియోగ్రాఫర్ శేఖర్ వైరస్, సంగీత దర్శకుడు కళ్యాణ్ కీస్, గాయకులు స్వామి నరేష్ దుబ్బా, శ్రీనిధి, నటీనటులు ఈశ్వర్ సాయి, వైష్ణవి సోనీ అందరూ కలిసి ఈ పాటను ప్రేక్షకులకు మరింత దగ్గర చేశారు. ఇటీవలి కాలంలో తెలంగాణ ఫోక్ పాటలకు దేశవ్యాప్తంగా మంచి గుర్తింపు లభిస్తోంది. అదే జాబితాలో ఇప్పుడు ‘బాసింగ బలాలు’ కూడా చేరింది. గ్రామీణ సంస్కృతి, పెళ్లి సంప్రదాయాలు, స్వచ్ఛమైన ప్రేమ, ఆకట్టుకునే సంగీతం.. ఈ నాలుగు అంశాలు కలవడంతో ఈ పాట ఒక సూపర్హిట్ ఫోక్ ఆంథమ్గా నిలిచింది.
