రోహిత్-కోహ్లీ టెస్ట్ రిటైర్మెంట్ వెనుక సెలక్టర్ల ఒత్తిడి? షాకింగ్ రిపోర్టు

Rohit Sharma Virat Kohli Test Retirement: భార‌త స్టార్ ప్లేయ‌ర్లు రోహిత్ శర్మ, విరాట్ కోహ్లీ టెస్ట్ రిటైర్మెంట్ వెనుక సెలక్టర్ల ఒత్తిడి ఉందా? తాజా నివేదికల ప్రకారం కీలక అంశాలు వెలుగులోకి వచ్చాయి.  

Rohit Sharma Virat Kohli: ఇంగ్లండ్‌తో ఐదు టెస్టుల సిరీస్‌కు ముందు భారత క్రికెట్‌కు భారీ ఎదురుదెబ్బ తగిలింది. జట్టులోని ప్రధాన ఆటగాళ్లైన రోహిత్ శర్మ, విరాట్ కోహ్లీలు టెస్ట్ క్రికెట్‌కు గుడ్‌బై చెప్పారు. మే 7న రోహిత్ శర్మ తన టెస్ట్ కెరీర్‌కు రిటైర్మెంట్ ప్ర‌క‌టించాడు. మే 12న విరాట్ కోహ్లీ కూడా టెస్టు క్రికెట్ కు రిటైర్మెంట్ ప్ర‌క‌టించాడు. 

రోహిత్ రిటైర్మెంట్ వెనుక ఒత్తిడా?

ఈ స్టార్ ఆటగాళ్ల రిటైర్మెంట్లపై తాజాగా ‘టైమ్స్ ఆఫ్ ఇండియా’లో వచ్చిన నివేదిక ప్రకారం, రోహిత్ శర్మ సెలెక్షన్ విషయంలో భారత సెలక్టర్లు స్పష్టత లేకుండా ప్రవర్తించారని సమాచారం. వారు రోహిత్‌కు ఇంగ్లండ్ సిరీస్‌లో పూర్తిగా ఆడే అవకాశం లేదనీ, కేవలం రెండు టెస్టులు మాత్రమే ఆడవచ్చని తెలిపారు. దీనివల్ల రోహిత్ నిరుత్సాహంతో రిటైర్మెంట్ ప్రకటించినట్లు తెలుస్తోంది.

ఒక బోర్డు సభ్యుడు వెల్లడించిన ప్రకారం.. "సెలక్టర్లు రోహిత్ స్థానంపై స్పష్టత చూపలేదు. దీంతో ఆయన ఒత్తిడిలో ఉన్నారు. ఆయన్ను రెండు టెస్టులకు మాత్రమే పరిగణనలోకి తీసుకుంటామని చెప్పినట్లు తెలుస్తోంది" అని చెప్పారు.

కోహ్లీ ఎందుకు రిటైర్మెంట్ ప్ర‌క‌టించాడు? 

విరాట్ కోహ్లీ విషయంలో మాత్రం ఆయన స్వయంగా నిర్ణయం తీసుకున్నారని సమాచారం. కొందరు మీడియా కథనాల్లో BCCI ఒక మాజీ క్రికెటర్‌ను పంపి కోహ్లీని తన నిర్ణయాన్ని మార్చమని చెప్పినట్లు ప్రచారం జరిగింది. కానీ వాస్తవానికి అలాంటిది జరగలేదనీ, కోహ్లీ తన నిర్ణయాన్ని స్వయంగా తీసుకున్నాడు. బోర్డు ఎవరినీ పంపలేదు అని సంబంధిత వర్గాలు పేర్కొన్నాయి. 

Virat and Rohith

గ్రేడ్ A+ కాంట్రాక్టులోనే విరాట్ కోహ్లీ, రోహిత్ శ‌ర్మ 

టెస్ట్, టీ20ల నుంచి రిటైర్మెంట్ ప్రకటించినా, విరాట్ కోహ్లీ, రోహిత్ శ‌ర్మ ఇద్దరూ ఇప్పటికీ బీసీసీఐ గ్రేడ్ A+ కాంట్రాక్టులో కొనసాగుతారని బీసీసీఐ కార్యదర్శి దేవజిత్ సైకియా స్పష్టం చేశారు. ఈ ఇద్ద‌రు స్టార్లు భారత క్రికెట్‌లో భాగంగా ఉంటారు. గ్రేడ్ A+ లభ్యమయ్యే అన్ని సౌకర్యాలు అందుకుంటార‌ని తెలిపారు. 

విరాట్ కోహ్లీ  క్రికెట్ కెరీర్ 

కోహ్లీ తన కెరీర్‌లో 123 టెస్ట్ మ్యాచ్‌లలో 9230 పరుగులు సాధించారు. అతని అత్యధిక వ్యక్తిగ‌త‌ స్కోర్ 254 ప‌రుగులు. త‌న‌ టెస్ట్ క్రికెట్ కెరీర్ లో 30 సెంచరీలు, 31 అర్థ సెంచరీలు ఉన్నాయి.

ఇక వ‌న్డేల విష‌యానికి వ‌స్తే 302 మ్యాచ్‌లు ఆడి 14181 పరుగులు చేశాడు. 57.88 సగటుతో 51 సెంచ‌రీలు బాదాడు. టీ20 క్రికెట్ లో కోహ్లీ 125 మ్యాచ్‌లు ఆడి 48.69 స‌గ‌టుతో 4188 పరుగులు సాధించాడు. ఐపీఎల్ లో రాయ‌ల్ ఛాలెంజ‌ర్స్ బెంగ‌ళూరు జ‌ట్టులో భాగంగా ఉన్నాడు. 

రోహిత్ శర్మ క్రికెట్ కెరీర్ 

హిట్ మ్యాన్ రోహిత్ శ‌ర్మ త‌న టెస్టు కెరీర్ లో 67 మ్యాచ్ లు ఆడి 40.57 స‌గ‌టుతో  4301 పరుగులు చేశాడు. ఇందులో 12 సెంచ‌రీలు కూడా ఉన్నాయి. ఇక వ‌న్డేల విష‌యానికి వ‌స్తే 273 మ్యాచ్‌లు ఆడి 48.76 స‌గ‌టుతో  11168 పరుగులు చేశాడు. రోహిత్ శ‌ర్మ 159 టీ20 మ్యాచ్‌లు ఆడి 4231 పరుగులు సాధించాడు. ఐపీఎల్ లో ముంబై ఇండియ‌న్స్ త‌ర‌ఫున ఆడుతున్నాడు.