EV Conversion: పాత డీజిల్, పెట్రోల్‌ కారును ఎలక్ట్రిక్ కారుగా మార్చుకోవ‌చ్చా.? ఎంత ఖ‌ర్చ‌వుతుందో తెలుసా.?

EV Conversion: కాలుష్యాన్ని తగ్గించేందుకు కేంద్ర, రాష్ట్ర ప్రభుత్వాలు ఎలక్ట్రిక్ వాహనాల వినియోగాన్ని ప్రోత్సహిస్తున్నాయి. దీంతో కొంత‌మంది పాత డీజిల్‌, పెట్రోల్ కార్ల‌ను ఎల‌క్ట్రిక్ కార్లుగా మారుస్తున్నారు. ఇలా చేయ‌డానికి ఎంత ఖ‌ర్చ‌వుతుందో తెలుసా.? 

Image Credit : Gemini AI

EV కన్వర్షన్ అంటే ఏంటి?

పాత పెట్రోల్ లేదా డీజిల్ కారును ఎలక్ట్రిక్ వాహనంగా మార్చే ప్రక్రియను రిట్రోఫిట్టింగ్ (Retrofitting) అంటారు. ఈ ప్రక్రియలో కారులో ఉన్న పెట్రోల్ లేదా డీజిల్ ఇంజిన్, ఫ్యూయల్ ట్యాంక్, గేర్‌బాక్స్ వంటి భాగాలను తొలగిస్తారు. వాటి స్థానంలో ఎలక్ట్రిక్ మోటార్, కంట్రోలర్, లిథియం-అయాన్ బ్యాటరీ ప్యాక్‌ను అమర్చుతారు. ఈ మార్పులు పూర్తయిన తర్వాత కారు పూర్తిగా ఎలక్ట్రిక్ వాహనంలా పనిచేస్తుంది. ఈ పనిని సాధారణ గ్యారేజీల్లో కాకుండా, సంబంధిత అధికారుల అనుమతి పొందిన సంస్థల ద్వారానే చేయించాలి.

Image Credit : stockPhoto

పాత కారును EVగా మార్చేందుకు ఎంత ఖర్చవుతుంది?

కన్వర్షన్ ఖర్చు కారు మోడల్, బ్యాటరీ సామర్థ్యం, మోటార్ రకం వంటి అంశాలపై ఆధారపడి ఉంటుంది. చిన్న హ్యాచ్‌బ్యాక్ కార్లను తక్కువ రేంజ్‌తో ఎలక్ట్రిక్ వాహనంగా మార్చాలంటే సాధారణంగా రూ.3 లక్షల నుంచి రూ.6 లక్షల వరకు ఖర్చయ్యే అవకాశం ఉంది. అయితే 200 నుంచి 300 కిలోమీటర్ల వరకు ప్రయాణించే సామర్థ్యం ఉన్న పెద్ద బ్యాటరీ ప్యాక్‌ను అమర్చాలంటే ఖర్చు రూ.10 లక్షల వరకు చేరే అవకాశం ఉంది. అందువల్ల ఎక్కువ ఖర్చు చేసే ముందు కొత్త ఎలక్ట్రిక్ కారు కొనడం లాభదాయకమా? లేక పాత కారును మార్చుకోవడం మంచిదా? అనే అంశాన్ని కూడా పరిశీలించడం అవసరం.

Image Credit : our own

RTO అనుమతి తప్పనిసరిగా తీసుకోవాలి

కారును ఎలక్ట్రిక్ వాహనంగా మార్చాలంటే కేవలం సాంకేతిక మార్పులు చేస్తే సరిపోదు. చట్టపరమైన నిబంధనలు కూడా పాటించాలి. ముందుగా ప్రాంతీయ రవాణా కార్యాలయం (RTO) నుంచి అనుమతి తీసుకోవాలి. అనంతరం గుర్తింపు పొందిన సంస్థ ద్వారా మాత్రమే EV కన్వర్షన్ కిట్‌ను అమర్చించాలి. పనులు పూర్తయిన తర్వాత RTO అధికారులు వాహనాన్ని తనిఖీ చేస్తారు. అన్ని నిబంధనలు పాటించినట్లు నిర్ధారించిన తర్వాత కొత్త రిజిస్ట్రేషన్ సర్టిఫికేట్ (RC) జారీ చేస్తారు. అలాగే ఎలక్ట్రిక్ వాహనాలకు కేటాయించే ఆకుపచ్చ రంగు నంబర్ ప్లేట్ కూడా అందిస్తారు.

Image Credit : our own

EV కన్వర్షన్ వల్ల కలిగే ప్రయోజనాలు ఏమిటి?

మీకు ఇష్టమైన పాత కారును స్క్రాప్‌కు ఇవ్వకుండా మళ్లీ ఉపయోగించే అవకాశం లభిస్తుంది. పెట్రోల్, డీజిల్ ఖర్చు తగ్గడంతో పాటు నిర్వహణ వ్యయం కూడా తక్కువగా ఉండే అవకాశం ఉంది. అలాగే కాలుష్యం తగ్గించడంలో కూడా ఇది ఉపయోగపడుతుంది. అయితే కన్వర్షన్ చేయించే ముందు ఖర్చు, వాహనం పరిస్థితి, బ్యాటరీ రేంజ్, చట్టపరమైన అనుమతులు వంటి అంశాలను పూర్తిగా తెలుసుకోవడం మంచిది. గుర్తింపు పొందిన సంస్థల ద్వారా మాత్రమే ఈ పని చేయించుకోవడం వల్ల భద్రతతో పాటు భవిష్యత్తులో ఎలాంటి చట్టపరమైన ఇబ్బందులు లేకుండా వాహనాన్ని వినియోగించుకోవచ్చు.