- Home
- Automobile
- Cars
- Crash Test: క్రాష్ టెస్ట్ తర్వాత ఆ కార్లను ఏం చేస్తారు.? లక్షలు విలువ చేసే కార్ల పరిస్థితి ఏంటి.?
Crash Test: క్రాష్ టెస్ట్ తర్వాత ఆ కార్లను ఏం చేస్తారు.? లక్షలు విలువ చేసే కార్ల పరిస్థితి ఏంటి.?
Crash Test: కొత్త కారు మార్కెట్లోకి వచ్చిన తర్వాత చాలామంది ముందుగా దాని సేఫ్టీ రేటింగ్ గురించి తెలుసుకోవాలనుకుంటారు. అందుకే కార్లను క్రాష్ టెస్ట్కు గురిచేసి వాటి భద్రతను పరీక్షిస్తారు. అయితే తర్వాత ఆ కార్లను ఏం చేస్తారో ఎప్పుడైనా ఆలోచించారా.?
క్రాష్ టెస్ట్ ఎందుకు నిర్వహిస్తారు?
కొత్త కార్ల భద్రతను అంచనా వేయడానికి భారత్లో భారత్ NCAP, అంతర్జాతీయంగా గ్లోబల్ NCAP వంటి సంస్థలు క్రాష్ టెస్టులు నిర్వహిస్తాయి. ఇందులో కొత్త కారును నిర్ణీత వేగంతో కాంక్రీట్ గోడలు లేదా ఇనుప అడ్డంకులకు ఢీకొట్టిస్తారు. ఈ పరీక్ష ద్వారా ప్రమాదం జరిగినప్పుడు కారులో ప్రయాణించే వారి భద్రత ఎంతవరకు ఉంటుందో పరిశీలిస్తారు.
టెస్ట్ సమయంలో కారుకు ఏమవుతుంది?
క్రాష్ టెస్ట్ సమయంలో కారు బలంగా ఢీకొనడంతో ఎయిర్బ్యాగ్లు తెరుచుకుంటాయి. బానెట్, డోర్లు, ముందు భాగం తీవ్రంగా దెబ్బతింటాయి. కొన్నిసార్లు కారు నిర్మాణం పూర్తిగా మారిపోయేంతగా నష్టం జరుగుతుంది. బయటకు చూస్తే ఆ కారు పూర్తిగా పనికిరాని స్థితిలో కనిపిస్తుంది.
క్రాష్ టెస్ట్ పూర్తయ్యాక కార్లను ఏమి చేస్తారు?
క్రాష్ టెస్ట్లో ఉపయోగించిన కార్లను ఎట్టి పరిస్థితుల్లోనూ మళ్లీ రోడ్డుపై నడపడానికి లేదా వినియోగదారులకు విక్రయించడానికి అనుమతి ఉండదు. చట్టపరమైన ప్రక్రియలు పూర్తయ్యాక వాటిని స్క్రాప్ యార్డ్కు తరలిస్తారు. అక్కడ భారీ హైడ్రాలిక్ క్రషర్ యంత్రాలతో కారును పూర్తిగా నలిపేస్తారు. అనంతరం లోహాన్ని రీసైక్లింగ్కు పంపిస్తారు. కొన్ని సందర్భాల్లో టైర్లు, ప్లాస్టిక్ భాగాలు లేదా ఉపయోగించగలిగే కొన్ని ఇంజిన్ విడిభాగాలను మాత్రమే తిరిగి రీసైకిల్ చేస్తారు. అయితే కారు ప్రధాన బాడీని పూర్తిగా ధ్వంసం చేస్తారు.
ఇంజినీర్లు ఏ అంశాలను పరిశీలిస్తారు?
క్రాష్ టెస్ట్ పూర్తైన వెంటనే నిపుణుల బృందం కారును పూర్తిగా పరిశీలిస్తుంది. ప్రమాదం సమయంలో ప్రయాణికులు కూర్చునే కేబిన్ ఎంతవరకు సురక్షితంగా నిలిచిందో విశ్లేషిస్తారు. అలాగే పరీక్ష కోసం ఉపయోగించిన డమ్మీలకు ఏ భాగాల్లో గాయాలు అయ్యే అవకాశం ఉందో కూడా అంచనా వేస్తారు. అదే సమయంలో సీట్బెల్ట్లు ఎలా పనిచేశాయి, ఎయిర్బ్యాగ్లు ఎంత వేగంగా తెరుచుకున్నాయి, కారు ఏ భాగాలు ఎలా దెబ్బతిన్నాయి వంటి వివరాలన్నింటినీ సేకరించి విశ్లేషిస్తారు.
ఈ సమాచారం వల్ల కంపెనీలకు కలిగే ప్రయోజనం ఏంటి?
క్రాష్ టెస్ట్లో లభించిన డేటా ఆధారంగా వాహన తయారీ సంస్థలు తమ కార్ల డిజైన్ను మరింత సురక్షితంగా మార్చేందుకు చర్యలు తీసుకుంటాయి. కొన్ని కంపెనీలు ప్రమాదానికి గురైన కార్లను నెలల తరబడి భద్రపెట్టి వాటిపై అధ్యయనం చేస్తాయి. ఈ విశ్లేషణ ద్వారా భవిష్యత్ మోడళ్లలో మెరుగైన సేఫ్టీ ఫీచర్లు అందించే అవకాశం ఉంటుంది. అందుకే క్రాష్ టెస్ట్లో ఉపయోగించిన కార్లు మార్కెట్లోకి తిరిగి రావు. అవి పూర్తిగా స్క్రాప్గా మారిపోతాయి.
