Microgreens: ఇంట్లో ఉండే మైక్రోగ్రీన్స్ పండించి నెలకు ఈజీగా రూ.50 వేలు సంపాదించొచ్చు
Microgreens: మీరు ఇంట్లో ఉండే బిజినెస్ చేయాలనుకుంటున్నారా? ఇప్పుడు అందరికీ ఆరోగ్యాన్ని అందిస్తున్న మైక్రోగ్రీన్స్ పండించడం ద్వారా నెలకు 50 వేల రూపాయల వరకు ఆదాయం పొందొచ్చు. ఈ బిజినెస్ గురించి పూర్తి వివరాలు ఇక్కడ ఉన్నాయి.
మైక్రోగ్రీన్స్ తో ఆరోగ్యం
మొలకెత్తిన ధాన్యాలు తింటే ఆరోగ్యానికి చాలా మంచిదని న్యూట్రీషియన్స్ చెబుతున్నారు. మొలకెత్తిన ధాన్యాల నెక్ట్స్ స్టేజ్ ఈ మైక్రోగ్రీన్స్. వీటిని ఏ విధంగా తీసుకున్నా శరీరానికి ఎంతో శక్తినిస్తాయని డాక్టర్లు చెబుతున్నారు. ఆరోగ్యానికి మేలు చేసే మైక్రోగ్రీన్స్ ను ఉత్పత్తి చేయడం ద్వారా నెలకు 50 వేల రూపాయల వరకు ఆదాయం పొందవచ్చు.
మైక్రో గ్రీన్స్లో అనేక మైక్రోన్యూట్రియెంట్స్
మైక్రో గ్రీన్స్ అంటే ఒక రకమైన ఆకుకూర. ఈ మొక్కలు కూరగాయలు, మూలికల విత్తనాల నుండి పెరుగుతాయి. కూరగాయలు, ఆకుకూరలు, నూనె గింజలు, చిక్కుళ్ళు, చిరుధాన్యాల విత్తనాలను ప్రత్యేక పద్ధతిలో ట్రేలలో నాటతారు. అవి మొలకెత్తిన తర్వాత మొదటి ఆకులు కనిపించినప్పుడు వాటిని కోస్తారు. మైక్రో గ్రీన్స్పై సన్ లైట్ నేరుగా పడకూడదు. అందుకే నీడలోనే వీటిని పెంచాలి. ఇప్పుడు ఈ విధానం అన్ని దేశాలలోనూ విస్తృతంగా వ్యాపించింది. మైక్రో గ్రీన్స్ లో అనేక మైక్రోన్యూట్రియెంట్స్ ఉన్నాయని అధ్యయనాలు చెబుతున్నాయి. వీటి ధర ఎక్కువ అయినప్పటికీ తినేవారి సంఖ్య కూడా పెరుగుతోంది.
మైక్రోగ్రీన్స్ ఎలా పండించాలి
1 కిలో కోకో పీట్, వానపాము ఎరువును కలిపి ప్లాస్టిక్ ట్రేలలో నింపి అందులో విత్తనాలు వేయాలి. ప్రతి పంటకు విత్తనం పరిమాణం మారుతుంది. క్యారెట్ విత్తనం అయితే ఒక ట్రేకి 30 గ్రాములు సరిపోతాయి. బీట్రూట్ అయితే ఒక ట్రేకి 50 గ్రాముల విత్తనాలు అవసరం. కాకరకాయ అయితే 100 గ్రాములు, బెండకాయ ౌఅయితే 150 గ్రాములు అవసరం.
విత్తనాలను 24 గంటలు నీటిలో నానబెట్టి, అవి మొలకెత్తిన తర్వాత 24 గంటలు విడిగా ఉంచాలి. ఆ తర్వాత విత్తనాలను చల్లాలి. ప్లాస్టిక్ ట్రే అడుగున చిన్న రంధ్రాలు ఉంటాయి. ఆ ట్రే కింద, మరొక ట్రే ఉంచి, అందులో నీటిని నింపడం తప్పనిసరి. తద్వారా మొక్కల పెరుగుదలకు అవసరమైన తేమ లభిస్తుంది. విత్తనాలు చల్లిన తర్వాత దానిపై మరొక ట్రే ఉంచి మూసివేయాలి.
మినుములు, పెసలు 5వ రోజు కోయాలి. ఒక ట్రేకి 150-200 గ్రాముల దిగుబడి వస్తుంది. బీట్రూట్, పొద్దుతిరుగుడు 7వ రోజు కోతకు సిద్ధంగా ఉంటుంది. బీట్రూట్లో ఒక ట్రేకి 30 గ్రాముల దిగుబడి వస్తుంది. పొద్దుతిరుగుడులో ఒక ట్రేకి 150-200 గ్రాముల దిగుబడి వస్తుంది. క్యారెట్ 14వ రోజు కోతకు వస్తుంది. ఒక ట్రేకి 20 గ్రాముల దిగుబడి వస్తుంది. ఎర్ర తండుకూర 15వ రోజు కోయవచ్చు.
మైక్రో గ్రీన్స్ ద్వారా ఎంత ఆదాయం వస్తుంది
వివిధ రకాల విత్తనాలు కొనడానికి 2 వేల రూపాయలు, వాటిని కొనుగోలు చేసే ట్రేలు కొనడానికి 2 వేలు, ఇతర ఖర్చులు కలిపి మొత్తం 6 వేల రూపాయలతో ఈ బిజినెస్ ప్రారంభించవచ్చు. అంటే సుమారు నెలకు 20 వేల రూపాయల వరకు పెట్టుబడి పెట్టాలి.
మినుములు, పెసలు, నువ్వులు, శనగలు వంటివి 1 కిలో మైక్రో గ్రీన్స్ ప్రస్తుత మార్కెట్ లో 1,500 రూపాయలకు అమ్ముడవుతాయి. ఎర్ర తండుకూర, బీట్రూట్ రకం 1 కిలో రూ.3,500, క్యారెట్లో 1 కిలో రూ.5,000 లకు అమ్ముడవుతాయి. కూలీ ఖర్చులు, కోకో పీట్, వానపాము ఎరువు వంటి అన్ని ఖర్చులు పోను నెలకు రూ.50,000 లాభం వస్తుంది.
రిఫ్రిజిరేటర్లో ఉంచితే వారం వరకు పాడవవు
మైక్రోగ్రీన్స్ను కోసిన వెంటనే రిఫ్రిజిరేటర్లో ఉంచితే వారం వరకు పాడవవు. థర్మోకోల్ బాక్స్లలో ఐస్ క్యూబ్స్ నింపి, అందులో మైక్రో గ్రీన్స్ను ఉంచి ప్యాక్ చేసి, బస్సుల ద్వారా ఇతర రాష్ట్రాలకు కూడా పంపవచ్చు. సూపర్ మార్కెట్లు, ఆర్గానిక్ స్టోర్స్, స్టార్ హోటళ్ళు, యోగా కేంద్రాలలో ముందుగానే ఆర్డర్లు తీసుకుంటే అదనపు లాభం పొందొచ్చు.
మైక్రో గ్రీన్స్లో మొలకెత్తిన పంట కంటే 4 నుండి 40 రెట్లు ఎక్కువ పోషకాలు ఉంటాయని శాస్త్రవేత్తలు చెబుతున్నారు. గోధుమలను కూడా మైక్రో గ్రీన్స్ పద్ధతిలో పెంచి తింటే మరిన్ని మెరుగైన ఫలితాలు కలుగుతాయి.