- Home
- Business
- మీరు కూడా డీమార్ట్లో ఇదే తప్పు చేస్తున్నారా.? ఈ చిన్న టిప్స్ పాటిస్తే సమయం, డబ్బు రెండూ ఆదా
మీరు కూడా డీమార్ట్లో ఇదే తప్పు చేస్తున్నారా.? ఈ చిన్న టిప్స్ పాటిస్తే సమయం, డబ్బు రెండూ ఆదా
Dmart: తక్కువ ధరలకు నిత్యావసర వస్తువులన్నీ ఒకే చోట దొరకడంతో చాలా మంది డీమార్ట్లకు అట్రాక్ట్ అవుతారు. అయితే డీమార్ట్లో షాపింగ్ చేసే విషయంలో కొన్ని టిప్స్ పాటిస్తే సమయంతో పాటు డబ్బు కూడా ఆదా చేసుకోవచ్చని మీకు తెలుసా.?
నెలలో 10 నుంచి 25వ తేదీ మధ్య షాపింగ్ చేయాలి
చాలా మంది ఉద్యోగులకు నెల ప్రారంభంలోనే జీతాలు వస్తాయి. అందుకే 1వ తేదీ నుంచి 10వ తేదీ వరకు డీమార్ట్లో రద్దీ ఎక్కువగా కనిపిస్తుంది. ఈ సమయంలో బిల్లింగ్ కౌంటర్ల వద్ద ఎక్కువసేపు వేచి ఉండాల్సి రావచ్చు. అయితే 10వ తేదీ తర్వాత పరిస్థితి కొంత మారుతుంది. రద్దీ తగ్గడంతో ప్రశాంతంగా షాపింగ్ చేసే అవకాశం ఉంటుంది. ఈ సమయంలో వినియోగదారులను ఆకర్షించేందుకు కొన్ని వస్తువులపై ప్రత్యేక ఆఫర్లు, కాంబో డీల్స్, డిస్కౌంట్లు కూడా కనిపించే అవకాశం ఉంటుంది. అందువల్ల వీలైతే ప్రతి నెల 10 నుంచి 25వ తేదీ మధ్య షాపింగ్ చేయడం మంచి ఎంపిక.
సోమవారం నుంచి గురువారం వరకు వెళ్లడం బెస్ట్
వీకెండ్ అంటే శని, ఆదివారాల్లో డీమార్ట్లో కాలు పెట్టడానికి కూడా స్థలం ఉండని పరిస్థితి చాలాసార్లు కనిపిస్తుంది. కుటుంబాలతో కలిసి వచ్చే వారి సంఖ్య ఎక్కువగా ఉండటంతో ట్రాలీలు తీసుకోవడం నుంచి బిల్లింగ్ వరకు ప్రతిచోటా రద్దీ ఉంటుంది. అందుకే వీలైతే సోమవారం నుంచి గురువారం మధ్యలో షాపింగ్కు వెళ్లండి. ఈ రోజుల్లో రద్దీ తక్కువగా ఉంటుంది. ప్రశాంతంగా అన్ని వస్తువులను చూసి ఎంపిక చేసుకునే అవకాశం ఉంటుంది. తొందరపాటు కూడా ఉండదు.
సాయంత్రం కాదు... ఉదయం వెళ్తేనే లాభం
చాలా మంది ఉద్యోగాలు ముగిసిన తర్వాత సాయంత్రం డీమార్ట్కు వెళ్తుంటారు. ఇదే సమయంలో ఎక్కువ మంది రావడంతో క్యూలు పెరుగుతాయి. వీలైతే ఉదయం వేళల్లోనే షాపింగ్ చేయండి. ఆ సమయంలో స్టోర్లో రద్దీ తక్కువగా ఉండటంతో త్వరగా పని పూర్తవుతుంది. బిల్లింగ్ కౌంటర్ల వద్ద ఎక్కువసేపు నిలబడాల్సిన అవసరం ఉండదు. ప్రశాంతంగా షాపింగ్ పూర్తి చేసుకుని ఇంటికి వెళ్లొచ్చు.
షాపింగ్కు వెళ్లే ముందు తప్పనిసరిగా ఒక లిస్ట్ తయారు చేసుకోండి
డీమార్ట్లో చాలా మంది చేసే పెద్ద తప్పు.. అవసరమైన వస్తువులు కొనడానికి వెళ్లి, అవసరం లేని వస్తువులతోనే ట్రాలీ నింపేయడం. ఆఫర్లు కనిపిస్తే వెంటనే కొనేయాలనే ఆలోచన వస్తుంది. చివరకు బిల్లు చూసినప్పుడు ఆశ్చర్యపోవాల్సి వస్తుంది. ఈ సమస్యకు సులభమైన పరిష్కారం ఉంది. ఇంట్లోనే ముందుగా కొనాల్సిన వస్తువుల జాబితా తయారు చేసుకోండి. షాపింగ్ చేస్తూ ఆ జాబితాలో ఉన్న వస్తువులను మాత్రమే తీసుకుంటూ టిక్ చేసుకుంటూ వెళ్లండి. లిస్ట్లో లేని వస్తువులను కొనకుండా ఉండేందుకు ప్రయత్నించండి. ఇలా చేస్తే అనవసర ఖర్చులు గణనీయంగా తగ్గుతాయి.
చిన్న ప్లానింగ్తో పెద్ద మొత్తంలో ఆదా చేయొచ్చు
డీమార్ట్లో తక్కువ ధరలకు వస్తువులు దొరుకుతాయనే కారణంతో ఎప్పుడు పడితే అప్పుడు వెళ్లడం కంటే, సరైన రోజు, సరైన సమయం ఎంచుకుని, ముందుగానే కొనాల్సిన వస్తువుల జాబితాతో వెళ్లడం వల్ల మరింత ప్రయోజనం పొందవచ్చు. పైన తెలిపిన ఈ చిన్న అలవాట్లు పాటిస్తే డీమార్ట్లో షాపింగ్ మరింత సౌకర్యంగా సాగడమే కాదు.. అనవసర ఖర్చులు తగ్గి, ప్రతి నెల కొంత డబ్బును కూడా ఆదా చేసుకునే అవకాశం ఉంటుంది.
