Best Gold ETFs మార్కెట్ ఎంత పడ్డా.. ఈ ఈటీఎఫ్ లు అప్ అప్!

అమెరికా అధ్యక్షుడు డొనాల్డ్ ట్రంప్ సుంకాల దెబ్బతో ప్రపంచ మార్కెట్లన్నీ కుదేలవుతున్నాయి. దాంతో జనం బంగారం వైపు మొగ్గు చూపుతున్నారు. ఫలితంగానే బంగారం ధర చుక్కల్ని తాకుతోంది. అయితే గత రెండు రోజుల్లో బంగారం ధర కొంచెం దిద్దుబాటుకి గురైంది. ఈ నేపథ్యంలో ప్రత్యక్షంగా బంగారంలో కాకుండా గోల్డ్ ఈటీఎఫ్ లలో పెట్టుబడి పెట్టడం మంచి నిర్ణయం అవుతుందని స్టాక్ మార్కెట్ నిపుణులు సలహా ఇస్తున్నారు. మరి గోల్డ్ ETF పెట్టుబడి సురక్షితమేనా? అందులో ఉత్తమ ETFలు ఏంటి? ఆ వివరాలన్నీ తెలుసుకుందాం..

మార్కెట్ డౌన్-బంగారం అప్

అమెరికా అధ్యక్షుడు డొనాల్డ్ ట్రంప్ రెసిప్రోకల్ పన్ను ప్రపంచ మార్కెట్లలో కలకలం రేపింది. ప్రతిస్పందనగా చైనా సహా ఇతర దేశాలూ సుంకాలు విధిస్తామని చెప్పాయి. దెబ్బకి  ప్రపంచ స్టాక్ మార్కెట్లు భారీ గందరగోళానికి గురయ్యాయి. భారీగా పడిపోయాయి. అదే సమయంలో బంగారం ధర కొత్త శిఖరాలకు చేరుకుంది.  ఇలాంటి పరిస్థితుల్లో బంగారంలో పెట్టుబడి పెట్టడం సురక్షితం. ఈ అవకాశాన్ని ఉపయోగించుకొని గోల్డ్ ETFలలో పెట్టుబడి పెట్టాలని నిపుణులు సూచిస్తున్నారు.

భారత్ పై ప్రభావం

భారత దేశాన్ని అత్యంత మిత్ర దేశంగా చెప్పే ట్రంప్ మనపై సుంకాల విధింపుపై మాత్రం వదల్లేదు. ఏప్రిల్ 2న భారతీయ వస్తువులపై 26% దిగుమతి పన్నును ప్రకటించారు. ఈ ప్రకటన తర్వాత మన మార్కెట్లలో హెచ్చుతగ్గులు కనిపించాయి. పెట్టుబడిదారులు సురక్షితమైన పెట్టుబడుల కోసం వెతకడం ప్రారంభించారు. వారికి బంగారం ఎక్కువ లాభం పొందే అవకాశం ఉంది.

గోల్డ్ ETFs

ఈ నేపథ్యంలో బంగారానికి అనుబంధమైన  గోల్డ్ ETFల వైపు పెట్టుబడిదారులు చూస్తున్నారు. బంగారంలో పెట్టుబడి పెట్టాలనుకునే పెట్టుబడిదారులు ఆభరణాల బంగారానికి బదులుగా గోల్డ్ ETFలో పెట్టుబడి పెట్టవచ్చు. గోల్డ్ ETFలలో పెట్టుబడి పెట్టే ముందు గమనించాల్సిన ముఖ్యమైన విషయాలలో ఒకటి - వ్యయ నిష్పత్తి. అంటే, నిధుల నిర్వహణకు అయ్యే ఖర్చు తక్కువగా ఉంటే, పెట్టుబడిదారులు ఎక్కువ ప్రయోజనాలను పొందుతారు. తక్కువ వ్యయ నిష్పత్తిని కలిగి, దీర్ఘకాలికంగా మంచి రాబడినిచ్చేవి గోల్డ్ ETFలు.

ఇవే టాప్ గోల్డ్ ETFs

జెరోధా గోల్డ్ ETF 0.32% వ్యయ నిష్పత్తిని కలిగి ఉంది. ఇది 26 ఫిబ్రవరి 2024న విడుదలైంది. ఇందులో ఎక్కువ రిస్క్ ఉంటుందీ కానీ రాబడీ ఎక్కువే. సంవత్సరంలో 30.58% రాబడిని పొందవచ్చు.

మిరే అసెట్ గోల్డ్ ETF 0.34% వ్యయ నిష్పత్తిని కలిగి ఉంది. దీని విడుదల తేదీ 20 ఫిబ్రవరి 2023. ఇది కూడా రిస్క్ ఎక్కువగా ఉండే ఈటీఎఫ్. దీని ద్వారా 30.54% వార్షిక రాబడిని పొందే అవకాశం ఉంది.

LIC MF గోల్డ్ ETF 9 నవంబర్ 2011న విడుదలైంది. దీని వ్యయ నిష్పత్తి 0.41%. రిస్క్ మీటర్‌లో ఇది సంవత్సరానికి 29.48% రాబడిని ఇస్తుంది.

గోల్డ్ ETF ప్రయోజనాలు

గోల్డ్ ETFలలో పెట్టుబడి పెట్టడం ద్వారా పెట్టుబడిదారులకు అనేక ప్రయోజనాలు ఉన్నాయి. బంగారం ధర పెరుగుదల వల్ల కలిగే ప్రయోజనాలను దీని ద్వారా కూడా పొందవచ్చు. కానీ, బంగారం భద్రత, స్వచ్ఛత గురించి ఎటువంటి ఆందోళన అవసరం లేదు. తక్కువ ఖర్చుతో పెట్టుబడి పెట్టవచ్చు. నగదు ప్రవాహం ఎక్కువగా ఉంది పెట్టుబడి. ఎప్పుడు కావాలంటే అప్పుడు ఈటీఎఫ్ లను అమ్ముకొని నగదుగా మార్చుకోవచ్చు.

సురక్షితం

ట్రంప్ కొత్త పన్ను ప్రకటనల మధ్య చాలా పెట్టుబడులు బంగారం వైపు మళ్లాయి. మార్కెట్లలో అనిశ్చితి నెలకొన్న ఈ సమయంలో గోల్డ్ ETF సురక్షితమైన, లాభదాయకమైన పెట్టుబడి అవుతుంది. మీరు బంగారంలో పెట్టుబడి పెట్టాలనుకుంటే, సరైన ETFని ఎంచుకుని పెట్టుబడి పెట్టవచ్చు. మీ పోర్ట్‌ఫోలియోను బలోపేతం చేసి మంచి ఆదాయాన్ని పొందవచ్చు.