Bajaj Pulsar: కొత్త లుక్.. క్రేజీ ఫీచర్లు.. మార్కెట్లోకి సరికొత్త బజాజ్ పల్సర్ 150, 125 గ్రాండ్ ఎంట్రీ

New Bajaj Pulsar: బజాజ్ ఆటో తమ ఐకానిక్ మోడళ్లైన పల్సర్ 150, పల్సర్ 125 బైక్‌లను అత్యంత ఆధునిక ఫీచర్లు, సరికొత్త లుక్‌తో భారత మార్కెట్లోకి అధికారికంగా లాంచ్ చేసింది. వీటిలో అందించిన కొత్త ఫీచర్ల, ధరలు సహా ఇతర వివరాలు ఇక్కడ తెలుసుకుందాం.

Image Credit : X

కొత్త బజాజ్ పల్సర్ 150, పల్సర్ 125 వచ్చేశాయి.. ఫీచర్లు మాత్రం నెక్స్ట్ లెవెల్!

బజాజ్ ఆటో తన పాపులర్ బైక్ సిరీస్ పల్సర్‌లో సరికొత్త 25th యానివర్సరీ పల్సర్ 150, పల్సర్ 125 మోడళ్లను ఇండియన్ మార్కెట్లోకి గ్రాండ్‌గా తీసుకొచ్చింది. పల్సర్ లైనప్‌లో ఎన్నడూ లేని విధంగా ఈ కొత్త మోడళ్లలో బజాజ్ అనేక అడ్వాన్స్డ్ ఫీచర్లను అందించింది. పల్సర్ డిజైన్ సిల్హౌట్‌ను అలానే ఉంచుతూనే, బైక్‌లోని ప్రధాన భాగాలన్నింటినీ అప్‌గ్రేడ్ చేసింది. మార్కెట్‌లో పల్సర్ 125 ప్రారంభ ధర రూ. 92,990 (ఎక్స్-షోరూమ్) కాగా, కొత్త పల్సర్ 150 ప్రారంభ ధర రూ. 1,15,233 (ఎక్స్-షోరూమ్)గా కంపెనీ నిర్ణయించింది.

Image Credit : X/_bajaj_auto_ltd

కొత్త బజాజ్ బైకుల ధరలు, వేరియంట్ల వివరాలు

కొత్త బజాజ్ పల్సర్ 150 బైక్ మొత్తం మూడు వేరియంట్లలో అందుబాటులోకి వచ్చింది.

• SD సింగిల్ సీట్ (Single Disc): రూ. 1,15,233

• TD సింగిల్ సీట్ (Twin Disc): రూ. 1,22,184

• TD స్ప్లిట్ సీట్ (Twin Disc Split Seat): రూ. 1,23,187

అలాగే, బజాజ్ పల్సర్ 125 మోడల్‌ను నాలుగు వేరియంట్లలో తీసుకొచ్చారు.

• బేస్ వేరియంట్: రూ. 92,990

• STD సింగిల్ సీట్: రూ. 99,291

• STD స్ప్లిట్ సీట్: రూ. 1,00,288

• ప్రీమియం స్ప్లిట్ సీట్: రూ. 1,04,318

పల్సర్ 150 ఎస్‌డీ సింగిల్ డిస్క్ నుంచి టీడీ సింగిల్ సీట్ మోడల్‌కు అప్‌గ్రేడ్ అవ్వడానికి రూ. 6,951 అదనం. ఇందులోనే గూగుల్ మ్యాప్స్‌తో కూడిన టీఎఫ్టీ స్క్రీన్, వెనుక డిస్క్ బ్రేక్, ఎల్ఈడీ ఇండికేటర్లు, ఐఎస్జీ లభిస్తాయి. అలాగే స్ప్లిట్ సీట్ కోసం కేవలం రూ. 1,003 మాత్రమే తేడా ఉంటుంది. ఇక పల్సర్ 125లో బేస్ వేరియంట్ నుంచి ఎస్టీడీ సింగిల్ సీట్‌కు రూ. 6,301 తేడా ఉంటుంది. ఇందులో ప్రధాన ఫీచర్లన్నీ యాడ్ అవుతాయి. ఎస్టీడీ సింగిల్ సీట్ నుంచి ఎస్టీడీ స్ప్లిట్ సీట్‌కు రూ. 997 మాత్రమే వ్యత్యాసం ఉంది.

Image Credit : X/_bajaj_auto_ltd

ఇంజన్ పవర్, ట్రాక్టబిలిటీ

కొత్త పల్సర్ 150 మోడల్‌లో 149.5cc సింగిల్ సిలిండర్ ఎయిర్/ఆయిల్ కూల్డ్ ఇంజన్‌ను అందించారు. ఇది 13.6bhp (14hp) పవర్‌ను, 14.1Nm పీక్ టార్క్‌ను జనరేట్ చేస్తుంది. మునుపటి మోడల్ కంటే టార్క్ 0.9Nm పెరిగింది. అలాగే పీక్ పవర్ ఇప్పుడు 8,000rpm వద్దే అందుతుంది.

ఇక పల్సర్ 125 మోడల్ 11.7bhp పవర్‌ను జనరేట్ చేస్తుంది. ఈ రెండు బైకుల్లో అందుబాటులో ఉండే టార్క్‌లో 85 శాతం టార్క్‌ను కేవలం 3,000rpm నుంచే యాక్సెస్ చేయవచ్చని బజాజ్ తెలిపింది. సిటీ ట్రాఫిక్‌లో తక్కువ వేగంతో సులభంగా ప్రయాణించేలా కొత్త గేర్‌బాక్స్‌ను ప్రత్యేకంగా డిజైన్ చేశారు.

Image Credit : X/_bajaj_auto_ltd

ఫ్రేమ్, సస్పెన్షన్, బ్రేకింగ్ అప్‌గ్రేడ్స్

రైడింగ్ అనుభవాన్ని మెరుగుపరచడానికి ఛాసిస్, సస్పెన్షన్‌లో పెద్ద మార్పులే చేశారు.

• ఛాసిస్: పాత డ్యూయల్-క్రాడిల్ ఫ్రేమ్‌ స్థానంలో కొత్త సింగిల్-క్రాడిల్ ఫ్రేమ్‌ను ఉపయోగించారు. ఇందులో ఇంజన్ స్ట్రెస్డ్ మెంబర్‌గా పనిచేసి బైక్ స్టెబిలిటీని పెంచుతుంది.

• సస్పెన్షన్: రెండూ మోడళ్లలో వెనుక వైపు కన్వెన్షనల్ ట్విన్-షాక్ స్థానంలో కొత్తగా మోనోషాక్ సస్పెన్షన్ అందించారు. ముందు వైపు 33mm టెలిస్కోపిక్ ఫోర్క్ (125mm ట్రావెల్) అందించారు.

• బ్రేకింగ్: పల్సర్ 150 ముందు వైపు 260mm డిస్క్, వెనుక వైపు 230mm డిస్క్ (బేస్ వేరియంట్‌లో 130mm డ్రమ్) ఇచ్చారు. మూడు వేరియంట్లలో సింగిల్-ఛానల్ ఏబీఎస్ స్టాండర్డ్‌గా వస్తుంది.

• టైర్లు: ముందు 80/100-17, వెనుక 100/90-17 సైజ్ ట్యూబ్‌లెస్ టైర్లను ఇచ్చారు.

Image Credit : X/_bajaj_auto_ltd

నెక్స్ట్ లెవెల్ టెక్నాలజీ: టీఎఫ్టీ స్క్రీన్, గూగుల్ మ్యాప్స్

ఈ సెగ్మెంట్‌లో ఊహించని రేంజ్ టెక్నాలజీని బజాజ్ అందించింది.

• డిస్ప్లే: పల్సర్ 150 బేస్ మోడల్‌లో 5-ఇంచ్ ఎల్సీడీ క్లస్టర్ ఉండగా, టాప్ రెండు వేరియంట్లలో 5-ఇంచ్ టీఎఫ్టీ ఇన్‌స్ట్రుమెంట్ క్లస్టర్ ఇచ్చారు. పల్సర్ 125 బేస్ మోడల్‌లో కలర్ ఎల్సీడీ ఉండగా, మిడ్ అండ్ టాప్ వేరియంట్లలో 5-ఇంచ్ టీఎఫ్టీ డిస్ప్లే ఇచ్చారు.

• గూగుల్ మ్యాప్స్: పల్సర్ 150 టాప్ వేరియంట్‌లో వైఫై సపోర్ట్ ద్వారా గూగుల్ మ్యాప్స్ మిర్రరింగ్ సౌకర్యం ఉంది.

• స్మార్ట్ ఫీచర్లు: కాల్/ఎస్ఎంఎస్ అలర్ట్లు, డిజిటల్ డాక్యుమెంట్ స్టోరేజ్, టైప్-సీ ఛార్జింగ్ పోర్ట్ ఇచ్చారు.

Image Credit : X/_bajaj_auto_ltd

రైడ్ మోడ్స్, క్రాల్ టెక్, ఐఎస్జీ ఫీచర్లు

11.7bhp, 13.6bhp పవర్ ఇచ్చే బైక్స్‌లో రైడింగ్ మోడ్స్ ఇవ్వడం విశేషం.

• రైడ్ మోడ్స్: పల్సర్ 150 అన్ని వేరియంట్లలో, పల్సర్ 125 మిడ్/టాప్ వేరియంట్లలో రోడ్, రెయిన్, స్పోర్ట్ అనే మూడు రైడ్ మోడ్స్ ఇచ్చారు.

• క్రాల్ టెక్ : ట్రాఫిక్‌లో యాక్సిలేటర్ ఇవ్వకుండానే బైక్ నెమ్మదిగా కదలడానికి ఈ ఫీచర్ ఉపయోగపడుతుంది. ఇది పల్సర్ 125, 150 అన్ని వేరియంట్లలో స్టాండర్డ్‌గా వస్తుంది.

• ఐఎస్జీ: టాప్ వేరియంట్లలో నిశ్శబ్దంగా బైక్ స్టార్ట్ అవ్వడానికి, ట్రాఫిక్‌లో ఆటోమేటిక్ స్టాప్-స్టార్ట్ అవ్వడానికి ఐఎస్జీ సిస్టమ్ ఇచ్చారు.

లైటింగ్ విషయానికి వస్తే, పల్సర్ 150 క్లాస్-బీ ఎల్ఈడీ హెడ్‌లైట్‌ను కొనసాగిస్తూనే, ఫెయిరింగ్‌ను మరింత అగ్రెసివ్‌గా రీడిజైన్ చేశారు. టాప్ వేరియంట్లకు ఆల్-ఎల్ఈడీ లైటింగ్ ఇచ్చారు.