YS Jagan: తెర‌పైకి మ‌రో కొత్త రాజ‌ధాని.. మావిగ‌న్ పేరుతో ప్లాన్ బీ ప్ర‌క‌టించిన జ‌గ‌న్

YS Jagan: ఆంధ్రప్రదేశ్ రాజధాని అంశం మరోసారి రాజకీయంగా వేడెక్కింది. అమరావతికి చట్టబద్ధత కల్పిస్తూ ప్రభుత్వం అసెంబ్లీలో తీర్మానం చేసిన నేపథ్యంలో, వైఎస్సార్ కాంగ్రెస్ పార్టీ అధినేత వైఎస్ జగన్‌మోహన్ రెడ్డి కీలక వ్యాఖ్యలు చేశారు. 

Image Credit : Asianet News

అమరావతిపై చట్ట సవరణ సాధ్యమేనా?

అమరావతికి చట్టబద్ధత కల్పిస్తూ ప్రభుత్వం తీర్మానం చేయడం రాజకీయంగా పెద్ద చర్చకు దారి తీసింది. దీనిపై స్పందించిన జగన్, ఒకసారి చట్టం చేసామని చెప్పి అది మార్పు చేయలేమని చెప్పడం సరికాదన్నారు. అదే అసెంబ్లీ మళ్లీ చట్టాన్ని సవరించుకునే అధికారాన్ని కలిగి ఉంటుందని ఆయన చెప్పారు. ఏ ప్రభుత్వం వచ్చినా పరిస్థితులకు అనుగుణంగా చట్టాల్లో మార్పులు చేయవచ్చని పేర్కొన్నారు. చట్టాన్ని మార్చడం అసాధ్యం అన్నట్లుగా ప్రజలకు చెప్పడం సరైనది కాదని ఆయన వ్యాఖ్యానించారు. ప్రజలను తప్పుదోవ పట్టించే ప్రయత్నం జరుగుతోందని కూడా విమర్శించారు.

Image Credit : our own

అమరావతి ప్రాజెక్టుపై జగన్ ఆరోపణలు

అమరావతి నిర్మాణంపై జగన్ తీవ్ర విమర్శలు చేశారు. ఈ ప్రాజెక్ట్ దేశంలోనే అతిపెద్ద అవినీతి వ్యవహారాల్లో ఒకటిగా మారిందని ఆయన ఆరోపించారు. రాజధాని పేరుతో భారీ స్థాయిలో భూములు, నిర్మాణాలు, ఖర్చులు అన్నీ ఒక వ్యవస్థీకృత విధానంలో జరుగుతున్నాయని చెప్పారు. అమరావతిని అభివృద్ధి పేరుతో భారీ ఖర్చులు చూపించడం వెనుక అవినీతి దాగి ఉందని ఆయన అభిప్రాయం వ్యక్తం చేశారు. అయితే, అమరావతికి తమ పార్టీ వ్యతిరేకం కాదని కూడా జగన్ స్పష్టం చేశారు. రాష్ట్రంలోని ప్రతి ప్రాంతం అభివృద్ధి చెందాలని తమ అభిప్రాయం అని ఆయన పేర్కొన్నారు.

Image Credit : YS Jagan Twitter

ఎకరాకు ఖర్చుపై వైసీపీ అభ్యంతరం

అమరావతి నిర్మాణంలో అసలు సమస్య ఖర్చు అని జగన్ వివరించారు. ఒక ఎకరాకు మౌలిక వసతుల అభివృద్ధికి భారీగా నిధులు అవసరం అవుతాయని చెప్పారు. ఇప్పుడు రెండో విడత భూ సమీకరణ ద్వారా సేకరించే భూముల సంఖ్య లక్ష ఎకరాలకు చేరవచ్చని, ఈ స్థాయిలో భూములను అభివృద్ధి చేయాలంటే సుమారు రూ.2 లక్షల కోట్ల వరకు ఖర్చు అవుతుందని ఆయన అంచనా వేశారు. ఇంత భారీ వ్యయం రాష్ట్ర ఆర్థిక పరిస్థితులకు అనుకూలమా అనే ప్రశ్నను ఆయన లేవనెత్తారు. సంక్షేమ కార్యక్రమాలు కొనసాగుతూనే అభివృద్ధి జరగాలంటే సమతుల్యత అవసరం అని అన్నారు.

Image Credit : YS Jagan Twitter

‘మావిగన్’ – జగన్ సూచించిన కొత్త రాజధాని ఆలోచన

రాజధాని అంశానికి ప్రత్యామ్నాయంగా జగన్ ఒక కొత్త ప్రతిపాదనను ప్ర‌తిపాదించారు. విజయవాడ, గుంటూరు, మచిలీపట్నం ప్రాంతాలను కలిపి ఒక విస్తృత రాజధాని ప్రాంతంగా అభివృద్ధి చేయాలని ఆయన సూచించారు.

మచిలీపట్నం నుంచి గుంటూరు వరకు దాదాపు 110 కిలోమీటర్ల పరిధిని రాజధాని ప్రాంతంగా ప్రకటిస్తే అభివృద్ధి అవకాశాలు పెరుగుతాయని ఆయన అభిప్రాయపడ్డారు. ఈ మూడు నగరాల పేర్ల మొదటి అక్షరాలను కలిపి కొత్త రాజధానికి “MAVIGUN” అనే పేరు పెట్టాలని కూడా సూచించారు.

MA – మచిలీపట్నం

VI – విజయవాడ

GUN – గుంటూరు

ఈ విధంగా ఒక విస్తృత మెట్రో ప్రాంతంలా రాజధాని అభివృద్ధి చేయవచ్చని ఆయన అభిప్రాయపడ్డారు.

Image Credit : YS Jagan Twitter

తక్కువ ఖర్చుతో పోర్ట్ సిటీ అభివృద్ధి

మచిలీపట్నం పోర్ట్ ఉన్న కారణంగా ఈ ప్రాంతాన్ని అభివృద్ధి చేస్తే భారీ ఆర్థిక అవకాశాలు ఏర్పడతాయని జగన్ తెలిపారు. చెన్నై లేదా ముంబై తరహాలో ఒక పోర్ట్ ఆధారిత నగరంగా అభివృద్ధి సాధ్యమవుతుందని ఆయన చెప్పారు. ప్రస్తుతం అమరావతి ప్రాజెక్ట్‌కు అంచనా వేసిన మొత్తం వ్యయంలో కేవలం 10 శాతం మాత్రమే ఖర్చు చేసినా ఈ ప్రాంతాన్ని అభివృద్ధి చేయవచ్చని ఆయన అభిప్రాయపడ్డారు. జాతీయ రహదారి వెంట నగరాల మధ్య అభివృద్ధి జరిపితే తక్కువ ఖర్చుతో మౌలిక సదుపాయాలు ఏర్పాటు చేయవచ్చని సూచించారు.