T20 worldcup 2021: ఆస్ట్రేలియాని కట్టడి చేసిన ఇంగ్లీష్ బౌలర్లు... ఇంగ్లాండ్ ముందు ఈజీ టార్గెట్...
T20 worldcup 2021: 125 పరుగులకి ఆలౌట్ అయిన ఆస్ట్రేలియా... 44 పరుగులు చేసిన కెప్టెన్ ఆరోన్ ఫించ్, మూడు వికెట్లు తీసిన క్రిస్ జోర్డాన్...
టీ20 వరల్డ్‌కప్ 2021 టోర్నీలో వరుసగా రెండు విజయాలు అందుకున్న ఆస్ట్రేలియాను స్వల్ప స్కోరుకే కట్టడి చేశారు ఇంగ్లాండ్ బౌలర్లు. నిర్ణీత 20 ఓవర్లలో 125 పరుగులకి ఆలౌట్ అయ్యింది ఆస్ట్రేలియా. టాస్ ఓడి తొలుత బ్యాటింగ్ మొదలెట్టిన ఆస్ట్రేలియాకి రెండో ఓవర్‌లోనే షాక్ తగిలింది. 1 పరుగు చేసిన డేవిడ్ వార్నర్, క్రిస్ వోక్స్ బౌలింగ్‌లో వికెట్ కీపర్ జోస్ బట్లర్‌కి క్యాచ్ ఇచ్చి అవుట్ అయ్యాడు. అంపైర్ అవుట్‌గా ప్రకటించకపోయినా వార్నర్ స్వచ్ఛందంగా పెవిలియన్‌కి చేరుకున్నాడు. 7 పరుగుల వద్ద తొలి వికెట్ కోల్పోయింది ఆస్ట్రేలియా...
ఆ తర్వాతి ఓవర్‌లో 5 బంతుల్లో 1 పరుగు చేసిన స్టీవ్ స్మిత్, క్రిస్ జోర్డాన్ బౌలింగ్‌లో క్రిస్ వోక్స్ పట్టిన కళ్లు చెదిరే క్యాచ్‌తో అవుట్ అయ్యాడు. గత 15 టీ20 ఇన్నింగ్స్‌ల్లో స్టీవ్ స్మిత్ సింగిల్ డిజిట్ స్కోరుకి అవుట్ కావడం ఇదే తొలిసారి...
ఇదీ చదవండి: వెన్నెముక లేని వెధవలు, మతం పేరుతో దూషిస్తారా... మహ్మద్ షమీపై వచ్చిన ట్రోల్స్‌పై విరాట్ కోహ్లీ ఫైర్...
ఆ తర్వాత 9 బంతుల్లో 6 పరుగులు చేసిన గ్లెన్ మ్యాక్స్‌వెల్, క్రిస్ వోక్స్ బౌలింగ్‌లో ఎల్బీడబ్ల్యూగా పెవిలియన్ చేరాడు. మ్యాక్స్‌వెల్ రివ్యూకి వెళ్లినా ఫలితం దక్కలేదు. ఆ తర్వాత మార్కస్ స్టోయినిస్ 4 బంతుల్లో డకౌట్ అయ్యాడు. అదిల్ రషీద్ బౌలింగ్‌లో ఎల్బీడబ్ల్యూగా అవుట్ అయ్యాడు స్టోయినిస్. 21 పరుగులకే 4 వికెట్లు కోల్పోయింది ఆస్ట్రేలియా...
18 బంతుల్లో 2 ఫోర్లతో 18 పరుగులు చేసిన మాథ్యూ వేడ్, లివింగ్‌స్టోన్ బౌలింగ్‌లో జాసన్ రాయ్‌కి క్యాచ్ ఇచ్చి అవుట్ అయ్యాడు. 51 పరుగుల వద్ద ఐదో వికెట్ పడింది. ఈ దశలో ఆరోన్ ఫించ్, ఆస్టన్ అగర్ కలిసి ఆరో వికెట్‌కి పరుగుల భాగస్వామ్యం నెలకొల్పారు...ఈ దశలో ఇంగ్లాండ్‌పై అత్యధిక టీ20 పరుగులు చేసిన ప్లేయర్‌గా విరాట్ కోహ్లీని అధిగమించి, 580+ పరుగులతో టాప్‌లోకి వెళ్లాడు ఆరోన్ ఫించ్.
ఓపెనర్‌గా అత్యధిక సార్లు 30+ పరుగులు చేసిన బ్యాట్స్‌మెన్‌గా మార్టిన్ గుప్టిల్ (40 సార్లు), తర్వాతి స్థానంలో (39 సార్లు) నిలిచాడు ఆరోన్ ఫించ్. 20 బంతుల్లో 2 సిక్సర్లతో 20 పరుగులు చేసిన అస్టన్ అగర్, తైముల్ మిల్స్ బౌలింగ్‌లో లివింగ్ స్టోన్‌కి క్యాచ్ ఇచ్చి అవుట్ కాగా క్రిస్ జోర్డాన్ వేసిన 19వ ఓవర్‌లో వరుసగా రెండు వికెట్లు తీశాడు క్రిస్ జోర్డాన్...
49 బంతుల్లో 4 ఫోర్లతో 44 పరుగులు చేసిన ఆరోన్ ఫించ్, క్రిస్ జోర్డాన్ బౌలింగ్‌లో జానీ బెయిర్‌స్టోకి క్యాచ్ ఇచ్చి పెవిలియన్ చేరాడు. ఆ తర్వాతి బంతికే వరుస రెండు సిక్సర్లతో 12 పరుగులు చేసిన ప్యాట్ కమ్మిన్స్‌ను క్లీన్ బౌల్డ్ చేశాడు జోర్డాన్...
తైమల్ మిల్స్ వేసిన ఆఖరి ఓవర్‌లో ఓ ఫోర్, సిక్సర్ బాదిన మిచెల్ స్టార్క్ 13 పరుగులు చేయడంతో ఈ మాత్రం స్కోరు అయినా చేయగలిగింది ఆసీస్. ఇంగ్లాండ్ బౌలర్లలో క్రిస్ జోర్డాన్ 4 ఓవర్లలో 17 పరుగులిచ్చి 3 వికెట్లు తీయగా క్రిస్ వోక్స్ 2 వికెట్లు తీశాడు. అదిల్ రషీద్ 4 ఓవర్లలో 19 పరుగులు ఇచ్చి ఓ వికెట్ తీయగా లియామ్ లివింగ్‌స్టోన్ ఓ వికెట్ తీసి 15 పరుగులు మాత్రమే ఇచ్చాడు...
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
