ఏపీ హైకోర్టు ఆఫర్: సీఆర్‌డీఏకు ఈ నెల 20వ తేదీ వరకు రైతులకు గడువు

అమరావతికి చెందిన రైతులు తమ అభిప్రాయాలను సీఆర్‌డీఏకు చెప్పేందుకు ఈ నెల 20 వ తేదీకి పొడిగిస్తూ హైకోర్టు ఆదేశాలు జారీ చేసింది. 

court

అమరావతి: రాజధానికి చెందిన రైతుల అభిప్రాయాలు, సూచనలు, సలహాలు ఇచ్చేందుకు ఈ నెల 20వ తేదీ వరకు గడువును పొడిగిస్తూ ఏపీ హైకోర్టు ఆదేశాలు జారీ చేసింది. వాస్తవానికి ఈనెల 17వ సాయంత్రానికే సీఆర్‌డీఏకు రైతులు తమ అభిప్రాయాలను చెప్పుకొనేందుకు అవకాశం ఇచ్చింది ప్రభుత్వం.

అయితే సీఆర్‌డీఏకు తమ అభిప్రాయాలను చెప్పుకొనేందుకు గడువును మరింత పెంచాలని ఏపీ హైకోర్టులో శుక్రవారం నాడు పిటిషన్ దాఖలైంది. ఈ పిటిషన్ ‌పై ఏపీ హైకోర్టు విచారించింది.తమ అభిప్రాయాలను చెప్పుకొనేందుకు గడువును మరింత పెంచాలని రైతులు దాఖలు చేసిన పిటిషన్‌పై హైకోర్టు సానుకూలంగా స్పందించింది.

ఈ నెల 20వ తేదీ మధ్యాహ్నం రెండు గంటల వరకు గ్రీవెన్స్‌ సెల్ లో పిర్యాదు చేసుకోనేందుకు అవకాశం కల్పించింది హైకోర్టు. ఈ నెల 20 వ తేదీకి హైకోర్టు ఈ పిటిషన్‌పై విచారణను వాయిదా వేసింది.

రాష్ట్ర సమగ్రాభివృద్ధి కోసం ఏర్పాటు చేసిన జీఎన్ రావు, బోస్టన్ కన్సల్టెన్సీ కమిటీలపై ప్రభుత్వం ఏర్పాటు చేసిన హైపవర్ కమిటీ ఈ నెల 18వ తేదీన ఏపీ కేబినెట్ సమావేశంలో చర్చించనున్నారు.