కాంగ్రెస్‌లోకి వెళ్లొద్దు...ఎమ్మెల్సీ ఇస్తాం...వినోద్‌కు కేటీఆర్ ఆఫర్..?

ఎన్నికలు సమీపిస్తున్న కొద్దీ టీఆర్ఎస్‌లో అసమ్మతి రాగాలు తీసే నేతలు ఎక్కువవుతున్నారు. చెన్నూరు నుంచి టికెట్ ఆశించి భంగపడి తీవ్ర మనస్తాపానికి గురైన మాజీ మంత్రి, సీనియర్ నేత జి. వినోద్‌ కాంగ్రెస్ తీర్థం పుచ్చుకునేందుకు రెడీ అయ్యారు.

రెండు రోజులుగా ఢిల్లీలో మకాం వేసిన వినోద్ కాంగ్రెస్ పెద్దలతో మంతనాలు జరుపుతున్నారు. చెన్నూర్ నుంచి రాకపోతే బెల్లంపల్లైనా తనకు ఓకేనని ఆయన సంకేతాలు ఇచ్చారు. అయితే సోదరుడు వివేక్‌తో కలిసి వస్తేనే పార్టీలో చేర్చుకుంటామని కాంగ్రెస్ అధిష్టానం చెప్పడంతో... ఆయన డైలమాలో పడ్డారు.. అయినప్పటికీ తన ప్రయత్నాలు కొనసాగిస్తూనే ఉన్నారు.

అయితే ఆయన్ను బుజ్జించేందుకు మంత్రి కేటీఆర్ రంగంలోకి దిగారు. ప్రస్తుతానికి పట్టువీడాలని.. పార్టీ అధికారంలోకి రాగానే ఎమ్మెల్సీ పదవి ఇస్తామని ఆయన వినోద్ ముందు ప్రతిపాదన ఉంచినట్లుగా టీఆర్ఎస్ వర్గాల్లో చర్చ జరుగుతోంది. ఈ క్రమంలో ఢిల్లీ నుంచి తిరిగి వచ్చాకా కేటీఆర్‌‌తో ఆయన చర్చలు జరిపే అవకాశం ఉందని పార్టీ శ్రేణులు భావిస్తున్నారు.