ఐఎన్ఎక్స్ మీడియా కేసు: చిదంబరం సీబీఐ కస్టడీ పొడిగింపు

ఐఎన్ఎక్స్ మీడియా కేసులో కేంద్ర మాజీ మంత్రి, కాంగ్రెస్ సీనియర్ నేత పి. చిదంబరం సీబీఐ కస్టడీని సుప్రీంకోర్టు మంగళవారం వరకు పొడిగించింది.  చిదంబరాన్ని కస్టడీ కోరుతూ... దాఖలైన పిటిషన్‌పై సోమవారం విచారణ జరిగింది. దీనిపై సమాధానం ఇవ్వాల్సిందిగా సుప్రీం.. సీబీఐకి నోటీసులు ఇచ్చింది.

అయితే చిదంబరానికి మధ్యంతర రక్షణ కల్పించాలని సుప్రీంకోర్టును కోరారు ఆయన తరపు న్యాయవాది కపిల్ సిబాల్. ప్రస్తుతం ఆయన ఆరోగ్యం బాగోలేదని... జైలుకు పంపకుండా, బెయిల్ మంజూరు చేయాలని, లేదంటే హౌస్ అరెస్ట్ చేసేలా ఆదేశాలు జారీ చేయాలని సిబాల్ కోర్టు దృష్టికి తీసుకొచ్చారు.

వాదనలు విన్న సుప్రీం.. చిదంబరాన్ని జైలుకు పంపకుండా సెప్టెంబర్ 5 వరకు రిమాండ్‌ను పొడిగించింది. దీంతో బెయిల్ కోసం ట్రయల్‌కోర్టును ఆశ్రయించాలని సిబాల్‌కు న్యాయస్థానం సూచించింది.

అలాగే.. చిదంబరం పిటిషన్ వేస్తే పరిశీలించాలని ట్రయల్‌కోర్టును సర్వోన్నత న్యాయస్థానం ఆదేశించింది. అంతేకాకుండా ఒకవేళ బెయిల్‌ను తిరస్కరిస్తే చిదంబరాన్ని తీహార్ జైలుకు పంపవద్దని సూచించింది.

కాగా.. తీర్పు ఇచ్చిన కొద్దిసేపటికే చిదంబరం కేసులో సవరణ చేసింది సుప్రీం. ఈ నెల 5 వరకు చిదంబరం కస్టడీని పొడిగించుకోవచ్చన్న ఆదేశాలపై సొలిసిటర్ జనరల్ అభ్యంతరం వ్యక్తం చేయడంతో పాటు.. సీబీఐ కస్టడీని రేపటివరకే కోరుతామని ఆయన న్యాయస్థానం దృష్టికి తీసుకొచ్చారు. దీంతో చిదంబరం బెయిల్ పిటిషన్‌ను మంగళవారం మరోసారి విచారించాలని సుప్రీం నిర్ణయించింది.