గాలితో పరిచయం...ఇరుక్కున్న 4 నగరాల బంగారు వ్యాపారులు

మైనింగ్ కింగ్, బళ్లారి రారాజు గాలి జనార్థన్ రెడ్డి ప్రస్తుతం ఆచూకీ లేకుండా పోవడంతో ఆయన కోసం కర్ణాటక పోలీసులు, సీబీఐ వేట సాగిస్తున్నాయి. ఆయన అసలు ఇండియాలో ఉన్నారా.. లేదంటే దేశం విడిచి పారిపోయారా అన్న కోణంలో పోలీసులు ఆరా తీస్తున్నారు.

ఈ నేపథ్యంలో బళ్లారిలోని గాలి నివాసంతో పాటు ఆయనకు అత్యంత సన్నిహితుల ఇళ్లపై పోలీసులు దాడులు నిర్వహించి.. తనిఖీలు జరిపారు. గాలికి బంగారు వ్యాపార లావాదేవీల్లో సహకరించిన బళ్లారి నగరంలోని రాజ్‌కమల్ యజమానిని పోలీసులు విచారించారు.

గాలి బంగారం ఎప్పుడు కొన్నా ఇతని వద్ద నుంచే కొనేవారు.. అలాగే దేశంలోనే అత్యంత వైభవంగా నిర్వహించిన కుమార్తె వివాహానికి ఇక్కడి నుంచే బంగారు ఆభరణాలు కొనుగోలు చేసినట్లుగా తెలుస్తోంది.

దీనితో పాటు ఇంత వరకు గాలి జనార్థన్ రెడ్డి ఎంత బంగారం కొన్నది.. ఎక్కడెక్కడ కొన్నది.. అందులో వజ్రాలు, ఇతర బంగారు బిస్కెట్లు ఎన్ని.. దీంతో పాటు గాలికి బళ్లారితో పాటు బెంగళూరు, హైదరాబాద్, ముంబయి నగరాల్లో ఏయే బంగారు వ్యాపారులతో సంబంధాలు, పరిచయాలు ఉన్నాయన్న కోణంలో ఆరా తీస్తున్నారు.

సీబీఐ ఆయనను తొలిసారి అరెస్ట్ చేయడానికి ముందు ఎక్కడెక్కడ బంగారు ఆభరణాల వ్యాపారులతో సంబంధాలు కొనసాగించింది పోలీసులు విచారిస్తున్నారు. దీంతో జనార్థన్ రెడ్డితో పరిచయం ఉన్న పాపానికి ఇప్పుడు ఇబ్బంది పడాల్సి వస్తోందని ఆభరణాల వ్యాపారులు ఆవేదన వ్యక్తం చేస్తున్నారు. అవినీతిపరుడికి దగ్గరగా ఉన్నందుకు తమకు కష్టాలు తప్పడం లేదని లబోదిబోమంటున్నారు.