Diabetes Care: షుగర్ పేషెంట్స్ బీ అలర్ట్.. కాలి గాయాలను అస్సలు నిర్లక్ష్యం చేయొద్దు..

Foot Care Tips for Diabetes: వర్షాకాలంలో తేమ ఎక్కువగా ఉండటంతో డయాబెటిస్ ఉన్నవారికి పాదాల ఇన్ఫెక్షన్లు వచ్చే అవకాశం ఎక్కువ. వీటి వల్ల గాయాలు, చర్మ సమస్యలు తలెత్తవచ్చు. అందుకే ఈ వర్షాకాలంలో డయాబెటిక్ రోగులు ఈ జాగ్రత్తలు పాటించాలి:

చిన్న నిర్లక్ష్యం- పెద్ద సమస్య

వర్షాకాలం ప్రారంభం కాగానే వాతావరణంలో తేమ పెరిగి, వ్యాధులు సోకే అవకాశాలు పెరుగుతాయి. ముఖ్యంగా డయాబెటిస్ ఉన్నవారికి ఈ సీజన్ సవాలుతో కూడినదే. వర్షాకాలంలో రక్తంలో చక్కెర స్థాయిల్లో ఊహించని మార్పులు రావడం, ఇన్ఫెక్షన్లు, పాద గాయాలు, చర్మ సమస్యలు, మూత్ర సంబంధిత ఇబ్బందులు మొదలైనవీ ఎక్కువగా కనిపిస్తాయి. శరీర రోగనిరోధక శక్తి తక్కువగా ఉండటంతో చిన్న గాయాలు కూడా పెద్ద సమస్యగా మారే ప్రమాదం ఉంది. 

అందువల్ల డయాబెటిస్ ఉన్నవారు ఈ కాలంలో తమ ఆహారం, జీవనశైలి, పాదాల శుభ్రత విషయంలో ఎక్కువ శ్రద్ధ చూపాలి. ప్రతిరోజూ గ్లూకోజ్ స్థాయిలను చెక్ చేయడం, తేమ గల ప్రదేశాలు నివారించడం,  గాయాలు కాకుండా జాగ్రత్తలుతీసుకోవాలి. లేకపోతే చిన్న నిర్లక్ష్యం కూడా పెద్ద సమస్యకు దారితీస్తుంది.

ఆరోగ్య సమస్యలు

వర్షాకాలంలో డయాబెటిస్ పేషెంట్స్ తమ ఆరోగ్యం గురించి ప్రత్యేక జాగ్రత్తలు తీసుకోవాలి. ఎందుకంటే ఈ సీజన్‌లో వాతావరణ తేమ పెరగడం వల్ల ఫంగస్, బ్యాక్టీరియా, ఇతర సూక్ష్మజీవుల పెరుగుదల వేగంగా జరుగుతుంది. నిపుణుల అభిప్రాయం ప్రకారం..  డయాబెటిక్ వ్యాధిగ్రస్తులకు రోగనిరోధక శక్తి తక్కువగా ఉండటం వల్ల రోగాలు ఎక్కవగా వచ్చే అవకాశముంది. ముఖ్యంగా పాదాల్లో గాయాలు ఉంటే అవి త్వరగా వచ్చే ప్రమాదం ఉంటుంది, దీని వలన తీవ్రమైన ఆరోగ్య సమస్యలు వచ్చే అవకాశం ఉంటుంది.

గ్లూకోజ్ స్థాయిపై ప్రభావం

వర్షాకాలంలో డయాబెటిస్ ఉన్నవారికి రక్తంలో చక్కెర స్థాయి ఊహించని మార్పులకు లోనయ్యే ప్రమాదం ఉంది. వాతావరణం తేమతో ఉండటంతో శరీరంపై ప్రభావం పడుతుంది, ఇది రక్తంలో గ్లూకోజ్ స్థాయిపై ప్రభావం చూపుతుంది. కాబట్టి ఈ కాలంలో వారు తమ బ్లడ్ షుగర్ లెవెల్‌ను నిరంతరం పరిశీలించుకోవాలి. అలాగే వైద్యుడు సూచించిన మందులను నిబంధనల ప్రకారం, సరిగ్గా సమయానికి తీసుకోవడం కీలకం.

ఆహార అలవాట్ల విషయంలో కూడా జాగ్రత్త అవసరం. ముఖ్యంగా వర్షాకాలంలో  పండ్లు, తాజా కూరగాయలు, ప్రోటీన్లు, ఫైబర్, అధికంగా ఉన్న ఆహారాన్ని తీసుకోవాలి. అధిక ఉప్పు, సరిగా ఉడకని పదార్థాలు, స్ట్రీట్ ఫుడ్ కు దూరంగా ఉండాలి.  

జాగ్రత్తలు

వర్షాకాలంలో డయాబెటిస్ ఉన్నవారికి పాదాల సంరక్షణ కోసం పాటించాల్సిన ముఖ్యమైన సూచనలు ఇవే:

చెప్పులు లేకుండా నడవడం మానుకోండి – తడిచిన నేలపై నడవడం వల్ల చిన్న గాయాలు జరగవచ్చు, ఇవి త్వరగా ఇన్ఫెక్షన్‌లకు దారితీస్తాయి.

కాళ్ళను శుభ్రంగా ఉంచుకోండి – బయటి నుంచి ఇంటికి వచ్చిన వెంటనే కాళ్ళను సబ్బుతో శుభ్రంగా కడుకోవాలి.  పూర్తిగా పొడిగా ఆరబెట్టాలి.

గోళ్ళ శుభ్రత – కాలి వేళ్ల గోళ్ళను క్రమం తప్పకుండా కత్తిరించి శుభ్రంగా ఉంచుకోవాలి, ఎందుకంటే గోళ్ళలో బ్యాక్టీరియా పెరిగే అవకాశముంది.

నాణ్యమైన చెప్పులు ధరించండి – పాదాలకు గాయాలు కాకుండా సౌకర్యవంతమైన చెప్పులను  ధరించాలి.  

తడి లేకుండా సాక్స్ ధరిచేయండి – పాదాలు పూర్తిగా ఆరిన తర్వాతే సాక్స్ ధరించాలి. తడి సాక్స్ వల్ల ఫంగస్ రావొచ్చు.  

ముందస్తు జాగ్రత్తలు

వర్షాకాలంలో డయాబెటిస్ ఉన్నవారు పాటించాల్సిన మరికొన్ని కీలక ఆరోగ్య సూచనలు ఇవే:

హైడ్రేషన్: తేమతో కూడిన వాతావరణం ఉన్నా శరీరం నీటి కొరతకు లోనవ్వకూడదు. అందుకే తగినంత నీరు తాగాలి. ఆకుకూరల రసం, నిమ్మరసం వంటి ఆరోగ్యకరమైన పానీయాలు కూడా తీసుకోవాలి.

వ్యాయామం: ప్రతిరోజూ ఉదయం వ్యాయామం చేయడం అలవాటుగా మార్చుకోవాలి. ఇది ఇన్సులిన్ సెన్సిటివిటీని మెరుగుపరచి, రక్తంలో చక్కెర స్థాయిని నియంత్రించడంలో సహాయపడుతుంది.

చెకప్: ప్రతి మూడు నెలలకు ఒకసారి HbA1c సహా డయాబెటిస్ టెస్టులు చేయించుకోవడం చాలా అవసరం. ఇలా చేయడం వల్ల డయాబెటిస్ స్థాయిని అంచనా వేసి, అవసరమైన మార్పులు చేసుకోవచ్చు.

పాదాల పరిశీలన: వర్షాకాలంలో రోజూ పాదాలను తనిఖీ చేయాలి. పాదాల్లో రక్త ప్రసరణ తక్కువగా ఉన్నప్పుడు చర్మం రంగు మార్పులు, అలర్జీలు, గాయాలు వంటి సమస్యలు కనిపించవచ్చు.కాబట్టి ప్రారంభ దశలోనే గుర్తించడం అవసరం.

ఈ సూచనలు పాటించడం ద్వారా వర్షాకాలంలో డయాబెటిక్ ఫుట్ ఇన్ఫెక్షన్లు నుంచి రక్షణ పొందవచ్చు.