మెడ కోసే ప్రయత్నం చేశాడు: జగన్ మీద దాడిపై విజయసాయి

తమ పార్టీ అధ్యక్షుడు వైఎస్ జగన్మోహన్ రెడ్డిపై జరిగిన దాడిపై వైఎస్సార్ కాంగ్రెసు పార్టీ రాజ్యసభ సభ్యుడు విజయసాయి రెడ్డి స్పందించారు. డీజీపీ ఆర్పీ ఠాకూర్ తీరుపై ఆయన తీవ్రంగా ధ్వజమెత్తారు.

హైదరాబాద్: తమ పార్టీ అధ్యక్షుడు వైఎస్ జగన్మోహన్ రెడ్డిపై జరిగిన దాడిపై వైఎస్సార్ కాంగ్రెసు పార్టీ రాజ్యసభ సభ్యుడు విజయసాయి రెడ్డి స్పందించారు. డీజీపీ ఆర్పీ ఠాకూర్ తీరుపై ఆయన తీవ్రంగా ధ్వజమెత్తారు. సెల్ఫీ తీసుకుంటున్నట్లు నటించి శ్రీనివాస రావు జగన్ మెడ కోసే ప్రయత్నం చేశాడని ఆయన అన్నారు. 

గొంతుపై కాకుండా భుజానికి గాయమైందని ఆయన గురువారం మీడియా సమావేశంలో అన్నారు. నిందితుడు పనిచేస్తున్న క్యాంటీన్ తెలుగుదేశం పార్టీ నాయకుడికి చెందిందని ఆయన అన్నారు. ఎయిర్ పోర్టులోపలికి కత్తి ఎలా వచ్చిందని ఆయన అడిగారు. 

సంఘటన ఎయిర్ పోర్టులో జరిగింది కాబట్టి పోలీసులకు సంబంధం లేదా అని ఆయన ప్రశ్నించారు. విచారణకు ముందే కేసును నీరు గార్చే ప్రయత్నం చేస్తున్నారని విమర్శించారు. నిందితుడు జగన్ అభిమాని అని, పబ్లిసిటీ కోసం దాడి చేశాడని డిజీపీ ఎలా చెబుతారని, డీజీపి కాపీ కొట్టి పాసయ్యారా అని ఆయన అడిగారు. 

వచ్చే ఎన్నికల్లో తెలుగుదేశం పార్టీకి ప్రజలే బుద్ధి చెప్తారని ఆయన అన్నారు. విశాఖ విమానాశ్రయంలో గురువారంనాడు వైఎస్ జగన్మోహన్ రెడ్డిపై శ్రీనివాసరావు అనే యువకుడు దాడి చేసిన విషయం తెలిసిందే.

సంబంధిత వార్తలు