టూ లేట్, రాహుల్ ఫోన్ చేసినా కాంగ్రెస్ లో ఉండను: కోట్ల సూర్యప్రకాశ్ రెడ్డి

ఇప్పుడు రాహుల్‌గాంధీ ఫోన్‌ చేసినా కాంగ్రెస్ లో ఉండలేనన్నారు. టూ లేట్ అంటూ పెదవి విరిచారు. ఏపీ సీఎం చంద్రబాబు నాయుడు కుటుంబానికి తమ కుటుంబానికి ఎన్నో ఏళ్లుగా సన్నిహిత సంబంధం ఉందని అందువల్ల చంద్రబాబు నాయుడు విందుకు ఆహ్వానిస్తే వెళ్లామని చెప్పుకొచ్చారు. 

కర్నూలు: కాంగ్రెస్ పార్టీలో ఇక ఉండదలచుకోలేదని కేంద్రమాజీ మంత్రి కోట్ల సూర్య ప్రకాశ్ రెడ్డి స్పష్టం చేశారు. తాను పార్టీ మారుతున్నట్లు వస్తున్న వార్తలపై కాంగ్రెస్ పార్టీ ఎలాంటి సంప్రదింపులు జరపలేదన్నారు. 

కర్నూలులో మీడియాతో మాట్లాడిన ఆయన రాష్ట్రంలో ఒంటరిగా పోటీ చేయాలని, పొత్తులు ఉండవని కాంగ్రెస్‌ కోర్‌ కమిటీ భేటీలో పార్టీ తీసుకున్న నిర్ణయాన్ని వ్యతిరేకించి బయటకు వచ్చినట్లు తెలిపారు. తనతో కాంగ్రెస్ పార్టీకి చెందిన వారు ఎవరూ మాట్లాడలేదన్నారు.

ఇప్పుడు రాహుల్‌గాంధీ ఫోన్‌ చేసినా కాంగ్రెస్ లో ఉండలేనన్నారు. టూ లేట్ అంటూ పెదవి విరిచారు. ఏపీ సీఎం చంద్రబాబు నాయుడు కుటుంబానికి తమ కుటుంబానికి ఎన్నో ఏళ్లుగా సన్నిహిత సంబంధం ఉందని అందువల్ల చంద్రబాబు నాయుడు విందుకు ఆహ్వానిస్తే వెళ్లామని చెప్పుకొచ్చారు. 

తన భార్య డోన్‌ మాజీ ఎమ్మెల్యే కోట్ల సుజాతమ్మ, తనయుడు రాఘవేంద్రరెడ్డి, సోదరుడితో కలిసి చంద్రబాబును కలిసినట్లు కార్యకర్తలకు చెప్పారు. తమ భేటీలో చంద్రబాబు తనను టీడీపీలో చేరాలని కోరలేదని, తాను చేరుతున్నానని కూడా చెప్పలేదన్నారు. కర్నూలు జిల్లాలో సమస్యలు అడిగి తెలుసుకున్నారని తెలిపారు. 

కర్నూలు లోక్‌సభ నియోజకవర్గం పరిధిలో ఉన్న గుండ్రేవుల జలాశయం, వేదవతి ప్రాజెక్టు, ఎల్లెల్సీ బైపాస్‌ పైప్‌లైన్‌ నిర్మించాలని సీఎంను కోరినట్లు తెలిపారు. వేదవతి ప్రాజెక్టుకు సీఎం జీవో ఇచ్చారని గుండ్రేవుల ప్రాజెక్టు ఇస్తేనే రైతుల సమస్య శాశ్వతంగా తీరుతుందని ఆయన స్పష్టం చేశారు. 

తనను తమ పార్టీలోకి రావాల్సిందిగా టీడీపీ, వైసీపీ, బీజేపీ నాయకులు ఆహ్వానించిన మాట వాస్తవమేనని అయితే కార్యకర్తల నిర్ణయమే తనకు శిరోధార్యమన్నారు. తన అభిమానులు, కార్యకర్తలు ఏ నిర్ణయం తీసుకున్నా దానికి కట్టుబడి ఉంటానని స్పష్టం చేశారు. 

స్వతంత్రంగా పోటీ చేయాలన్నా దానికి కూడా సిద్ధమేనన్నారు. ఇకపోతే కోట్ల సూర్యప్రకాశ్ రెడ్డి త్వరలోనే టీడీపీలో చేరబోతున్నారని ఆయన వర్గీయులు చెప్తున్నారు. ఫిబ్రవరి 8 తర్వాత సైకిలెక్కే అవకాశం ఉందని తెలుస్తోంది.  

ఈ వార్తలు కూడా చదవండి