ఫలించిన పోలీసుల ఎత్తు.. తల్లిదండ్రుల ముందు కొందరి పేర్లు చెప్పిన శ్రీనివాసరావు

వైసీపీ అధినేత, ఏపీ ప్రతిపక్షనేత వైఎస్ జగన్మోహన్ రెడ్డిపై విశాఖ విమానాశ్రయంలో దాడికి పాల్పడిన శ్రీనివాసరావును పోలీసులు గత వారం రోజులుగా విచారిస్తున్న సంగతి తెలిసిందే.

విశాఖ ఎయిర్‌పోర్ట్ పీఎస్‌లో సిట్ అధికారులతో పాటు స్వయంగా నగర పోలీస్ కమిషనర్ మహేశ్ చంద్ర లడ్హా శ్రీనివాసరావును ప్రశ్నిస్తున్నారు. ఎన్ని సార్లు అడిగినా తాను ఉద్దేశ్యపూర్వకంగానే జగన్‌పై దాడి చేశానని.. తన వెనుక ఎవరు లేరని చెప్పిందే చెబుతున్నాడు.

రెస్టారెంట్ యాజమాని, అతని స్నేహితులు, తోటి సిబ్బంది, కాల్ డేటా, బ్యాంకు ఖాతాలు ఇలా ప్రతి దానిని జల్లెడ పట్టిన పోలీసులకు అతని నుంచి సమాధానం మాత్రం రాబట్టలేకపోయారు. ఈ క్రమంలో ఇవాళ ఉదయం అతని తల్లిదండ్రులను స్టేషన్‌కు పిలిపించారు.

విశాఖ ఎయిర్‌పోర్ట్ పీఎస్‌కు చేరుకున్న తల్లిదండ్రులను చూడగానే...శ్రీనివాసరావు ఉద్వేగానికి లోనై కంటతడి పెట్టాడు. వారిని ఎదురుగా కూర్చోబెట్టిన సిట్ అధికారులు అతన్ని విచారించారు. సుమారు 3 గంటల పాటు జరిగిన విచారణలో అతను కొన్ని వివరాలతో పాటు.. కొందరి పేర్లను చెప్పినట్లుగా తెలుస్తోంది.