Hyderabad: హైదరాబాద్ లో ఇజ్రాయెల్ కు చెందిన సైబర్ ఆర్క్ కంపెనీ ఆర్ అండ్ డీ కేంద్రాన్ని ఐటీ మంత్రి కేటీఆర్ ప్రారంభించారు. ఈ క్రమంలోనే సైబర్ దాడుల నుంచి రక్షణ కల్పించడంపై దృష్టి సారించే పరిష్కారాల అభివృద్ధి, పంపిణీని వేగవంతం చేయడంలో హైదరాబాద్ కేంద్రం కీలక పాత్ర పోషిస్తుందని ఆయన పేర్కొన్నారు.
KTR launches Israel-based CyberArk’s R&D facility: ఐడెంటిటీ సెక్యూరిటీ సొల్యూషన్స్ సంస్థ సైబర్ ఆర్క్ హైదరాబాద్ లో తమ కొత్త కేంద్రాన్ని ఏర్పాటు చేసింది. ఇజ్రాయెల్ వెలుపల సైబర్ ఆర్క్ ఏర్పాటు చేసిన అతిపెద్ద పరిశోధన-అభివృద్ధి కేంద్రం ఇదే కావడం గమనార్హం. సైబర్ దాడుల నుంచి రక్షణ కల్పించడంపై దృష్టి సారించే పరిష్కారాల అభివృద్ధి, పంపిణీని వేగవంతం చేయడంలో హైదరాబాద్ కేంద్రం కీలక పాత్ర పోషిస్తుందని ఐటీ, పరిశ్రమల శాఖ మంత్రి కేటీ. రామారావు (కేటీఆర్) అన్నారు.
వివరాల్లోకెళ్తే.. హైదరాబాద్ లో ఇజ్రాయెల్ కు చెందిన సైబర్ ఆర్క్ ఆర్ అండ్ డీ కేంద్రాన్ని ఐటీ మంత్రి కేటీఆర్ ప్రారంభించారు. ఈ సందర్భంగా మంత్రి మాట్లాడుతూ.. ఇజ్రాయిల్ తర్వాత సైబర్ ఆర్క్ అతిపెద్ద ఆర్ అండ్ డీ కేంద్రాన్ని హైదరాబాద్ లో ఏర్పాటు చేసిందని తెలిపారు. పెరుగుతున్న సాంకేతిక పరిజ్ఞానం వినియోగంతో డేటా అత్యంత విలువైనదిగా పేర్కొంటూ.. దాని భద్రతకు ప్రాధాన్యం పెరుగుతోందని తెలిపారు. సైబర్ ప్రపంచంలో నిజమైన యుద్ధాలు జరుగుతాయనీ, అక్కడనే దేశ మౌలిక సదుపాయాలపై దాడి జరుగుతుందని, దేశాలు ఒకదానిపై మరొకటి పైచేయి సాధించడానికి ప్రయత్నిస్తాయని అన్నారు. సైబర్ ప్రపంచంలో సంస్థలు ఒకదానిపై మరొకటి స్కోర్ చేయడానికి ప్రయత్నిస్తాయని కూడా కేటీఆర్ పేర్కొన్నారు.
దేశంలోనే ప్రత్యేక సైబర్ సెక్యూరిటీ పాలసీని తీసుకొచ్చిన తొలి రాష్ట్రం తెలంగాణ అని ఈ సందర్భంగా మంత్రి కేటీఆర్ తెలిపారు. తెలంగాణలో ప్రస్తుతం 230కి పైగా టెక్నాలజీ కంపెనీలు ఉన్నాయనీ, అవన్నీ హైదరాబాద్ నుంచే పనిచేస్తున్నాయని పేర్కొన్నారు. సురక్షితమైన, విశ్వసనీయమైన సైబర్ స్పేస్ ను సృష్టించడానికి, సైబర్ సెక్యూరిటీలో సృజనాత్మకత, వ్యవస్థాపకత, సామర్థ్యాన్ని పెంపొందించడానికి 2018లో హైదరాబాద్ లో సైబర్ సెక్యూరిటీ సెంటర్ ఆఫ్ ఎక్సలెన్స్ ను ఏర్పాటు చేశామని తెలిపారు. సైబర్ సెక్యూరిటీ ఒక సార్వత్రిక దృగ్విషయం అయినప్పటికీ, ప్రతి దేశం, ప్రతి ప్రాంతం దాని స్వంత స్థానిక సవాళ్లను కలిగి ఉంటుందన్నారు. దీనికి స్థానికీకరించిన పరిష్కారాలు అవసరమనీ, భారతీయీకరించిన పరిష్కారాల వైపు చూడటం ప్రారంభించాలని ఆయన సైబర్ ఆర్క్ ను కోరారు.
సైబర్ ఆర్క్ విస్తరణ కొత్త ఉద్యోగాలు, అవకాశాలను సృష్టిస్తుందనీ, హైదరాబాద్ లో వారి ఉనికి సైబర్ సెక్యూరిటీ నైపుణ్యానికి కేంద్రంగా నగరాన్ని స్థాపించడానికి సహాయపడుతుందని కేటీఆర్ అన్నారు. కాగా, "హైదరాబాద్ లో ఆర్ అండ్ డీ సెంటర్ ను ప్రారంభించడం అధునాతన గుర్తింపు భద్రతా ప్లాట్ ఫామ్ ను అందించాలనే సైబర్ ఆర్క్ విజన్ కు అనుగుణంగా ఉంది" అని సైబర్ ఆర్క్ చీఫ్ ప్రొడక్ట్ ఆఫీసర్ పెరెట్జ్ రెగెవ్ అన్నారు. ప్రొడక్ట్ మేనేజ్ మెంట్, ఆర్ అండ్ డీ టీమ్స్ తో పాటు సెంటర్ ఆఫ్ ఎక్సలెన్స్ ఫర్ మార్కెటింగ్ కూడా ఈ కేంద్రంలో ఉంటుందని తెలిపారు. ప్రస్తుతం 200 మంది ఉద్యోగులు ఉన్నారనీ, వీరి సంఖ్య క్రమంగా పెంచాలని యోచిస్తున్నామని తెలిపారు. "హైదరాబాద్ లో మా కొత్త కేంద్రాన్ని ఏర్పాటు చేయాలన్న నిర్ణయం వ్యూహాత్మకం. ఇది భారతదేశంలోని మా కస్టమర్లు-భాగస్వాములకు మా ప్రతిస్పందనలు-మద్దతును మెరుగుపరచడానికి మాకు మరింత సౌకర్యవంతంగా అనుమతిస్తుంది. ఇది మా గ్లోబల్ కస్టమర్ బేస్ కోసం ఇక్కడ ఏర్పాటుచేస్తున్నాం" అని ఇండియా రీజినల్ సేల్స్ డైరెక్టర్ రోహన్ వైద్య అన్నారు.
