Telangana Elections 2023: బీఆర్ఎస్ మేనిఫెస్టో ఆచరణాత్మకం, ఆచరణీయం: ఎమ్మెల్సీ కవిత
Telangana Assembly Elections 2023: ముఖ్యమంత్రి కే చంద్రశేఖర్ రావు (కేసీఆర్) విడుదల చేసిన భార‌త రాష్ట్ర స‌మితి మేనిఫెస్టో పై ఆ పార్టీ నాయకురాలు, ఎమ్మెల్సీ క‌ల్వ‌కుంట్ల కవిత ప్ర‌శంస‌లు కురిపించారు. బీఆర్ఎస్ మేనిఫెస్టో ఆచరణాత్మకం.. ఆచరణీయమంటూ కొనియాడారు. ఇప్పుడే కాదు, 2014లో ప్రభుత్వం ఏర్పడినప్పుడు కూడా ప్రజలకు హామీలు ఇవ్వడంలో బీఆర్ఎస్ ప్రభుత్వం ఎప్పుడూ ఆచరణాత్మకంగానే ఉందని కవిత అన్నారు.
 )
FollowBRS MLC Kalvakuntla Kavitha: నవంబర్ 30న జరిగే అసెంబ్లీ ఎన్నికల కోసం అధికార బీఆర్ఎస్ ప్రకటించిన మేనిఫెస్టో చాలా ఆచరణాత్మకమైనదని, ఆచరణీయమైనదని ఆ పార్టీ ఎమ్మెల్సీ క‌ల్ల‌కుంట్ల కవిత అన్నారు. ప్రజలకు వాగ్దానాలు చేయడంలో బీఆర్ఎస్ ప్రభుత్వం ఎప్పుడూ ఆచరణాత్మకంగా ఉందనీ, ఇప్పుడే కాదు, ప్రభుత్వం ఏర్పడిన 2014లో ఇదే త‌ర‌హాలో ముందుకు సాగింద‌ని చెప్పారు. 2014లో రాష్ట్రంలో విద్యుత్ లోటు ఉన్నప్పటికీ ప్రభుత్వం విద్యుత్ రంగంలో గొప్ప ఫలితాలు చూపిందని పేర్కొన్నారు. దీనికి విద్యుత్ రంగంలో కేసీఆర్ నాయ‌క‌త్వంలోని బీఆర్ఎస్ స‌ర్కారు తీసుకువ‌చ్చిన విప్ల‌వాత్మ‌క మార్పులే నిద‌ర్శ‌న‌మ‌ని పీటీఐతో అన్నారు.
పార్టీ మేనిఫెస్టోలో సంక్షేమ పథకాల కింద ప్రయోజనాలు పెరుగుతాయని హామీ ఇచ్చారనీ, రాష్ట్ర ఆర్థిక పరిస్థితిని దృష్టిలో ఉంచుకుని ఈ విధానం ఆచరణాత్మకంగా ఉందని కవిత అన్నారు. మేనిఫెస్టో ఆచరణ సాధ్యమైనందున కాంగ్రెస్, బీజేపీ రెండూ నోరు మెదపలేదన్నారు. సామాజిక భద్రత పెన్షన్ మొత్తాలను పెంచడం, రైతులకు 'రైతు బంధు' పెట్టుబడి మద్దతు పథకం కింద ఇచ్చే ఆర్థిక సహాయాన్ని పెంచడం, ఒక్కొక్కటి రూ. 400 చొప్పున ఎల్పీజీ సిలిండర్లను అందించడం వంటివి తెలంగాణలో రాబోయే అసెంబ్లీ ఎన్నికల కోసం అధికార BRS చేసిన కొన్ని వాగ్దానాలుగా ఉన్నాయి.
పార్టీ మేనిఫెస్టోను విడుదల చేస్తూ, రాష్ట్రంలో దారిద్య్ర రేఖకు దిగువన (బిపిఎల్) ఉన్న 93 లక్షల కుటుంబాలకు ఐదు లక్షల రూపాయల జీవిత బీమాను అందజేస్తామనీ, దీనికి అయ్యే ప్రీమియం ఖర్చును ప్రభుత్వమే భరిస్తుందని బీఆర్ఎస్ అధినేత, ముఖ్యమంత్రి కె చంద్రశేఖర్ రావు ఆదివారం తెలిపారు. అయితే, బీఆర్ఎస్ మేనిఫెస్టోను వేస్ట్ పేపర్ అని రాష్ట్ర కాంగ్రెస్ అధ్యక్షుడు రేవంత్ రెడ్డి అనడాన్ని బీఆర్ఎస్ నాయకురాలు కవిత తీవ్రంగా తప్పుబట్టారు. కాంగ్రెస్ ప్రకటించిన హామీలకు బీఆర్ఎస్ మేనిఫెస్టోలో ఆమోదం లభించిందని రేవంత్ రెడ్డి చెప్పడంపై ఆమె మాట్లాడుతూ గత 60 ఏళ్లలో పాత పార్టీ ఏనాడూ ప్రజల కోసం చిత్తశుద్ధితో పని చేయలేదని విమ‌ర్శించారు.
ప్రాంతీయ పార్టీలు అభివృద్ధి చేయడం ప్రారంభించిన తర్వాత, కాంగ్రెస్ ప్రాంతీయ ప్రాతిపదికన ఆలోచించవలసి వచ్చిందని ఆమె అన్నారు. కాంగ్రెస్ ఇచ్చిన ఆరు హామీలు బీఆర్ఎస్ పథకాల కాపీలే తప్ప మరేమీ కాదని ఆమె అన్నారు. అలాగే, బీఆర్ఎస్ బీజేపీకి స్ఫూర్తి అనీ, ఏన్డీయే ప్రభుత్వ ప్రధానమంత్రి కిసాన్ సమ్మాన్ నిధి బీఆర్ఎస్ ప్రభుత్వ రైతు బంధు పథకం నుండి ప్రేరణ పొందిందని ఆమె అన్నారు. విద్యార్థి ఆత్మ‌హ‌త్య‌పై స్పందిస్తూ..అవకాశాలు వస్తాయని యువత ఇలాంటి విపరీతమైన చర్యలు తీసుకోవద్దని ఆమె కోరారు. రాష్ట్ర ప్రభుత్వం ఉద్యోగ ఖాళీలను భర్తీ చేస్తున్న‌ద‌నీ, ప్రైవేట్ రంగంలో దాదాపు 30 లక్షల అవకాశాలను కల్పించిందని ఆమె తెలిపారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
