కేసీఆర్‌పై బండి సంజయ్ ఘాటు వ్యాఖ్యలు

బైంసాలో మానవ హక్కుల ఉల్లంఘన జరుగుతోందని బీజేపీ తెలంగాణ రాష్ట్ర అధ్యక్షుడు బండి సంజయ్ ఆరోపించారు.

bandi sanjay

ఆదిలాబాద్: బైంసాలో మానవ హక్కుల ఉల్లంఘన జరుగుతోందని బీజేపీ తెలంగాణ రాష్ట్ర అధ్యక్షుడు బండి సంజయ్ ఆరోపించారు.
సోమవారం నాడు ఆయన మీడియాతో మాట్లాడారు. తెలంగాణ ప్రభుత్వం ఒకే వర్గానికి కొమ్ముకాస్తోందన్నారు. హిందువులను హింసిస్తోందని ఆయన విమర్శించారు. 

పోలీసులను ఎంఐఎం చెప్పు చేతల్లో టీఆర్ఎస్ సర్కార్ పెట్టిందని ఆయన ఆరోపించారు. మహారాష్ట్ర నుండి బహిష్కరించిన వారే భైంసాలో ఉన్నారని ఆయన వ్యాఖ్యానించారు. టీఆర్ఎస్ ప్రభుత్వంపై నమ్మకం లేకనే తాము ఈ విషయాలపై గవర్నర్ కు ఫిర్యాదు చేసినట్టుగా ఆయన చెప్పారు. ప్రగతి భవన్ లోకి చొరబడి సీఎంను ప్రశ్నిస్తామని ఆయన చెప్పారు.

తెలంగాణలో బలపడేందుకు బీజేపీ తీవ్రంగా ప్రయత్నిస్తోంది. కాంగ్రెస్ సహా ఇతర పార్టీలకు చెందిన కీలక నేతలకు ఆ పార్టీ వల విసురుతోంది. ఇటీవల జరిగిన ఎన్నికల్లో వచ్చిన ఫలితాలు ఆ పార్టీలో ఉత్సాహన్ని నింపాయి. దీంతో అధికార టీఆర్ఎస్ పై బీజేపీ చీఫ్ సంజయ్ దూకుడుగా విమర్శలు గుప్పిస్తున్నారు.