హైదరాబాద్: ఇంటి నుండి బయటికి వెళ్లిన ఓ బాలిక కన్పించకుండా పోయింది. బాలిక ఉపయోగించిన సైకిల్ ను నాలా వద్ద గుర్తించారు పోలీసులు. నాలాలో బాలిక పడిపోయిందా అనే అనుమానాన్ని పోలీసులు వ్యక్తం చేస్తున్నారు. నాలాలో బాలిక కోసం పోలీసులు గాలింపు చర్యలు చేపట్టారు.

నగరంలోని నేరేడ్‌మెట్ కాకతీయ నగర్ లో తల్లిదండ్రులతో కలిసి సుమేధ కపురియా అనే బాలిక నివాసం ఉంటుంది. ఆ బాలిక వయస్సు 12 ఏళ్లు. గురువారంనాడు సాయంత్రం సైకిల్ పై బాలిక బయటకు వెళ్లింది. ఆమె ఎంతసేపటికి ఇంటికి తిరిగి రాలేదు. బాలిక ఇంటి నుండి బయటకు వెళ్లిన కొంతసేపటికి భారీ వర్షం కురిసింది.

నిన్న సాయంత్రం ఆరున్నర గంటలకు బాలిక ఇంటి నుండి వెళ్లింది. ఆ సమయంలో బాలిక తల్లి ఇంట్లో లేదు. ఆమె తల్లి ఇంటికి చేరుకొన్న తర్వాత బాలిక లేదని విషయాన్ని గుర్తించి ఆమె కోసం గాలింపు చర్యలు చేపట్టారు. వెంటనే ఆమె పోలీసులకు ఫిర్యాదు చేసింది.

దీన్ దయాళ్ నగర్ లోని నాళా వద్ద బాలిక ఉపయోగించిన సైకిల్ ను స్థానికులు గుర్తించి పోలీసులకు  సమాచారం ఇచ్చారు. నాలాలో పడిపోవడంతో ఆ బాలిక కొట్టుకుపోయిందేమోనని పోలీసులు గాలింపు చర్యలు చేపట్టారు. అయితే తన కూతురు ఎక్కడున్నా క్షేమంగాను ఉంటుందని ఆమె తల్లి అభిప్రాయపడుతోంది.