తుపాకీ, న్యూస్ పేపర్తో స్కూల్లోకి వెళ్లాడు.. ముప్పు తప్పించిన పోలీసులు
పశ్చిమ బెంగాల్లో ఓ స్కూల్లోకి తుపాకీ, న్యూస్ పేపర్తో ఓ వ్యక్తి వెళ్లాడు. అక్కడ తుపాకీని గాల్లో తిప్పుతూ పేపర్ చదివాడు. స్కూల్ యాజమాన్యం సమాచారంతో పోలీసులు అక్కడికి చేరుకుని ఆ వ్యక్తిని అదుపులోకి తీసుకున్నారు. కుటుంబ సమస్యలతో సతమతమై ఇలా ప్రవర్తించి ఉంటాడని పోలీసులు భావిస్తున్నారు.
కోల్కతా: ఓ వ్యక్తి తుపాకీ, న్యూస్ పేపర్తో స్కూల్లోకి వెళ్లాడు. ఓ క్లాస్ రూమ్లోకి వెళ్లి పేపర్ తిరగేయడం మొదలు పెట్టాడు. పేపర్ చదువుతూ మరో చేతిలోకి గన్ తీసుకుని భయభ్రాంతులకు గురి చేశాడు. క్లాస్ రూమ్ నిండా పిల్లలే ఉన్నారు. ఏ క్షణంలోనైనా వారికి ముప్పు జరిగే ప్రమాదం ఉన్నది. ఇంతలోనే అక్కడకు పోలీసులు వచ్చి ఆ వ్యక్తిని పట్టుకుని బయటకు వచ్చారు. ఎవరికీ ప్రమాదం జరగలేదు. ఈ ఘటన పశ్చిమ బెంగాల్లోని మాల్డాలో బుధవారం చోటుచేసుకుంది. ఇందుకు సంబంధించిన వీడియో కూడా సోషల్ మీడియాలో చక్కర్లు కొడుతున్నది.
పోలీసుల ప్రకారం, మాల్డాలోని మచియా చాంద్ కాలేజీలో ఈ ఘటన జరిగింది. ఓ వ్యక్తి గన్తో క్లాసు రూమ్లోకి వెళ్లి కూర్చున్నాడు. ఆ తర్వాత న్యూస్ పేపర్ చదవడం మొదలు పెట్టాడు. యాజమాన్యం వెంటనే పోలీసులకు సమాచారం ఇచ్చింది. పోలీసుల బృందం అక్కడికి వచ్చింది. ఆ వ్యక్తికి తెలియకుండా క్లాసు రూమ్లోకి పోలీసులు వెళ్లారు. వెంటనే అతన్ని బంధించారు. గన్ను మరొకరు తీసుకున్నారు. ఏ ప్రమాదం జరగకుండానే ఆ వ్యక్తిని విజయవంతంగా అదుపులోకి తీసుకోగలిగారు. ఆయన వద్ద నుంచి పెట్రోల్ బాంబులనూ స్వాధీనం చేసుకున్నట్టు తెలిసింది.
Also Read: Defamation Case: గుజరాత్ హైకోర్టులో రాహుల్ పిటిషన్.. విచారణ నుంచి తప్పుకున్న న్యాయమూర్తి
ఆ వ్యక్తి మానసిక అనారోగ్యంతో ఉన్నట్టు కొన్ని వర్గాలు తెలిపాయి. భార్య తన కొడుకును తనకు దూరం చేసి తీసుకెళ్లిందని ఇంటరాగేషన్లో ఆ వ్యక్తి పోలీసులకు తెలిపాడు. తాను పోలీసులు, ఉన్నత అధికారుల వద్దకు వెళ్లి ఫిర్యాదులు చేసినా ఫలితంగా లేకుండా పోయిందని వివరించాడు.
ఆ వ్యక్తి కుటుంబ సమస్యలతోనే ఇలా ప్రవర్తించి ఉంటాడని పోలీసులు తెలిపారు.