ముంబైలో దారుణం జరిగింది. రైల్వే స్టేషన్లో చెత్త ఏరుకునే ఓ వ్యక్తి.. ప్లాట్ ఫాం మీద నిద్రిస్తున్న ఓ మూడేళ్ల చిన్నారిని కిడ్నాప్ చేసి..తరువాత ఆ చిన్నారిపై అత్యాచారానికి పాల్పడ్డాడు.
ముంబైలో దారుణం జరిగింది. అభం శుభం తెలియని మూడేళ్ల చిన్నారిని ఓ దుర్మార్గుడు కిడ్నాప్ చేసి.. దారుణానికి పాల్పడ్డాడు. బాధితురాలి తల్లి ఫిర్యాదు మేరకు కేసు నమోదు చేసుకున్న పోలీసులు వెంటనే రంగంలోకి దిగారు. కేవలం గంటల వ్యవధిలోనే నిందితుడిని అరెస్టు చేశారు.
ఇంతకీ ఏం జరిగింది.
జల్గావ్ చెందిన ఓ మహిళ తన మూడేళ్ల కూతురితో బుధవారం రాత్రి పాన్వెల్ రైల్వే స్టేషన్లో రైలు దిగింది. అక్కడి నుంచి మరో రైలు ఎక్కి వేరే ప్రాంతానికి వెళ్లాల్సి ఉంది. అయితే.. ఆ రాత్రి కావడంతో ఆ రైల్వే స్టేషన్ ప్లాట్ ఫాం మీదే తన కూతురితో పాటు పడుకుండిపోయింది. కొంత సేపటి తర్వాత ఆ తల్లి నిద్ర లేచి, బాత్రూమ్ కోసం వెళ్లింది. తిరిగి వచ్చేసరికి.. తన చిన్నారి కనిపించకుండా పోయింది. ఆ తల్లి కంగారు కంగారుగా చుట్టు పక్కల ప్రాంతాల్లో వెతికింది. అనంతరం పాన్వెల్ గవర్న్మెంట్ రైల్వే పోలీస్లకు ఫిర్యాదు చేసింది. తన బిడ్డ కనిపించడం లేదని, తనకు సాయం చేయాలని ఆవేదన వ్యక్తం చేసింది.
వెంటనే స్పందించిన పోలీసులు.. గాలింపు చర్యలను ముమ్మరం చేశారు. పాన్వెల్ రైల్వే స్టేషన్ సమీపంలోని నిర్మానుష్య పాంత్రంలో స్పృహ కోల్పోయి పడి ఉన్న చిన్నారిని పోలీసులు గుర్తించారు. ఆ చిన్నారిపై అత్యాచారం జరిగినట్టు అనుమానించారు. వెంటనే సమీపంలోని ఆసుపత్రికి తరలించారు. మరోవైపు పోలీసులు పోక్సో చట్టం కింద కేసు నమోదు చేసుకుని, నిందితుడిని పట్టుకునే ప్రయత్నాలు మరింత ముమ్మరం చేశారు.
ఈ క్రమంలోనే స్టేషన్ లో ఉన్నసీసీటీవీ కెమెరాలను పరిశీలించారు. దీంతో నిందితుడి ఆచూకీ లభించింది. ఆ రాత్రి.. ఆ తల్లి తన కూతురిని విడిచి బాత్ రూంకి వెళ్లిన క్రమంలో ఓ దుర్మార్గుడుఅక్కడికి వెళ్లాడు. ఎవరూ లేనిది చూసి.. ఆ చిన్నారిని అపహరించాడు. అనంతరం రైల్వే స్టేషన్ కు పశ్చిమ ప్రాంతానికి తీసుకెళ్లి అత్యాచారానికి పాల్పడ్డాడు. సీసీటీవీ ఫుటేజ్ ఆధారంగా పోలీసులు గురువారం సాయంత్రానికే నిందితుడిని పట్టుకున్నారు.
నిందితుడిని ముకేశ్ కుమార్ బాబు (30). రైల్వే స్టేషన్లలో చెత్త ఏరుకుంటూ ఉంటాడు. సియాన్- పాన్వెల్ హైవేకు చెందిన కలంబోలి ఫ్లైఓవర్ కింద జీవిస్తూ ఉంటాడు. కాగా.. అతడిని జుయ్నగర్ రైల్వే స్టేషన్ పరిధిలో పోలీసులు అరెస్ట్ చేశారు.చిన్నారి ఇంకా ఆసుపత్రిలో ఉన్నట్టు సమాచారం. ప్రమాదం నుండి బయటపడింది. ఆమెకు గాయాలయ్యాయని పన్వెల్ రైల్వే ప్రొటెక్షన్ ఫోర్స్ (RPF)కి చెందిన జస్బీర్ రాణా తెలిపారు.
