దేశంలోకి ఒమిక్రాన్‌ ‘ఎక్స్‌ఈ’ వేరియంట్‌ ప్రవేశించినట్లు వస్తోన్న వార్తల నేపథ్యంలో కేంద్ర ప్రభుత్వం అలర్ట్ అయ్యింది. దేశవ్యాప్తంగా 18 ఏళ్లు పైబడిన వారికి కరోనా వైరస్ ప్రికాషన్ డోస్ ఇచ్చేందుకు కేంద్ర ప్రభుత్వం గ్రీన్ సిగ్నల్ ఇచ్చింది.

దేశవ్యాప్తంగా 18 ఏళ్లు పైబడిన వారికి కరోనా వైరస్ ప్రికాషన్ డోస్ (precaution dose) ఇచ్చేందుకు కేంద్ర ప్రభుత్వం గ్రీన్ సిగ్నల్ ఇచ్చింది. ఈ నెల 10 నుంచి ప్రైవేట్ కేంద్రాల్లో ప్రికాషన్ డోస్ పంపిణీ చేస్తున్నట్లు తెలిపింది. 18 సంవత్సరాలను దాటిన వారు సెకండ్ డోస్ తీసుకున్న 9 నెలల పూర్తి చేసుకున్న తర్వాత బూస్టర్ డోస్ (booster dose) తీసుకునేందుకు అర్హులు. 

ఇప్పటి వరకు దేశంలో 15 ఏళ్లు పైబడిన 96 శాతం మంది కనీసం ఒక డోస్ వ్యాక్సిన్‌ని తీసుకున్నారు. ఇదే సమయంలో 15 ఏళ్లు దాటిన వారిలో 83 శాతం మంది రెండు డోసుల వ్యాక్సిన్‌ తీసుకున్నారు. హెల్త్‌కేర్ వర్కర్స్, ఫ్రంట్‌లైన్ వర్కర్స్‌తో పాటు 60 ఏళ్లు దాటిన జనాభాలో 2.4 కోట్ల మందికి ప్రికాషన్ డోస్ అందించారు. 12 నుంచి 14 ఏళ్ల వయస్సు గల వారిలో 45 శాతం మంది కూడా ఫస్ట్ డోస్‌ను తీసుకున్నట్లు కేంద్రం తెలిపింది. 

మరోవైపు .. ఒమిక్రాన్ ఉప వేరియంట్ల హైబ్రిడ్ వేరియంట్ ‘‘ఎక్స్ఈ వేరియంట్’’ (omicron xe variant) మన దేశంలోకి ప్రవేశించిందన్న వార్తలను కేంద్ర ప్రభుత్వం ఇటీవల ఖండించింది. ఆ కథనాల్లో వాస్తవం లేదని కొట్టిపారేసింది. కేంద్ర ఆరోగ్య, కుటుంబ సంక్షేమ శాఖ పరిధిలోని ఇండియన్ సార్స్ కోవ్ 2 కన్సార్టియం ఆన్ జీనోమిక్స్(ఇన్సాకాగ్) అధ్యయనాన్ని ఉటంకిస్తూ.. ముంబయిలో కొత్త వేరియంట్ నమోదైందన్న వార్తలు అవాస్తవాలని పేర్కొంది. ఫిబ్రవరిలో దక్షిణాఫ్రికా నుంచి వచ్చిన ఓ 50 ఏళ్ల మహిళలో ఈ కొత్త వేరియంట్ సోకిందని బృహన్‌ముంబయి మున్సిపల్ కార్పొరేషన్ ఈ రోజు ప్రకటించిన సంగతి తెలిసిందే. ఈ ప్రకటన వెలువడిన గంటల వ్యవధిలోనే కేంద్ర ఆరోగ్య శాఖ స్పందిస్తూ ఆ వార్తను ఖండించింది.

ఒమిక్రాన్ వేరియంట్ ఉప వేరియంట్లు అయినా బీఏ.1, బీఏ.2 వేరియంట్లతో ఏర్పడ్డ హైబ్రీడ్ వేరియంటే ఈ ఎక్స్ఈ వేరియంట్. ప్రపంచంలో ప్రస్తుతం మూడు హైబ్రిడ్ వేరియంట్లు ఉనికిలో ఉన్నట్టు చర్చ జరుగుతున్నది. ఈ ఎక్స్ఈ వేరియంట్ ఇతర అన్ని కరోనా వేరియంట్ల కంటే కూడా అత్యధిక వేగంతో వ్యాపిస్తుందని ప్రపంచ ఆరోగ్య సంస్థ ఇటీవలే వెల్లడించింది. ఆ మహిళకు సంబంధించి ఫాస్ట్‌క్యూ ఫైల్స్‌ను ఇన్సాకాగ్ నిపుణులు పరిశీలించారని కేంద్ర ఆరోగ్య శాఖ తెలిపింది. ఎక్స్ఈ వేరియంట్ జీనోమిక్ పిక్చర్‌తో ఆమె శాంపిల్‌లోని జీనోమిక్ కణాలు సరిపోలడం లేదని తేలినట్టు వివరించింది.

తొలి వైరస్‌తోపాటు డెల్టా, ఒమిక్రాన్ వేరియంట్లు ప్రపంచ దేశాలను గడగడలాడించాయి. అయితే, ఈ వేరియంట్లతోపాటు ఇప్పుడు ఉప వేరియంట్ల హైబ్రిడ్‌లు కలకలం రేపుతున్నాయి. ప్రస్తుతం మూడు హైబ్రిడ్ వేరియంట్లు ఉనికిలో ఉన్నట్టు చర్చ ఉన్నది. డెల్టా, ఒమిక్రాన్‌లకు చెందిన ఉప వేరియంట్ల హైబ్రిడ్ వేరియంట్లు రెండు ఉన్నాయి. కేవలం ఒమిక్రాన్ ఉపవేరియంట్లు బీఏ.1, బీఏ.2 వేరియంట్లకు సంబంధించిన హైబ్రిడ్ వేరియంట్ ఒకటి(ఎక్స్‌ఈ వేరియంట్) ఉన్నది. ఒమిక్రాన్ వేరియంట్‌కు చెందిన రెండు ఉపవేరియంట్ల హైబ్రిడ్ వేరియంటే.. ఈ ఎక్స్‌ఈ వేరియంట్.