భారత్‌లో ఒకే దేశం-ఒకే ఎన్నికపై బీహార్ బీజేపీ అధికార ప్రతినిధి, హైకోర్టు న్యాయవాది కుంతల్ కృష్ణ తన అభిప్రాయాలను వ్యక్తం చేశారు. ఇందుకు సంబంధించి ఆయన ఏమన్నారో ఇప్పుడు తెలుసుకుందాం.. 

కుంతల్ కృష్ణ

One Nation-One Election:  భారత్, ప్రపంచంలోనే అతిపెద్ద ప్రజాస్వామ్యం, ప్రజాస్వామ్య విలువలు, పాలనకు చిహ్నం. 'ఒకే దేశం, ఒకే ఎన్నిక' అనేది దేశవ్యాప్తంగా లోక్‌సభ (పార్లమెంటు దిగువ సభ), రాష్ట్రాల అసెంబ్లీలకు, అధ్యక్ష పదవికి ఒకేసారి ఎన్నికలు నిర్వహించే ప్రతిపాదన. ఈ భావన చర్చకు దారితీసినప్పటికీ, భారతదేశ ప్రజాస్వామ్య వ్యవస్థను మెరుగుపరచడానికి దీనిలోని మంచి విషయాలు, సామర్థ్యాన్ని పరిగణనలోకి తీసుకోవడం చాలా ముఖ్యం.

సమర్థత, ఖర్చు తగ్గడం:

'ఒకే దేశం, ఒకే ఎన్నిక' నమూనాకు ఉన్న బలమైన వాదనల్లో ఒకటి గణనీయంగా ఖర్చు తగ్గే అవకాశం ఉండడం. ప్రస్తుతం, భారతదేశం అనేక స్థాయిల్లో ఎన్నికలు నిర్వహిస్తోంది. లోక్‌సభ, రాష్ట్రాల అసెంబ్లీలు, స్థానిక సంస్థలకు వేర్వేరు సమయాల్లో, తరచుగా అనేక దశల్లో ఎన్నికలు జరుగుతున్నాయి. ప్రతి ఎన్నికలో ఎన్నికల సంఘం, ప్రభుత్వం, వివిధ రాజకీయ పార్టీలకు గణనీయమైన ఆర్థిక వ్యయం అవుతుంది. ఎన్నికలను ఒకేసారి నిర్వహించడం ద్వారా, దేశం లాజిస్టిక్స్, సిబ్బంది, భద్రత, పరిపాలనా ఖర్చులను ఆదా చేయవచ్చు. తద్వారా ఇతర అభివృద్ధి కార్యక్రమాల కోసం నిధులను విడుదల చేయవచ్చు. అంతేకాకుండా ఎప్పుడూ ఎన్నికల వాతావరణం ఉండడం వల్ల ప్రజల్లో ఎన్నికల పట్ల విముఖతను కలిగిస్తుంది. ఎన్నికలు వేర్వేరుగా జరిగినప్పుడు, రాజకీయ ప్రచారాలు నెలల తరబడి ప్రజల జీవితాలపై ప్రభావం చూపుతాయి. ఇది పాలనకు ఆటంకం కలిగిస్తుంది, ముఖ్యమైన సమస్యల నుంచి దృష్టిని మరల్చుతుంది. 'ఒకే ఎన్నిక' ఈ పునరావృతమయ్యే చక్రాన్ని తొలగిస్తుంది. ఎన్నికలకు బదులుగా పాలనపై దృష్టి పెట్టడానికి ప్రభుత్వానికి వీలు కల్పిస్తుంది.

రాజకీయ స్థిరత్వం

'ఒకే దేశం, ఒకే ఎన్నిక' వల్ల రాజకీయ స్థిరత్వం పెరుగుతుంది. జాతీయ, రాష్ట్ర ప్రభుత్వాల మధ్య మరింత సమన్వయం ఏర్పడుతుంది. దీనివల్ల ప్రభుత్వ విధానాలు, కార్యక్రమాలు సజావుగా అమలవుతాయి.

అంతేకాకుండా, 'ఒకే దేశం, ఒకే ఎన్నిక' రాజకీయ పార్టీలకు అవకాశవాద రాజకీయాల్లో పాల్గొనే అవకాశాన్ని తగ్గిస్తుంది. ఎన్నికలు వేర్వేరుగా జరిగినప్పుడు, రాజకీయ నాయకులు తరచుగా రాష్ట్ర-నిర్దిష్ట సమస్యలను ఉపయోగించుకుంటారు. విభేదాలు సృష్టించడం, ప్రాంతీయ భావాలను రెచ్చగొట్టడం వంటి వ్యూహాలను ఉపయోగిస్తారు. ఒకేసారి ఎన్నికలు నిర్వహించడం ద్వారా రాజకీయ పార్టీలు జాతీయ, ప్రాంతీయ అభివృద్ధి సమస్యలపై దృష్టి పెట్టేలా ఒత్తిడి చేయవచ్చు. దీనివల్ల విధానం, అభివృద్ధి, పాలనపై మరింత అర్థవంతమైన, దేశవ్యాప్త చర్చకు అవకాశం ఉంటుంది.

మెరుగైన ఓటింగ్ శాతం జాతీయ ఎన్నికలతో పోలిస్తే రాష్ట్ర, స్థానిక ఎన్నికల్లో ఓటర్ల శాతం తక్కువగా ఉందని గణాంకాలు చెబుతున్నాయి. ఇది ఎన్నికలు పునరావృతం కావడం, ఓటర్లలో కూడా వ్యతిరేకత ఎదురయ్యే అవకాశాలు ఉంటాయి.  అయితే, ఎన్నికలను ఏకీకృతం చేయడం వల్ల ఓటర్ల భాగస్వామ్యం పెరిగే అవకాశం ఉంది. అన్ని ఎన్నికలు ఒకేసారి జరిగితే, ఓటర్లు ప్రజాస్వామ్య ప్రక్రియలో పాల్గొనడానికి, తమ ఓటు హక్కును వినియోగించుకోవడానికి ఎక్కువ అవకాశం ఉంటుంది. ఇది భారతదేశ ప్రజాస్వామ్యాన్ని బలోపేతం చేయడానికి దోహదం చేస్తుంది.

ఎన్నికల అంతరాయం తగ్గింపు

నిత్యం ఎన్నికలు ఉండడం కారణంగా ప్రజల రోజువారీ జీవితానికి అంతరాయం కలుగుతుంది. ఎన్నికల సమయంలో, రాజకీయ పార్టీలు, అభ్యర్థులు ప్రచారంపై దృష్టి పెడతారు. దీనివల్ల రాజకీయ ర్యాలీలు, సెలవులు, సాధారణ కార్యకలాపాలకు అంతరాయం కలుగుతుంది. వివిధ ప్రాంతాల్లో ఎన్నికల కోసం శాంతిభద్రతల పరిరక్షణ అవసరం కావడం వల్ల భద్రతా దళాలపై కూడా ఒత్తిడి పెరుగుతుంది. ఒకే సమయంలో ఎన్నికలు నిర్వహించడం వల్ల ప్రజల జీవితాల్లో అంతరాయం తగ్గుతుంది. మరింత కేంద్రీకృత ఎన్నికల ప్రక్రియ కోసం నిధులను కేటాయించవచ్చు.

సవాళ్లు, ఆందోళనలు

'ఒకే దేశం, ఒకే ఎన్నిక' వల్ల ప్రయోజనాలు ఉన్నప్పటికీ, కొన్ని సవాళ్లను పరిగణనలోకి తీసుకోవాలి. ఉదాహరణకు, దీనికి ముఖ్యమైన రాజ్యాంగ సవరణలతో పాటు రాజకీయ పార్టీలు, ఎన్నికల సంఘంతో ఇతర సంస్థల మధ్య సమన్వయం అవసరం.

సవాళ్లు ఉన్నప్పటికీ, 'ఒకే దేశం, ఒకే ఎన్నిక' అనేది భారతదేశ ప్రజాస్వామ్య ప్రక్రియల సామర్థ్యాన్ని, వ్యయ ప్రభావాన్ని, రాజకీయ స్థిరత్వాన్ని మెరుగుపరచడానికి చాలా ఆశాజనకంగా ఉంది. ఎన్నికల ఫ్రీక్వెన్సీని తగ్గించడం, ప్రాంతీయ విభజన ప్రభావాన్ని తగ్గించడం, జాతీయ ఐక్యతను ప్రోత్సహించడం ద్వారా, ఈ వ్యవస్థ మరింత క్రమబద్ధమైన, సమర్థవంతమైన పాలనా నిర్మాణాన్ని అందిస్తుంది. భారతదేశం ఒక ప్రపంచ శక్తిగా అభివృద్ధి చెందుతున్నందున, ఈ భావనను స్వీకరించడం ప్రజాస్వామ్యాన్ని మరింత బలోపేతం చేయడానికి, పౌరులకు అందుబాటులోకి తీసుకురావడానికి ఒక ముఖ్యమైన ముందడుగు కావచ్చు.

(ఈ వ్యాసం రచయిత పరిపాలనా సంస్కరణల నిపుణులు, భారతీయ జనతా పార్టీ బీహార్ రాష్ట్ర అధికార ప్రతినిధి.)