12 ఏళ్లలో నక్సల్స్ హింస 77 శాతం తగ్గింది - లోక్ సభలో కేంద్ర ప్రభుత్వం

దేశంలో గడిచిన 12 ఏళల్లో నక్సల్స్ హింసాకాండ గణనీయంగా తగ్గిందని కేంద్ర ప్రభుత్వం స్పష్టం చేసింది. ఈ విషయాన్ని కేంద్ర హోం శాఖ సహాయ మంత్రి నిత్యానంద రాయ్ లోక్ సభకు తెలియజేశారు. 2022లో 45 జిల్లాల్లో 176 పోలీస్ స్టేషన్లలో మాత్రమే హింసాత్మక ఘటనలు చోటుచేసుకున్నాయని పేర్కొన్నారు.  

naxals

గత 12 ఏళ్లలో భారతదేశంలో మావోయిస్టుల హింసాకాండ 77 శాతం తగ్గిందని కేంద్ర ప్రభుత్వం లోక్ సభకు తెలిపింది. అలాగే ఇలాంటి ఘటనల్లో మృతుల సంఖ్య తగ్గిందని పేర్కొంది. లోక్ సభలో ఓ సభ్యుడు అడిగిన ప్రశ్నకు కేంద్ర హోంశాఖ సహాయ మంత్రి నిత్యానంద రాయ్ లిఖితపూర్వక సమాధానం ఇచ్చారు. నక్సలైట్ మిలిటెన్సీకి సంబంధించి భౌగోళికంగా హింసాత్మక వ్యాప్తి గణనీయంగా తగ్గిందని, 2022లో 45 జిల్లాల్లో 176 పోలీస్ స్టేషన్లలో మాత్రమే హింసాత్మక ఘటనలు చోటుచేసుకున్నాయని ఆయన చెప్పారు.

2010లో 96 జిల్లాల్లోని 465 పోలీసు స్టేషన్లలో వామపక్ష తీవ్రవాద-సంబంధిత హింసాకాండ నమోదైందని మంత్రి తెలిపారు. నక్సలైట్ల తిరుగుబాటుకు సంబంధించిన మరణాల సంఖ్య (భద్రతా బలగాలు, పౌరులు) 2010లో ఆల్ టైమ్ గరిష్ఠ స్థాయి 1005 నుండి 2022 నాటికి 98కి తగ్గిందని పేర్కొన్నారు. 

నక్సల్స్ సమస్యను సమగ్రంగా పరిష్కరించడానికి భారత ప్రభుత్వం 2015 లో ‘ఎల్ డబ్ల్యూఈ పరిష్కరించడానికి జాతీయ విధానం, కార్యాచరణ ప్రణాళిక’ఆమోదించిందని రాయ్ చెప్పారు. భద్రతా సంబంధిత చర్యలు, అభివృద్ధి జోక్యాలు, స్థానిక సమాజాల హక్కులు, అర్హతలను నిర్ధారించడం మొదలైన వాటితో కూడిన బహుముఖ వ్యూహాన్ని ఈ విధానం భావిస్తుందని తెలిపారు. ఈ విధానాన్ని పకడ్బందీగా అమలు చేయడం వల్ల దేశవ్యాప్తంగా నక్సల్స్ హింస క్రమంగా తగ్గుముఖం పట్టిందని చెప్పారు.

జార్ఖండ్ లో భద్రతా పరిస్థితి కూడా గణనీయంగా మెరుగుపడిందని, రాష్ట్రంలో ప్రస్తుతం ఉన్న భద్రతా శూన్యతను దాదాపుగా భర్తీ చేశామని ఆయన మంత్రి తెలిపారు. బుర్హా పహర్, పశ్చిమ సింగ్భూబ్ లోని ట్రై జంక్షన్ ప్రాంతం, సరైకెలా-ఖర్సావన్, ఖుంటి, పరస్నాథ్ హిల్స్ వంటి ప్రాంతాలు శిబిరాల ఏర్పాటు, భద్రతా దళాల నిరంతర ఆపరేషన్ల ద్వారా మావోయిస్టుల ఉనికి నుంచి విముక్తి పొందాయని పేర్కొన్నారు. ఆ రాష్ట్రంలో 2009లో అత్యధికంగా 742 హింసాత్మక ఘటనలు జరగ్గా.. 2022 నాటికి 132కు 82 శాతం తగ్గాయని తెలిపారు. జార్ఖండ్ లోని ఎస్ఆర్ఈ జిల్లాల సంఖ్య కూడా 2018 లో 19 నుండి 2021 లో 16 కు తగ్గిందని చెప్పారు.

కేంద్ర హోం మంత్రిత్వ శాఖ (ఎంహెచ్ఏ) వివిధ పథకాలు, చొరవల ద్వారా ఎల్ డబ్ల్యూఈ ప్రభావిత రాష్ట్రాల సామర్థ్యాన్ని పెంపొందించడానికి కేంద్ర ప్రభుత్వం సహాయాన్ని అందిస్తుందని రాయ్ తెలియజేశారు. నక్సల్స్ ప్రభావిత ప్రాంతాల్లో రోడ్డు నెట్ వర్క్ విస్తరణ, టెలికమ్యూనికేషన్ల మెరుగుదల, విద్యా సాధికారత, ఆర్థిక సమ్మిళితంపై ప్రత్యేక దృష్టి సారించిందని చెప్పారు. ఎల్ డబ్ల్యూఈ ప్రభావిత ప్రాంతాల్లో ఈ పథకాలు సక్రమంగా అమలయ్యేలా చూడటం కోసం కేంద్ర హోం మంత్రిత్వ శాఖ అన్ని భారత ప్రభుత్వ మంత్రిత్వ శాఖలతో సమన్వయంగా పని చేస్తోందని పేర్కొన్నారు. 

నక్సల్స్ పరిస్థితిని సమీక్షించడానికి కేంద్ర హోం మంత్రి క్రమం తప్పకుండా సమీక్షా సమావేశాలు నిర్వహిస్తారని రాయ్ చెప్పారు. వివిధ పథకాల కింద పనులను త్వరితగతిన పూర్తి చేయడానికి, పర్యవేక్షించడానికి ఇతర సీనియర్ అధికారుల సమావేశాలు, సందర్శనలు జరుగుతున్నాయని తెలిపారు.