కరెంట్ బిల్లు రూ. 3,419 కోట్లు.. షాక్‌తో హాస్పిటల్ పాలైన ఇంటి యజమాని.. ఎక్కడంటే?
మధ్యప్రదేశ్‌లో ఓ ఇంటికి కరెంట్ బిల్లు వేల కోట్లల్లో వచ్చింది. జులై నెల కరెంట్ బిల్లు రూ. 3,419 కోట్లు రావడంతో ఇంటి యజమాని షాక్ తిన్నారు. మంచంపట్టేశారు. ఆ తర్వాత హాస్పిటల్ తీసుకెళ్లాల్సి వచ్చింది. ఇది హ్యూమన్ ఎర్రర్ అని, పొరపాటును సరి చేశామని విద్యుత్ శాఖ అధికారులు తెలిపారు.
భోపాల్: ఇటీవలి కాలంలో కరెంట్ బిల్లుల షాక్‌లు ఎక్కువగా వస్తున్నాయి. తెలుగు రాష్ట్రాల్లోనూ కొన్ని చోట్లా అసాధారణ రీతిలో బారీ బిల్లులు రావడం.. ఆ బిల్లులు చూసి సదరు ఇంటివారు ఖంగుతినడం వంటి వార్తలు చూశాం. అయితే, మధ్యప్రదేశ్‌లో మరీ దారుణంగా ఒక్క నెల కరెంట్ బిల్లు ఏకంగా వేల కోట్లల్లో రావడం చూసి ఆ ఇంటి యజమాని మంచం పట్టు పట్టాడు.
గ్వాలియర్ జిల్లా శివ్ విహార్ కాలనీ నివాసి సంజీవ్ కంకనే.. ప్రియాంక గుప్తాలు భార్య భర్తలు. వారిది ఉమ్మడి కుటుంబం. అందరి లాగే వారికి కూడా జులై నెలలో వినియోగించిన విద్యుత్‌కు బిల్లు వచ్చింది. ఆ బిల్లు చూస్తే ఎవ్వరైనా నోరెళ్లబెట్టక తప్పదు మరీ. వారికి రూ. 3,419 కోట్ల కరెంట్ బిల్లు వచ్చింది. ఈ బిల్లును సంజీవ్ కంకనే తండ్రి చూశాడు. కరెంట్ బిల్లు రశీదుపై ఆ బిల్లు అంకెలను చూసి ఆయన మూర్చపోయినంత పని చేశాడు. బిల్లు చూసిన తర్వాత ఆయనకు జ్వరం వచ్చేసింది. వెంటనే ఆయనను సమీప హాస్పిటల్‌కు తరలించారు.
మధ్యప్రదేశ్ మధ్య క్షేత్ర విద్యుత్ వితరణ్ కంపెనీ (ఎంపీఎంకేవీవీసీ) ఈ నెల 20వ తేదీన బిల్లులు జెనరేట్ చేసింది. ఈ విషయం ఎంపీఎంకేవీవీసీ ఉన్నత అధికారులకు తెలిసింది. వెంటనే వారు నష్టనివారణ చర్యలు చేపట్టారు. ఎంపీఎంకేవీవీసీ పోర్టల్‌లో సరైన బిల్లు అప్‌డేట్ చేశారు. ఎంపీఎంకేవీవీసీ జనరల్ మేనేజర్ నితిన్ మాంగ్లిక్ ఇది హ్యుమన్ ఎర్రర్‌గా పేర్కొన్నారు. బాధ్యులైన ఉద్యోగులపై చర్యలు తీసుకుంటామని వివరించారు.
ఓ ఉద్యోగి సాఫ్ట్‌వేర్‌లో వినియోగించిన యూనిట్లు ఎంటర్ చేయాల్సిన ప్లేస్‌లో కన్జ్యూమర్ నెంబర్‌ను ఎంటర్ చేశారని, అందుకే అంత పెద్ద మొత్తంలో బిల్లు జెనరేట్ అయిందని వివరించారు. సరైన బిల్లు కేవలం రూ. 1,300 అని తెలిపారు. ఈ బిల్లును సదరు వినియోగదారుడికి ఇష్యూ చేశామని చెప్పారు.
తమకు వచ్చిన బిల్లును ఎంపీఎంకేవీవీసీ పోర్టల్‌లో సరి చూశామని, సరైన బిల్లు అక్కడ అప్‌డేట్ అయినట్టు తమకు కనిపించిందని వినియోగదారుడు సంజీవ్ కంకనే తెలిపారు.
ఈ పొరపాటును సరిదిద్దినట్టు రాష్ట్ర విద్యుత్ శాఖ మంత్రి ప్రద్యుమన్ సింగ్ తోమర్ తెలిపారు. బాధ్యులైన ఉద్యోగిపై చర్యలు తీసుకుంటున్నామని వివరించారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
