ఫలించిన మెహబూబా ముఫ్తీ న్యాయ పోరాటం
జమ్మూ కాశ్మీర్ మాజీ ముఖ్యమంత్రి మెహబూబా ముఫ్తీకి పదేళ్ల చెల్లుబాటుతో పాస్‌పోర్ట్ జారీ చేయబడింది. ఢిల్లీ హైకోర్టులో సుదీర్ఘ న్యాయ పోరాటం తర్వాత మెహబూబా పాస్‌పోర్టును అందుకున్నారు. మెహబూబా ముఫ్తీ పాస్ పోర్టు కాలపరిమితి 2019లో ముగిసింది.అప్పటి నుండి ఆమె దానిని పునరుద్ధరించాలని కోరుతోంది.
పీడీపీ అధ్యక్షురాలు, జమ్మూ కాశ్మీర్ మాజీ ముఖ్యమంత్రి మెహబూబా ముఫ్తీ పోరాటం ఫలించింది. సుధీర్ఘ న్యాయ విచారణ అనంతరం ఆమెకు సాధారణ పాస్‌పోర్ట్ జారీ చేయబడింది. మెహబూబా ముఫ్తీ పాస్ పోర్టు కోసం మూడేళ్లకు పైగా న్యాయ పోరాటం చేసింది. ఈ పోరాటం అనంతరం.. 10 సంవత్సరాల చెల్లుబాటుతో సాధారణ పాస్‌పోర్ట్ జారీ చేయబడింది. మెహబూబా ముఫ్తీపై ప్రతికూల ఆరోపణలు రావడంతో 2019 లో ఆమె పాస్‌పోర్ట్‌ను పునరుద్ధరించడానికి అధికారులు నిరాకరించారు. దీంతో ఆమె ఢిల్లీ హైకోర్టును ఆశ్రయించారు. ఈ క్రమంలో ఆమె పిటిషన్ పై సుధీర్ఘ వాదనాలు జరిగాయి. ఈ క్రమంలో ఢిల్లీ హైకోర్టు కీలక ఆదేశాలు జారీ చేసింది. పీడీపీ చీఫ్‌కి కొత్త పాస్ పోర్టు జారీ చేయడంపై మూడు నెలల్లోగా నిర్ణయం తీసుకోవాలని సంబంధిత అధికారులను ఢిల్లీ హైకోర్టు ఈ ఏడాది మార్చిలో ఆదేశాలు జారీ చేసింది.
మరోవైపు.. మెహబూబా ముఫ్తీకి సాధారణ ప్రయాణ పత్రం (పాస్ పోర్టు) జారీ చేయాలని ఆమె కుమార్తె జమ్మూ కాశ్మీర్ హైకోర్టును కూడా ఆశ్రయించింది. ఆమె చేసిన విజ్ఞప్తిపై ఈ వారంలో విచారణ జరగనున్నది. ఇంతలోనే ఆమె కొత్త పాస్‌పోర్ట్‌ను పొందారు. జమ్మూ కాశ్మీర్ హైకోర్టులో చేసిన పిటిషన్‌లో మెహబూబా కుమార్తె ఇల్తిజా తన ఉన్నత విద్యను సులభతరం చేయడానికి రెండు సంవత్సరాల పరిమిత చెల్లుబాటుతో నిర్దిష్ట పాస్‌పోర్ట్‌ను ఇవ్వాలని, పాస్‌పోర్ట్ కార్యాలయం తీసుకున్న నిర్ణయాన్ని సవాలు చేసింది. ఇల్తిజా షరతులతో కూడిన పాస్ పోర్టు తీసుకోవడానికి నిరాకరించింది. అన్ని దేశాలకు వెళ్లే వీలుగా 10 సంవత్సరాల చెల్లుబాటుతో సాధారణ పాస్‌పోర్ట్ జారీ చేయాలని హైకోర్టును ఆశ్రయించింది. తాజాగా మెహబూబాకు ఇచ్చిన కొత్త పాస్‌పోర్ట్ జూన్ 1, 2023 నుండి మే 31, 2033 వరకు చెల్లుతుంది.
కొత్త పాస్‌పోర్ట్ జారీకి సంబంధించి తన అప్పీల్‌పై ముందస్తు నిర్ణయం తీసుకునేలా పాస్‌పోర్ట్ అధికారులను ఆదేశించాలని కోరుతూ మెహబూబా దాఖలు చేసిన పిటిషన్‌పై కోర్టు ఈ ఆదేశాలు ఇచ్చింది. ఢిల్లీ హైకోర్టులో ఆమె చేసిన పిటిషన్‌లో జమ్మూ కాశ్మీర్ మాజీ ముఖ్యమంత్రి రిమైండర్‌లు ఉన్నప్పటికీ ఆమెకు కొత్త పాస్‌పోర్ట్ జారీ చేయడంలో గణనీయమైన జాప్యం జరుగుతోందని, ఆమె అప్పీల్‌పై ఎటువంటి నిర్ణయం తీసుకోవడం లేదని అన్నారు. ఈ అప్పీల్‌పై మార్చి 2న ఉత్తర్వులు జారీ అయ్యాయని, ఈ విషయాన్ని పునఃపరిశీలన కోసం J&Kలోని పాస్‌పోర్ట్ అధికారికి పంపామని కేంద్ర ప్రభుత్వం తరపు న్యాయవాది కోర్టుకు తెలియజేశారు.
ఈ ఏడాది ఫిబ్రవరిలో మెహబూబా తన 80 ఏళ్ల తల్లిని మక్కాకు తీర్థయాత్రకు తీసుకెళ్లడానికి గత మూడేళ్లుగా ఎదురుచూస్తున్నానని, పాస్‌పోర్ట్ జారీ కోసం విదేశాంగ మంత్రి ఎస్ జైశంకర్ జోక్యాన్ని కోరింది. మార్చి 2021లో జమ్మూ కాశ్మీర్ పోలీసులు ప్రతికూల నివేదికను ఉదహరించిన తర్వాత మెహబూబా,ఆమె తల్లి గుల్షన్ అరా పాస్‌పోర్ట్‌లను తిరస్కరించారు. ఆమె తల్లికి రెండు నెలల క్రితమే పాస్‌పోర్టు వచ్చింది. నేషనల్ కాన్ఫరెన్స్ ప్రెసిడెంట్, జమ్మూ కాశ్మీర్ మాజీ ముఖ్యమంత్రి ఫరూక్ అబ్దుల్లా మెహబూబాను అభినందించారు. ఇప్పుడు ఆమె కోరుకున్నట్లుగా ఆమె తన మతపరమైన విధులను నిర్వర్తించగలరని ఆశాభావం వ్యక్తం చేశారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
