New Delhi: ఢిల్లీ ఎక్సైజ్ పాలసీ కేసులో ఆప్ నాయ‌కుడు, మాజీ మంత్రి మనీశ్ సిసోడియాను ఎన్‌ఫోర్స్‌మెంట్ డైరెక్టరేట్ (ఈడీ) రెండోసారి ప్రశ్నించింది. అంత‌కుముందు మార్చి 7న జరిగిన మొదటి విడత విచారణ సుమారు 5 గంటల పాటు సాగింది. 

Delhi Excise Policy Case: ఢిల్లీ ఎక్సైజ్ పాలసీలో అవకతవకలకు సంబంధించి మనీ లాండరింగ్ కేసులో మాజీ ఉపముఖ్యమంత్రి, ఆప్ నాయకుడు మనీశ్ సిసోడియాను ఎన్‌ఫోర్స్‌మెంట్ డైరెక్టరేట్ (ఈడీ) ప్ర‌శ్నించింది. తీహార్ జైలులో ఉన్న ఆయ‌న‌ను గురువారం రెండో సారి ప్ర‌శ్నిస్తోంది. అంత‌కుముందు మార్చి 7న జరిగిన మొదటి విడత విచారణ సుమారు 5 గంటల పాటు సాగింది. ఆప్ నేతను ప్రశ్నించేందుకు ఫెడరల్ దర్యాప్తు సంస్థ స్థానిక కోర్టు అనుమతి పొందింది. ప్రస్తుతం జ్యుడీషియల్ కస్టడీలో ఉన్న తీహార్ జైలులోని సెల్ నంబర్ 1లో ఈడీ ఆయనను ప్రశ్నించింది. 2021-22 సంవత్సరంలో తీసుక‌వ‌చ్చిన‌, ఇప్పుడు రద్దు చేసిన ఢిల్లీ మద్యం పాలసీ రూపకల్పన, అమలులో జరిగిన అవినీతికి సంబంధించి జాతీయ ద‌ర్యాప్తు సంస్థ (సీబీఐ) ఫిబ్రవరి 26 న సిసోడియాను అరెస్టు చేసింది.

రెండో విడత విచారణలో కోర్టుకు సమర్పించిన చార్జిషీట్ లో తన వద్ద ఉన్న మొబైల్ ఫోన్లను మార్చడం, వాటిని నాశనం చేయడం వంటి అభియోగాలకు సంబంధించి ఆయనను ప్రశ్నించే అవకాశం ఉంది. ఢిల్లీ ఎక్సైజ్ మంత్రిగా ఆయన అనుసరించిన విధాన నిర్ణయాలు, వివిధ క్ర‌మాల్లో తీసుకున్న చ‌ర్య‌ల‌ గురించి కూడా ఈడీ ఆయనను ప్రశ్నించనుందని స‌మాచారం. 

ఢిల్లీ ఎక్సైజ్ పాలసీ కుంభకోణం..

ఢిల్లీ ప్రభుత్వం 2021-2022 ఎక్సైజ్ పాలసీ ద్వారా లంచాలు ఇచ్చిన కొంతమంది డీలర్లకు అనుకూలంగా వ్యవహరిస్తోందని ఆరోపణలు వచ్చాయి. ఈ ఆరోపణలను ఆప్ తీవ్రంగా ఖండించింది. అయితే, ఈ విధానాన్ని ర‌ద్దు చేసిన త‌ర్వాత ఢిల్లీ ఎల్జీ దీనిపై సీబీఐ విచారణకు సిఫారసు చేశారు. ఈ క్ర‌మంలోనే మనీలాండరింగ్ నిరోధక చట్టం (పీఎంఎల్ఏ) కింద ఆప్ నేతలపై ఈడీ కేసు నమోదు చేసింది. మనీ లాండరింగ్ కేసును సెంట్రల్ బ్యూరో ఆఫ్ ఇన్వెస్టిగేషన్ (సీబీఐ) న‌మోదుచేసింది. ఇందులో సిసోడియాతో సహా ఇతరులను నిందితుడిగా చేర్చారు. ఫిర్యాదు దాఖలైన తర్వాత, మ‌నీష్ సిసోడియా, కొంతమంది ఢిల్లీ ప్రభుత్వ అధికారుల నివాసాలపై సీబీఐ దాడులు చేసింది.

ఢిల్లీ ఎక్సైజ్ పాలసీ 2021-22 అమలులో అవకతవకలు జరిగాయనే ఆరోపణలపై ఢిల్లీ లెఫ్టినెంట్ గవర్నర్ వినయ్ కుమార్ సక్సేనా సీబీఐ దర్యాప్తును కోరడంతో ఎక్సైజ్ ప్రణాళిక పరిశీలనలోకి వచ్చింది. దీంతో పాటు 11 మంది ఎక్సైజ్ అధికారులను ఎల్జీ సస్పెండ్ చేశారు. ఈ కేసుకు సంబంధించి తెలంగాణ ముఖ్య‌మంత్రి కేసీఆర్ కుమార్తె, బీఆర్ఎస్ ఎమ్మెల్సీ క‌విత‌ను కూడా విచార‌ణకు త‌మ ముందు హాజ‌రుకావాల‌ని ఈడీ నోటీసులు ఇచ్చింది.