Congress: ఐదు రాష్ట్రాల్లో కాంగ్రెస్ దే గెలుపు.. బీజేపీపై మల్లికార్జున ఖర్గే ఫైర్

సారాంశం

5 states Assembly Elections: వచ్చే నెలలో ఎన్నికలు జరగనున్న ఐదు రాష్ట్రాల్లో గ్రాండ్ ఓల్డ్ పార్టీ ప్రభుత్వాన్ని ఏర్పాటు చేస్తుందని కాంగ్రెస్ పార్టీ అధ్యక్షుడు మల్లికార్జున్ ఖర్గే బుధవారం అన్నారు. భారతీయ జనతా పార్టీ (బీజేపీ) పాలిత మధ్యప్రదేశ్‌లో అధికార వ్యతిరేకత ఉందని పేర్కొన్నారు. ఛత్తీస్‌గఢ్, రాజస్థాన్‌లలో కాంగ్రెస్ నేతృత్వంలోని ప్రభుత్వాలు తమ పనిని సక్రమంగా చేస్తున్నాయనీ, అక్కడి ప్రజలు ఎలాంటి ఇబ్బందులు ఎదుర్కోవడం లేదని వార్తా సంస్థ ఏఎన్ఐ తో కలబుర్గిలో మాట్లాడుతూ ఖర్గే అన్నారు. నవంబర్‌లో తెలంగాణ, మధ్యప్రదేశ్, రాజస్థాన్, ఛత్తీస్‌గఢ్, మిజోరం వంటి ఐదు రాష్ట్రాలలో అసెంబ్లీ ఎన్నికలు జరగనున్నాయి. నవంబర్ 7న మిజోరం, నవంబర్ 7, 17న ఛత్తీస్‌గఢ్, నవంబర్ 17న మధ్యప్రదేశ్, 25న రాజస్థాన్, 30న తెలంగాణలో ఎన్నికలు జరగనుండగా.. డిసెంబర్ 3న అన్ని రాష్ట్రాల్లో ఓట్ల లెక్కింపు జరగనుంది.

"ఐదు రాష్ట్రాల ఎన్నికలకు కాంగ్రెస్ సన్నాహాలు బాగా జరుగుతున్నాయి. అన్ని రాష్ట్రాల్లో మేము గెలుస్తామని మేము విశ్వసిస్తున్నాము. ప్రధానంగా ద్రవ్యోల్బణం, నిరుద్యోగం వంటి ప‌లు అంశాలు అధికార బీజేపీకి వ్య‌తిరేకంగా ఉన్నాయి" అని  ఖర్గే పేర్కొన్నారు. మధ్యప్రదేశ్‌లో శివరాజ్‌సింగ్ చౌహాన్ నేతృత్వంలోని బీజేపీ ప్రభుత్వంపై ప్రజలు తిరగబడుతున్నారని అన్నారు. ఎన్నికల్లో ఇచ్చిన ఏ ఒక్క హామీని నెరవేర్చలేదని కేంద్రంలోని బీజేపీపై కాంగ్రెస్ చీఫ్ ఆరోపణలు గుప్పించారు. “ఏ వాగ్దానాలు చేసినా.. బీజేపీ ఒక్క హామీని కూడా నెరవేర్చలేదు, అది నిరుద్యోగం కావచ్చు, రైతు ఆదాయాన్ని రెట్టింపు చేయడం లేదా ఉపాధి అవ‌కాశాల‌ను పెంచ‌డం కావ‌చ్చు.." అని ఆయన అన్నారు. కర్నాటకలోని తన సొంత జిల్లా కలబుర్గి పర్యటనలో ఉన్న ఖర్గే, కర్ణాటకను కేంద్ర ప్రభుత్వం నిర్లక్ష్యం చేస్తోందని ఆరోపించారు. కేంద్ర ప్రాజెక్టులు (కర్ణాటకకు) ఇవ్వడం లేదని ఆయన అన్నారు.

ఛత్తీస్‌గఢ్‌, మధ్యప్రదేశ్‌, రాజస్థాన్‌లలో కాంగ్రెస్‌, బీజేపీలు ప్రధాన పోటీదారులుగా ఉన్నాయి. తెలంగాణలో అధికార భారత రాష్ట్ర సమితి (బీఆర్ఎస్), కాంగ్రెస్, బీజేపీల మధ్య ముక్కోణపు పోటీ నెలకొనే అవకాశముంది. మధ్యప్రదేశ్ అసెంబ్లీలో 230 సీట్లు ఉన్నాయి. 2018 ఎన్నికల్లో కాంగ్రెస్ 41.5 శాతం ఓట్లతో 114 సీట్లు గెలుచుకోగా, బీజేపీ 41.6 శాతం ఓట్లతో 109 సీట్లు సాధించింది. జ్యోతిరాదిత్య సింధియాకు విధేయులుగా భావించిన కొందరు ఎమ్మెల్యేలు రాజీనామాలు చేయడంతో 2020లో కాంగ్రెస్ ప్రభుత్వం మెజారిటీని కోల్పోయింది, ఆ తర్వాత బీజేపీలో చేరారు. శివరాజ్ సింగ్ చౌహాన్ ముఖ్యమంత్రిగా రాష్ట్రంలో బీజేపీ అధికారంలోకి వచ్చింది.

రాజస్థాన్‌లో 200 సీట్లు ఉన్నాయి, 2018లో కాంగ్రెస్ 99 సీట్లను కైవసం చేసుకోవడం ద్వారా రాష్ట్రంలో దాదాపు మెజారిటీని గెలుచుకుంది. అది బీఎస్పీ, స్వతంత్ర ఎమ్మెల్యేల సహాయంతో అధికారంలోకి వచ్చింది. పార్టీకి 39.8 శాతం ఓట్లు వ‌చ్చాయి. అశోక్ గెహ్లాట్ ముఖ్యమంత్రిగా గత ఐదేళ్లుగా రాష్ట్రాన్ని పాలించారు. 2018 ఎన్నికల్లో బీజేపీ 39.3 శాతం ఓట్లతో 73 సీట్లు గెలుచుకుంది. తెలంగాణలో 2018 ఎన్నికల్లో అధికార బీఆర్‌ఎస్ 119 స్థానాలకు గానూ 88 స్థానాలు గెలుచుకుని 47.4 శాతం ఓట్లను సాధించింది. కాంగ్రెస్ 19 స్థానాలు, 28.7 శాతం ఓట్లతో రెండో స్థానంలో నిలిచింది. 

2018 ఎన్నికల్లో ఛత్తీస్‌గఢ్‌లో 90 సీట్లకు గాను 68 స్థానాల్లో కాంగ్రెస్ అధికారంలోకి వచ్చింది. ఆ పార్టీకి 43.9 శాతం ఓట్లు వచ్చాయి. బీజేపీ 15 సీట్లు గెలుచుకుని 33.6 శాతం ఓట్లను సాధించింది. 40 మంది సభ్యులున్న మిజోరాం అసెంబ్లీలో మిజో నేషనల్ ఫ్రంట్ 37.8 శాతం ఓట్లతో 26 స్థానాలను కైవసం చేసుకుని 2018 ఎన్నికల్లో విజయం సాధించింది. కాంగ్రెస్ ఐదు స్థానాలు, బీజేపీ ఒక స్థానంలో గెలుపొందాయి. ఐదు రాష్ట్రాల అసెంబ్లీ ఎన్నికల నేప‌థ్యంలో అన్ని ప్రధాన రాజ‌కీయ పార్టీలు  త‌మ అగ్ర‌నాయ‌కుల‌ను రంగంలోకి దింపుతూ ప్ర‌చార హోరును కొన‌సాగిస్తున్నాయి.