లోక్ సభ ఎన్నికల్లో గెలుపే లక్ష్యంగా బీజేపీ అడుగులు.. యూపీ బీజేపీకి కొత్త బాస్ ఎవరంటే..?
ఉత్తరప్రదేశ్: భారతీయ జనతా పార్టీ (బీజేపీ) నాయకుడు, ఉత్తరప్రదేశ్ రాష్ట్ర మంత్రి భూపేంద్ర సింగ్ చౌదరి మీడియాతో మాట్లాడుతూ.. 2024లో రాష్ట్రంలోని మొత్తం 80 లోక్ సభ స్థానాల్లో విజయం సాధించాలని పార్టీ లక్ష్యంగా పెట్టుకున్నట్లు తెలిపారు.
ఉత్తరప్రదేశ్: రానున్న లోక్ సభ ఎన్నిక‌ల‌ను దృష్టిలో ఉంచుకుని కేంద్రంలో అధికారంలో ఉన్న భారతీయ జనతా పార్టీ (బీజేపీ) వ్యూహాత్మ‌కంగా ముందుకుసాగుతోంది. పార్టీలోని కీల‌క మార్పుల‌కు శ్రీకారం చుడుతూ.. సార్వ‌త్రిక ఎన్నికల్లో గెలుపే లక్ష్యంగా ప్ర‌ణాళిక‌లు ర‌చిస్తోంది. మ‌రోసారి అధికార పీఠం ద‌క్కించుకోవాల‌ని చూస్తోంది. ఈ నేప‌థ్యంలో అత్య‌ధిక లోక్ సభ స్థానాలున్న ఉత్తరప్రదేశ్ బీజేపీ యూనిట్ లో కీల‌క మార్పులు చేప‌ట్టింది. భారతీయ జనతా పార్టీ (బీజేపీ) పార్టీ ఉత్తరప్రదేశ్ యూనిట్ అధ్యక్షుడిగా జాట్ నాయకుడు, యోగి ఆదిత్యనాథ్ ప్రభుత్వంలో మంత్రి అయిన భూపేంద్ర సింగ్ చౌదరిని గురువారం నియమించింది. అలాగే, మాజీ ముఖ్యమంత్రి బిప్లబ్ దేబ్‌కు సన్నిహితుడిగా పేరుగాంచిన త్రిపుర బీజేపీ ఉపాధ్యక్షుడు రాజీబ్ భట్టాచార్జీని రాష్ట్ర విభాగానికి కొత్త అధ్యక్షుడిగా కూడా బీజేపీ పేర్కొంది. రెండు నియామకాలు తక్షణమే అమలులోకి వచ్చాయి.
బీజేపీ నేతృత్వంలోని ఉత్తరప్రదేశ్ ప్రభుత్వంలో పంచాయితీ రాజ్ మంత్రిగా ఉన్న భూపేంద్ర సింగ్ చౌదరి (54) నియామకం 2024 లోక్‌సభ ఎన్నికలకు ముందు ప్రభావవంతమైన జాట్ కమ్యూనిటీని చేరుకోవడానికి పార్టీ చేసిన ప్రయత్నంగా పరిగణించబడుతున్నట్లు సీనియర్ బీజేపీ నాయకులు తెలిపారు. ఈ నియామకం జాట్ వ‌ర్గాన్ని ప్ర‌భావితం చేయ‌నుంద‌ని పేర్కొంటున్నారు. కాగా, ఇదివ‌ర‌కు కేంద్ర ప్ర‌భుత్వం ప్ర‌తిష్ఠాత్మ‌కంగా తీసుకువ‌చ్చి.. ర‌ద్దు చేసిన మూడు వివాదాస్పద వ్యవసాయ చట్టాలకు వ్యతిరేకంగా ఏడాది పొడవునా సాగిన రైతుల నిరసనలో జాట్ కమ్యూనిటీ ముందంజలో ఉంది. ఈ ఏడాది ప్రారంభంలో జరిగిన రాష్ట్ర అసెంబ్లీ ఎన్నికల్లో బీజేపీ విజయం సాధించడంతో ఆదిత్యనాథ్ మంత్రివర్గంలో మంత్రిగా పనిచేసిన స్వతంత్ర దేవ్ సింగ్ స్థానంలో చౌదరి నియమితులయ్యారు.
“భూపేంద్ర సింగ్ చౌదరి బీజేపీలో అట్టడుగు స్థాయి నుంచి పనిచేసినందున బలమైన సంస్థాగత అవగాహన కలిగి ఉన్నాడు. 2017 అసెంబ్లీ ఎన్నికల సమయంలో, అతను పార్టీ పశ్చిమ ప్రాంత అధ్యక్షుడిగా ఉన్నాడు” అని బీజేపీ ఒక నాయకుడు పేర్కొన్నాడు. "జాట్ కమ్యూనిటీలో అతని ప్రభావం ఖచ్చితంగా 2024 ఎన్నికలలో పార్టీకి సహాయం చేస్తుంది" అని కూడా చెప్పారు. కాగా, ఉత్తరప్రదేశ్ బీజేపీ యూనిట్ అధ్యక్షుడిగా నియామితుల‌య్యారంటూ ప్రకటన వెలువడిన వెంటనే భూపేంద్ర సింగ్ చౌదరి విలేకరులతో మాట్లాడుతూ.. 2024లో రాష్ట్రంలోని మొత్తం 80 స్థానాల్లో విజయం సాధించాలని పార్టీ లక్ష్యంగా పెట్టుకున్నట్లు చెప్పారు. ‘‘ ప్ర‌ధానమంత్రి నరేంద్ర మోడీ నాయకత్వంలో 2024 ఎన్నికల్లో నిర్దేశించిన లక్ష్యాన్ని సాధించేందుకు ప్రయత్నిస్తాను. ఉత్తరప్రదేశ్ లో మొత్తం 80 సీట్లు గెలవడమే లక్ష్యంగా పెట్టుకున్నామని చెప్పారు. చౌదరి నియామకం పట్ల యూపీ సీఎం యోగి ఆదిత్యనాథ్ హర్షం వ్యక్తం చేస్తూ, రాష్ట్రంలో పార్టీని విజయపథంలో నడిపిస్తారని అన్నారు.
"@BJP4UP అధ్యక్షుడైనందుకు సీనియర్, ప్రముఖ రాజకీయ నాయకుడు భూపేంద్ర సింగ్ చౌదరి జీకి హృదయపూర్వక అభినందనలు-శుభాకాంక్షలు" అని ఆదిత్యనాథ్ హిందీలో ట్వీట్ చేశారు. "నిస్సందేహంగా, మీ శక్తివంతమైన నాయకత్వంలో, 'సబ్కా సాథ్, సబ్కా వికాస్, సబ్కా విశ్వాస్, సబ్కా ప్రయాస్' స్ఫూర్తితో బీజేపీ రాష్ట్రంలో విజయానికి కొత్త బెంచ్‌మార్క్‌లను సెట్ చేస్తుంది" అని పేర్కొన్నారు.
1990లో బీజేపీలో చేరిన రాజీబ్ భట్టాచార్జీ, త్రిపుర మాజీ ముఖ్యమంత్రి బిప్లబ్ కుమార్ దేబ్‌కు సన్నిహితుడిగా పరిగణించబడుతున్నారు. 2020 నుండి ఆ పదవిలో కొనసాగుతున్న ప్రస్తుత సీఎం మాణిక్ సాహా నుంచి రాష్ట్ర చీఫ్ పదవిని చేపట్టనున్నారు. “మా పార్టీకి ఒక వ్యక్తి, ఒక పదవి విధానం ఉన్నందున, కొత్త రాష్ట్ర అధ్యక్షుడిని నియమించారు. కొత్త అధ్యక్షుడి నేతృత్వంలో మా పార్టీ కార్యకలాపాలు పురోగమిస్తాయన్న నమ్మకంతో ఉన్నాం’’ అని బీజేపీ అధికార ప్రతినిధి నాబెందు భట్టాచార్య అన్నారు. "బీజేపీ జాతీయ అధ్యక్షుడు జేపీ నడ్డా తక్షణమే త్రిపుర రాష్ట్ర అధ్యక్షుడిగా రాజీబ్ భట్టాచార్జీని నియమించారు" అని పార్టీ జాతీయ ప్రధాన కార్యదర్శి అరుణ్ సింగ్ సంతకం చేసిన లేఖను గురించి వెల్ల‌డించారు. కాగా, ఈ ఏడాది చివర్లో అసెంబ్లీ ఎన్నికలు జరగనున్న హిమాచల్ ప్రదేశ్ ఎన్నికల ఇన్‌ఛార్జ్‌గా సౌదన్ సింగ్‌ను, కో-ఇంఛార్జిగా దేవేందర్ సింగ్ రాణాను కూడా బీజేపీ నియమించింది.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
