త్రివేణి సంగమంలో స్నానంచేసి ... మ్యారేజ్ డే జరుపుకున్న ఆస్ట్రేలియా జంట
ఆస్ట్రేలియా దంపతులు తమ 25వ వివాహ వార్షికోత్సవాన్ని పురస్కరించుకుని మహా కుంభమేళాలో పవిత్ర స్నానం చేసి, కాశీ విశ్వనాథుడిని దర్శించుకున్నారు. ప్రధాని మోదీ, సీఎం యోగిలను ప్రశంసించిన వారు దీన్ని తమ జీవితంలోనే అత్యున్నత ఘట్టంగా అభివర్ణించారు.
Followkumbhmela 2025 : అత్యంత భారీ ఆధ్యాత్మిక, సాంస్కృతిక ఉత్సవమైన మహా కుంభమేళా ఇప్పుడు ప్రపంచవ్యాప్తంగా చర్చనీయాంశంగా మారింది. ఈ నేపథ్యంలో క్రికెట్ ఆస్ట్రేలియా (CA) సాంస్కృతిక రాయబారి, మల్టీకల్చరల్ ప్రోగ్రామ్ హెడ్ డాక్టర్ ఆశుతోష్ మిశ్రా తన భార్య శ్వేతతో కలిసి భారత్ కు వచ్చి కాశీ విశ్వనాథుడిని దర్శించుకున్నారు. అనంతరం త్రివేణీ సంగమంలో పవిత్ర స్నానం ఆచరించారు.
ఈ సందర్భంగా కాశీకి చెందిన ఈ దంపతులు మాట్లాడుతూ... ప్రపంచంలోనే అతిపెద్ద ఈవెంట్ ను నిర్వహించినందుకు ప్రధాని నరేంద్ర మోదీ, ముఖ్యమంత్రి యోగి ఆదిత్యనాథ్ లకు అభినందనలు తెలిపారు. తమ 25వ వివాహ వార్షికోత్సవాన్ని జరుపుకోవడానికి భారత్ కు వచ్చిన ఈ ఆస్ట్రేలియా దంపతులు 144 ఏళ్ల తర్వాత వచ్చిన మహా కుంభమేళాకు సాక్షులు అయ్యారు. కాశీ విశ్వనాథుడి మంగళ హారతి, త్రివేణీ సంగమంలో పవిత్ర స్నానంతో తమ జీవితం సార్థకమైందని వారు అన్నారు.
ఇంతటి భారీ ఏర్పాట్లు చేయడం కష్టం, కానీ యూపీ ప్రభుత్వం సాధించింది
డాక్టర్ ఆశుతోష్ మిశ్రా మాట్లాడుతూ, ఈ చారిత్రాత్మక మహా కుంభమేళాలో భాగం కావడం తమకు గర్వంగా, అదృష్టంగా భావిస్తున్నామని అన్నారు. 144 ఏళ్ల తర్వాత వస్తున్న ఈ మహోత్సవాన్ని మానవ చరిత్రలోనే అతిపెద్ద ఈవెంట్ గా అభివర్ణించారు. ఈ భారీ కార్యక్రమానికి కేంద్ర, ఉత్తరప్రదేశ్ ప్రభుత్వాలకు శుభాకాంక్షలు తెలిపారు. మహా కుంభమేళా ఏర్పాట్లను ప్రశంసిస్తూ, ఇంతటి భారీ ఏర్పాట్లు చేయడం అంత సులభం కాదని, కానీ యూపీ ప్రభుత్వం దాన్ని సాధ్యం చేసిందని డాక్టర్ ఆశుతోష్ అన్నారు.
కాశీ దర్శనం తర్వాత సంగమ స్నానం
డాక్టర్ మిశ్రా భార్య శ్వేత ఆస్ట్రేలియాలోని యూనివర్సిటీ ఆఫ్ క్వీన్స్ ల్యాండ్ లో పనిచేస్తున్నారు. తమ 25వ వివాహ వార్షికోత్సవాన్ని భారత్ లో జరుపుకోవాలని నిర్ణయించుకున్నామని ఆమె చెప్పారు. ప్రపంచంలోని ఇతర పర్యాటక ప్రాంతాలను వదిలి ముందుగా కాశీ విశ్వనాథుడి మంగళ హారతిలో పాల్గొని, ఆ తర్వాత త్రివేణీ సంగమంలో పవిత్ర స్నానం ఆచరించాలని నిశ్చయించుకున్నామని, దానితో తమ జీవితం సార్థకమైనట్లు అనిపిస్తోందని ఆమె అన్నారు.
భారతీయ సంస్కృతి, ఆధ్యాత్మిక శక్తిని ప్రపంచం చూస్తోంది
శ్వేత మిశ్రా ప్రధాని నరేంద్ర మోదీ, ముఖ్యమంత్రి యోగి ఆదిత్యనాథ్ లకు ప్రత్యేకంగా కృతజ్ఞతలు తెలిపారు. ఈ అద్భుతమైన కార్యక్రమం, చక్కని ఏర్పాట్లకు ప్రభుత్వానికి అభినందనలు అందించారు. ప్రభుత్వ, పోలీసు శ్రమ ఫలించేలా అందరూ నిబంధనలు పాటిస్తూ, సహకరించాలని భక్తులకు ఆమె పిలుపునిచ్చారు.
భారతదేశ ఆధ్యాత్మిక శక్తి, సనాతన ధర్మ వైభవాన్ని చూసేందుకు ప్రపంచం నలుమూలల నుంచి ప్రజలు వస్తున్నారని మిశ్రా దంపతులు అన్నారు. సంగమ స్నానం అనంతరం హర హర గంగే, హర హర మహాదేవ్ అంటూ నినదించారు. మహా కుంభమేళా దివ్య కార్యక్రమం ద్వారా భారతీయ సంస్కృతి, ఆధ్యాత్మిక శక్తిని ప్రపంచం మొత్తం చూస్తోందని, కేంద్ర, యూపీ ప్రభుత్వాలు కలిసి దీన్ని చారిత్రాత్మకంగా మార్చాయని డాక్టర్ ఆశుతోష్ మిశ్రా అన్నారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
