బెంగళూరు ఎయిర్ పోర్టులో 12 మందికి కరోనా పాజిటివ్.. తప్పనిసరిగా మాస్కులు ధ‌రించాల్సిందే: కర్నాటక
Bengaluru Airport: బెంగళూరు విమానాశ్రయంలో కోవిడ్-19 హైరిస్క్ దేశాల నుంచి వచ్చిన 12 మంది ప్రయాణికులకు కరోనా పాజిటివ్ నిర్ధారణ అయింది. ఈక్ర‌మంలోనే అప్ర‌మ‌త్త‌మైన కర్నాటక ప్రభుత్వం మాస్కులు ధ‌రించ‌డం తప్పనిసరి చేసింది.
Karnataka-Covid-19 rules: బెంగళూరులోని కెంపెగౌడ అంతర్జాతీయ విమానాశ్రయంలో కరోనా వైర‌స్ హైరిస్క్ దేశాల నుంచి వచ్చిన 12 మంది ప్రయాణికులకు కరోనా పాజిటివ్ నిర్ధారణ కావడంతో కర్ణాటక ఆరోగ్య శాఖ ఆందోళన వ్యక్తం చేసింది. చైనా నుంచి వచ్చిన 37 ఏళ్ల వ్యక్తికి బెంగళూరు విమానాశ్రయంలో కరోనా పాజిటివ్ గా నిర్ధారణ అయినట్లు అధికారులు తెలిపారు. మిగతా పదకొండు మంది ప్రయాణికులు కరోనా అధిక ప్రమాదం ఉన్న దేశాల నుండి వచ్చారు. నలుగురిని ఒక ప్ర‌యివేటు ఆసుపత్రిలో క్వారంటైన్ చేశారు. మిగిలిన వారిని హోం ఐసోలేషన్ లో ఉంచారు. అన్ని నమూనాలను నేషనల్ ఇనిస్టిట్యూట్ ఆఫ్ వైరాలజీకి జెనోమిక్ సీక్వెన్సింగ్ కు పంపారు. ఫలితాలు సోమవారం సాయంత్రం లేదా మంగళవారం ఉదయం నాటికి వస్తాయని భావిస్తున్నారు. చైనా నుంచి వచ్చిన 37 ఏళ్ల వ్యక్తి ఉత్తరప్రదేశ్ లోని ఆగ్రాకు చెందినవాడు. గత మూడు రోజుల్లో విమానాశ్రయానికి వచ్చిన పన్నెండు మంది ప్రయాణికులకు కోవిడ్ పరీక్షలు నిర్వహించినట్లు అధికారులు తెలిపారు.
రాష్ట్ర ఆరోగ్యశాఖ కరోనా వైర‌స్ కేసులు వెలుగుచూస్తుండ‌టంపై ఆందోళన వ్యక్తం చేస్తోంది. జీనోమ్ సిక్వేన్సింగ్ ఫ‌లితాల కోసం ఎదురుచూస్తోంది. సోమవారం సాయంత్రం లేదా మంగళవారం ఉదయం నాటికి కొత్త కోవిడ్ మార్గదర్శకాలను విడుదల చేస్తామని రెవెన్యూ శాఖ మంత్రి ఆర్ అశోక్ తెలిపారు. రాష్ట్రంలో మారుతున్న పరిస్థితులను దృష్టిలో ఉంచుకుని ప్రభుత్వం సోమవారం మధ్యాహ్నం ఉన్నత స్థాయి సమావేశాన్ని ఏర్పాటు చేసింది. ఈ సమావేశంలో నివారణ చర్యలపై చర్చిస్తామనీ, ఆందోళన చెందాల్సిన అవసరం లేదని మంత్రి అశోక్ తెలిపారు. బహిరంగ ప్రదేశాలు, రద్దీగా ఉండే ప్రాంతాల్లో ప్రజలు తప్పనిసరిగా మాస్కులు ధరించాలని ఆరోగ్య శాఖ మంత్రి డాక్టర్ కె.సుధాకర్ ప్రజలకు విజ్ఞప్తి చేశారు.
మాస్కులు తప్పనిసరి.. ఒంటిగంట వ‌ర‌కే న్యూ ఇయర్ వేడుకలు
ఇత‌ర దేశాల నుంచి వచ్చిన వారిలో కరోనా కేసులు వెలుగులోకి వ‌స్తుండ‌టంపై కర్నాటక ప్రభుత్వం అప్ర‌మ‌త్త‌మైంది. ఈ క్ర‌మంలోనే ప్రజలు కరోనా మార్గ‌ద‌ర్శ‌కాలు పాటించాల‌ని సూచిస్తోంది. కరోనా వ్యాప్తిని నివారించే చ‌ర్య‌ల్లో భాగంగా మాస్కులు ధ‌రించ‌డం తప్పనిసరి చేసింది. కరోనావైరస్ ఓమిక్రాన్ సబ్-వేరియంట్ BF.7 కేసులు వెలుగులోకి వచ్చిన నేపథ్యంలో కోవిడ్ కేసులు పెరుగుతాయనే భయంతో కర్ణాటకలో మాస్కులు ధ‌రించ‌డం ప్రభుత్వం తప్పనిసరి చేస్తూ ఆదేశాలు జారీ చేసింది. అలాగే, న్యూ ఇయర్ వేడుకలను అర్ధరాత్రి 1 గంటకు పరిమితం చేయాలని పబ్‌లు, రెస్టారెంట్ల యజమానులకు ఆదేశాలు జారీ చేశారు. కోవిడ్ కేసులు పెరుగుతున్నాయనే భయంతో, ముఖ్యంగా చైనాలో అపూర్వమైన పెరుగుదల నేపథ్యంలో మాస్కులను తప్పనిసరి చేస్తూ ఆదేశాన్ని తిరిగి తీసుకువస్తామని గత వారం రాష్ట్ర ప్రభుత్వం తెలిపింది.
కర్ణాటక ఆరోగ్య మంత్రి కేశవ సుధాకర్ సోమవారం మాట్లాడుతూ, "థియేటర్లు, పాఠశాలలు, కళాశాలల లోపల మాస్క్‌లు తప్పనిసరి చేయబడ్డాయి. పబ్బులు, రెస్టారెంట్లు, బార్‌లలో కొత్త సంవత్సరాన్ని జరుపుకోవడానికి మాస్క్‌లు తప్పనిసరి చేశామ‌ని తెలిపారు. కొత్త సంవత్సర వేడుకలు తెల్లవారుజామున 1 గంటలోపు ముగించాల‌ని ఆయన పేర్కొన్నారు. కరోనా కేసులు గురించి భ‌య‌ప‌డాల్సిన అవసరం లేదని పేర్కొన్న ఆయన.. కోవిడ్-19 నుంచి ర‌క్ష‌ణ పొంద‌డానికి మార్గ‌ద‌ర్శాలు పాటిస్తూ జాగ్ర‌త్త‌లు తీసుకోవాల‌ని సూచించారు. ప్రజలకు ఎలాంటి అసౌకర్యం కలగకుండా కోవిడ్ వ్యతిరేక చర్యలను దశలవారీగా అమలు చేస్తామని కర్నాటక ప్రభుత్వం హామీ ఇచ్చింది. కర్నాటక ముఖ్యమంత్రి బసవరాజ్ బొమ్మై సోమవారం నాడు.. “ప్రస్తుత కోవిడ్ పరిస్థితి, బూస్టర్ డోస్ పెంపుదల, పరీక్షలు, ఇన్‌ఫ్లుఎంజా-లైక్ ఇల్నెస్ (ఐఎల్‌ఐ) కోసం పరీక్షలను తప్పనిసరి చేయడంపై ప్రజల్లో అవగాహన కల్పించాల్సిన అవసరం గురించి ఈ రోజు జరిగిన క్యాబినెట్ సమావేశంలో చర్చించారు. తీవ్రమైన అక్యూట్ రెస్పిరేటరీ ఇల్నెస్ (SARI) కేసులు, అన్ని ప్ర‌దేశాల్లో మాస్కులు ధ‌రించ‌డం గురించి చ‌ర్చించిన‌ట్టు తెలిపారు.
కరోనా ఆందోళన మ‌ధ్య సాధారణ జ‌న జీవ‌నం, ఆర్థిక కార్యకలాపాలకు ఎటువంటి ఆటంకం కలగకుండా దశలవారీగా నివారణ చర్యలను తీసుకుంటామ‌ని ముఖ్యమంత్రి బసవరాజ్ బొమ్మై తెలిపారు. రాష్ట్రానికి వచ్చే అంతర్జాతీయ ప్రయాణికులకు గత వారం విమానాశ్రయాలలో 2% యాదృచ్ఛిక పరీక్షను రాష్ట్రం తప్పనిసరి చేసిందని తెలిపారు. అన్ని జిల్లా ఆసుపత్రుల్లో తగినంత పడకలు, ఆక్సిజన్ సరఫరాతో కూడిన ప్రత్యేక కోవిడ్ వార్డులను త్వరలో ప్రారంభించనున్నట్లు ఆయన చెప్పారు. కోవిడ్ రోగులకు చికిత్స చేయడానికి బెడ్‌లను రిజర్వ్ చేయడానికి ప్రైవేట్ ఆసుపత్రులు, సూపర్ స్పెషాలిటీ ఆసుపత్రులతో సమన్వయ చ‌ర్య‌లు తీసుకుంటున్న‌ట్టు తెలిపారు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
