'ఎలాంటి సవాళ్లనైనా ఎదుర్కొనేందుకు భారత సైన్యం సిద్ధమే..'
జమ్మూ-కశ్మీర్ , లడఖ్ సరిహద్దుల్లో ఎదుర‌య్యే స‌వాళ్లు, ముప్పును ప‌సిగ‌డుతూ ఎప్ప‌టిక‌ప్పుడు ఎదుర్కొనేందుకు నార్త‌న్ కమాండ్ సంసిద్దంగా ఉందని లెఫ్టినెంట్ జనరల్ ద్వివేది తెలిపారు. జాతి ప్ర‌జాస్వామిక పునాదులు, సంప్రదాయాలను కాపాడుతూ దేశ సార్వ‌భౌమాధికారం, భౌగోళిక సమగ్రతను కాపాడేందుకు తాము కట్టుబడి ఉన్నామ‌ని చెప్పారు.
జమ్మూ-కశ్మీర్ , లడఖ్ సరిహద్దుల్లో డ్రాగన్ కంట్రీ చైనా ఎలాంటి దూకుడు చర్యలకు పాల్పడినట్టైతే.. తాము కూడా దీటుగా ఎదుర్కొంటామని భారత సైన్యం స్ప‌ష్టం చేసింది. ఎలాంటి ఆక్రమణలనైనా పూర్తి సమన్వయంతో దృఢ సంకల్పంతో ఎదుర్కొంటామని, లైన్ ఆఫ్ యాక్చువల్ కంట్రోల్ (ఎల్‌ఎసి) వద్ద పరిస్థితిని దౌత్య, కార్యాచరణ స్థాయిలో పరిష్కరించే చర్యలు కూడా ఏకకాలంలో కొనసాగుతున్నాయని ఆర్మీ నార్తర్న్ కమాండ్ జనరల్ ఆఫీస‌ర్ కమాండింగ్ ఇన్ చీఫ్ ఉపేంద్ర ద్వివేది పేర్కొన్నారు.
కమాండింగ్-ఇన్-చీఫ్ లెఫ్టినెంట్ జనరల్ ఉపేంద్ర ద్వివేది మీడియాతో మాట్లాడుతూ.. తూర్పు లడఖ్‌లోని LAC పెట్రోలింగ్, సాంకేతిక మార్గాల ద్వారా ఆధిపత్యం చెలాయిస్తోందని, మా ప్రాదేశిక సమగ్రతను నిర్ధారిస్తున్నామని తాను హామీ ఇస్తున్నానని తెలిపారు. నార్తర్న్ కమాండ్ సన్నద్ధంగా ఉందని, నానాటికీ పెరుగుతున్న బెదిరింపులు,సవాళ్లను ఎదుర్కోవడానికి ఉన్నతమైన నైతిక స్థితిలో ఉందని ద్వివేది చెప్పారు.
భారత సైన్యం దేశ ప్రజాస్వామ్య, సంప్రదాయాలను కొనసాగిస్తూనే.. భారతదేశ సార్వభౌమత్వాన్ని, ప్రాదేశిక సమగ్రతను కాపాడేందుకు కట్టుబడి ఉందని జనరల్ ద్వివేది పేర్కొన్నారు. తాము నిరంతరం పర్యవేక్షిస్తున్నామనీ, అన్ని పరిణామాలను పర్యవేక్షిస్తున్నామని , జాతీయ ప్రయోజనాలను పరిరక్షించడానికి అవసరమైన అన్ని చర్యలను తీసుకుంటామని తెలిపారు.
నియంత్రణ రేఖ వెంబడి పరిస్థితి గురించి మాట్లాడుతూ.. పాకిస్తాన్‌తో కాల్పుల విరమణ ఉన్నప్పటికీ.. ఆ నిబంధనను పాక్ పలుమార్లు అతిక్రమించిందని పేర్కొన్నారు. చాలా కఠినమైన నిఘా,పటిష్టమైన సాంకేతికతతో వారి చర్యలను సమర్థవంతంగా అడ్డుకోవచ్చని తెలిపారు. శత్రు దేశం పాకిస్థాన్ కాల్పుల విరమణ ఉల్లంఘనలు, చొరబాటు ప్రయత్నాలు చేస్తుందని .. అయితే.. ఆ చర్యలను విజయవంతంగా నియంత్రించామని తెలిపారు. కానీ.. పాక్.. నార్కో-టెర్రరిజానికి పాల్పడుతున్నదని వివరించారు.
ఇటీవల డ్రోన్‌ల ద్వారా డ్రగ్స్‌తో పాటు ఆయుధాలను పంపిస్తున్నారనీ, దేశంలో శాంతి భద్రతలకు విఘాతం కలిగించే చర్యలకు పాల్పడుతున్నారనీ, సరిహద్దు దాటి డ్రగ్స్ స్మగ్లింగ్ ఉగ్రవాదానికి సహాయం చేస్తుందని తెలిపారు.ఈ ధోరణి,ముప్పును అరికట్టడానికి ఇప్పటికే డ్రోన్‌లను వ్యతిరేకించే చర్యలను ప్రారంభించిందనీ, తాము నిరంతరం అప్ర‌మ‌త్తంగా ఉండ‌టంతో పాటు అన్ని పరిణామాలను ప‌సిగ‌డుతూ జాతి ప్ర‌యోజ‌నాలు కాపాడేందుకు అవసరమైన చర్యలు చేప‌డుతున్నామ‌ని అన్నారు.
ఆర్మీతో పాటు, ఐటిబిపి, బిఎస్‌ఎఫ్ వంటి పారామిలిటరీ బలగాలతో సమన్వయం , సమన్వయ శిక్షణ, కసరత్తులు , కార్యాచరణ పనులు సంయుక్తంగా విధానాలను క్రమబద్ధీకరించడానికి, సరిహద్దు భద్రతను పెంచడానికి జరుగుతున్నాయని ఆయన చెప్పారు. గత మూడు సంవత్సరాలలో.. మన సరిహద్దులను కాపాడటానికి ప్రతి సంవత్సరం మోహరించిన యూనిట్లు , బలోపేత దళాల కోసం సుమారు 1,500 కోట్ల రూపాయల విలువైన మౌలిక సదుపాయాలు సృష్టించబడ్డాయని తెలిపారు.
అంతేకాకుండా జాతీయ స్థాయిలో గతి శక్తి చొరవతో 800 కిలోమీటర్లకు పైగా నూతన రోడ్ల నిర్మాణం జరిగిందని తెలిపారు. ఆర్మీ, కమ్యూనికేషన్ల మంత్రిత్వ శాఖతో పాటు, లడఖ్ , జమ్మూ కాశ్మీర్‌లోని మారుమూల ప్రాంతాల్లోని 144 గ్రామాలను 4G-5G టవర్‌ల ఏర్పాటు కోసం గుర్తించినట్లు ఆర్మీ అధికారి తెలిపారు, తద్వారా మారుమూల గ్రామాలలో నివసించే ప్రజలకు టెలిఫోన్ సౌకర్యం అందుబాటులోకి వస్తుందని తెలిపారు.
