రాహుల్ గాంధీకి షాకిచ్చిన అఖిలేష్ యాదవ్..
రాహుల్ గాంధీ చేపట్టిన భారత్ జోడో యాత్ర మంగళవారం ఉత్తరప్రదేశ్ లోకి ప్రవేశించనుంది. దీనికి ఒకరోజు ముందు అఖిలేష్ యాదవ్, బీఎస్పీ అధినేత్రి మాయావతి యాత్రలో పాల్గొనరాదని నిర్ణయించుకున్నారు. కాంగ్రెస్ చేపట్టిన భారత్ జోడో యాత్రకు ఇరువురు నేతలు శుభాకాంక్షలు తెలిపారు. ఆహ్వాన లేఖ పంపినందుకు రాహుల్ గాంధీకి ధన్యవాదాలు, పర్యటనకు శుభాకాంక్షలు అని మాయావతి ట్వీట్ చేశారు.
రాహుల్ గాంధీ చేపట్టిన భారత్ జోడో యాత్ర నేడు(మంగళవారం) ఉత్తరప్రదేశ్ లోకి ప్రవేశించనుంది. ఈ క్రమంలో యాత్రలో పాల్గొన్నల్సిందిగా.. ఎస్పీ అధ్యక్షుడు అఖిలేష్ యాదవ్, బీఎస్పీ అధినేత్రి మాయావతి లకు ఆహ్వానం పంపించారు రాహుల్ గాంధీ. అయితే.. ఆ ఆహ్వానాన్ని వారు సున్నితంగా తోసిపుచ్చారు. ఈ క్రమంలో రాహుల్ గాంధీకి కృతజ్ఞతలు తెలుపుతూ.. అఖిలేష్ యాదవ్ లేఖ రాశారు.
ప్రియమైన రాహుల్ జీ.. భారత్ జోడో యాత్రలో పాల్గొనాలని ఆహ్వానం పంపినందుకు ధన్యవాదాలు. భారత్ జోడో ప్రచారం విజయవంతం కావాలని హృదయపూర్వక అభినందనలు. భారతదేశం అనేది భౌగోళికంగా చాలా పెద్దది. ఈ అఖండ భారతాన్ని ఏకం చేయాలంటే.. ప్రేమ, అహింస, కరుణ, సహకారం,సామరస్యంతోనే సాధ్యం. మన దేశంలోని ఈ సమగ్ర సంస్కృతిని కాపాడే లక్ష్యంతో ఈ యాత్ర తన లక్ష్యాన్ని సాధిస్తుందని ఆశిస్తున్నాను. అని పేర్కొన్నారు.
అయితే ఆయన యాత్రలో పాల్గొన్నారా ?లేదా?అనే విషయాన్ని లేఖలో పేర్కొనలేదు. అయితే.. ఈ యాత్రలో ఎస్పీ అధ్యక్షుడు అఖిలేష్ యాదవ్ పాల్గొనడం లేదని పార్టీ వర్గాలు చెబుతున్నాయి. బీజేపీ, కాంగ్రెస్‌లు ఒకేలా ఉంటాయని ఆయన స్వయంగా ప్రకటించిన విషయం తెలిసిందే..
తొలుత జోడో యాత్రకు సంబంధించి రాహుల్ గాంధీ ఆహ్వాన పత్రాన్ని పంపడాన్ని ఎస్పీ అధ్యక్షుడు అఖిలేష్ యాదవ్ గత వారం ఖండించారు. దీని తర్వాత జనవరి 1న రాహుల్ గాంధీ లేఖ ఎస్పీ రాష్ట్ర కార్యాలయానికి చేరింది. జనవరి 2న రాహుల్ గాంధీకి లేఖ పంపినందుకు కృతజ్ఞతలు తెలుపుతూ ఎస్పీ అధ్యక్షుడు అఖిలేష్ యాదవ్ లేఖ రాశారు.
రాహుల్ గాంధీ నేతృత్వంలోని భారత్ జోడో యాత్ర జనవరి 3 మధ్యాహ్నం ఘజియాబాద్‌లోని లోనీ సరిహద్దు నుండి యుపిలోకి ప్రవేశిస్తుంది.రాత్రికి బాగ్‌పట్‌లోని మావికల గ్రామంలో ఆగుతుంది. ఇది జనవరి 4న షామ్లీ మీదుగా వెళ్లి జనవరి 5 సాయంత్రం పానిపట్‌లోని సనౌలీ మీదుగా హర్యానాలోకి ప్రవేశిస్తుంది.
శనివారం రాహుల్ గాంధీ విలేకరుల సమావేశంలో మాట్లాడుతూ..సమాజ్‌వాదీ పార్టీకి (ఎస్‌పి) జాతీయ ఫ్రేమ్‌వర్క్ లేదు. ఉత్తరప్రదేశ్‌లో ఎస్పీకి స్థానం ఉంది. దానిని వారు సమర్థించుకోవాలి. దాని కోసం అఖిలేష్ యాదవ్ భారత్ జోడో యాత్రకు రాకపోవచ్చు. అయితే కేరళ, కర్ణాటక, బీహార్‌లలో సమాజ్‌వాదీ పార్టీ ఆదర్శాలు పనిచేయవు. ప్రతిపక్షాలకు జాతీయ ఫ్రేమ్‌వర్క్ అందించడమే కాంగ్రెస్ పని. అని పేర్కొన్నారు.
రాహుల్ గాంధీ వ్యాఖ్యలపై అఖిలేష్ యాదవ్ స్పందిస్తూ.. తమ పార్టీ దృక్పథం జాతీయంగా ఉందని, జాతీయ ప్రయోజనాల కోసం బలమైన రాజకీయ జోక్యాలు చేస్తోందని అన్నారు. “దేశ సార్వభౌమాధికారం, ఐక్యత, సమగ్రతను చెక్కుచెదరకుండా ఉంచాలని ఇది ఎల్లప్పుడూ నిర్ణయించబడుతుంది. అందుకే సమాజ్‌వాదీ పార్టీ దేశ ప్రయోజనాలను దృష్టిలో ఉంచుకుని దేశంలో జరుగుతున్న పరిణామాలను నిశితంగా గమనిస్తూ బలమైన రాజకీయ జోక్యాలను చేస్తోందని ఆయన అన్నారు.
మాయావతి కృతజ్ఞతలు
బహుజన్ సమాజ్ పార్టీ (బీఎస్పీ) అధినేత్రి మాయావతి సోమవారం ఉత్తరప్రదేశ్‌లోకి ప్రవేశించే ముందు భారత్ జోడో యాత్రలో చేరాలని తనకు లేఖ రాసినందుకు కాంగ్రెస్ మాజీ అధ్యక్షుడు రాహుల్ గాంధీకి ధన్యవాదాలు తెలిపారు. 'భారత్ జోడో యాత్రకు శుభాకాంక్షలు, ఈ యాత్రలో పాల్గొనాలని రాహుల్ గాంధీ తరపున లేఖ రాసినందుకు ధన్యవాదాలు' అని మాయావతి సోమవారం ట్వీట్ చేశారు. బీఎస్పీ అధినేత ట్వీట్ ద్వారా కూడా దీనిపై ఎలాంటి సమాచారం ఇవ్వలేదు.
క్లిక్ చేసి ఏసియా నెట్ న్యూస్ తెలుగు వాట్సాప్ చానెల్·ను ఫాలో అవ్వండి
