25 ఏళ్ల పిజ్జా డెలివరీ బాయ్.. ఐదుగురు చిన్నారుల ప్రాణాలు కాపాడాడు. ఇప్పుడు దీనికి సంబంధించిన వీడియో ఇంటర్నెట్ ను షేక్ చేస్తుంది. ఆ డెలివరీ మ్యాన్ మీద ప్రశంసల జల్లుతో పాటు అతనికి డొనేషన్ ల వరద కూడా కొనసాగుతోంది.
ఇండియానా : యునైటెడ్ స్టేట్స్లోని ఇండియానాలో ఓ ఇల్లు హఠాత్తుగా తగలబడింది. ఈ ఇంట్లో 1, 6, 13, 18.. ఇంకో 13 యేళ్ల ఐదుగురు చిన్నారులు ఉన్నారు. ఇది గమనించిన ఓ పిజ్జా డెలివరీ బాయ్ అత్యంత సాహసోపేతంగా వ్యవహరించాడు. వీరిలో 1, 6, 13, 18..సంవత్సరాల పిల్లల్ని బైటికి తీసుకురాగలిగాడు. అయితే 6యేళ్ల మరో చిన్నారి ఇంట్లో నిద్రిస్తుందని తెలియడంతో.. ఎగిసిపడుతున్న మంటల్లోకి వీరోచితంగా దూకి.. ఆ చిన్నారిని ఎత్తుకుని బైటికి తీసుకువచ్చాడు.
దీనికోసం ఈ సాహసి తన ప్రాణాలనే ఫణంగా పెట్టాడు. లాఫాయెట్ పోలీస్ డిపార్ట్ మెంట్ దీనికి సంబంధించిన వీడియోను తమ ట్విట్టర్ ఖాతాలో షేర్ చేసింది. నికోలస్ బోస్టిక్ అనే వ్యక్తి ఓ ఇల్లు తగలబడడం గమనించి పోలీసులకు సమాచారం అందించాడు. అయితే వారు వచ్చేసరికి ఆలస్యం అవుతుందని గ్రహించి తానే రంగంలోకి దూకాడు. అతను వెంటనే తలుపులు పగలగొట్టి.. 18 ఏళ్ల యువకుడితో పాటు మరో నలుగురు చిన్నారులను సురక్షితంగా తీసుకురావడానికి ఇంట్లోకి వెళ్లాడు.
పాకిస్తాన్ లో దారుణం.. బురఖా వేసుకున్న మహిళను.. వెంటాడి, లైంగిక వేధింపులు..
ఈ సంఘటన జూలై 11న ఇండియానాలోని లఫాయెట్లో జరిగింది. ఒక పోలీసు అధికారి బాడీ కెమెరా ద్వారా సంగ్రహించిన ఫుటేజీలో బోస్టిక్ పిల్లవాడిని తీసుకుని కాలిపోతున్న ఇంట్లోనుంచి బయటకు వస్తున్నట్లుగా కనిపిస్తుంది. అతను ఆ చిన్నారిని చేతుల మీద మోసుకొచ్చి.. పోలీసులకు అప్పగించడం కనిపిస్తుంది. ఈ మేరకు పోలీసులు విడుదల చేసిన ప్రెస్ నోట్లో, బోస్టిక్ 1, 6, 13, 18 సంవత్సరాల వయస్సు గల నలుగురు తోబుట్టువులను ముందు రక్షించాడు. ఆ తరువాత ఇంట్లో నిద్రిస్తున్న మరో 6 ఏళ్ల చిన్నారిని రక్షించాడని పోలీసు శాఖ తెలియజేసింది.
25 ఏళ్ల యువకుడు కాలిపోతున్న ఇంట్లో చిక్కుకున్న చిన్నారులను బయటకు తీసుకురావడానికి మొదట.. వెనుక తలుపు వైపు పరిగెత్తాడు. ఆ తరువాత పైకి వెళ్లాడు. కానీ 6 ఏళ్ల చిన్నారి లోపలే ఉందని తెలిసినప్పుడు.. బోస్టిక్ మళ్లీ మంటల్లోకి వెళ్లాడు. దట్టమైన పొగ ఉన్నప్పటికీ, అతను ఆమెను కనుగొన్నాడు. ఆ తరువాత కిటీకీ ద్వారా చిన్నారితో సహా బైటికి దూకాడు. ఈ ఘటనలో బోస్టిక్ తీవ్రంగా గాయపడ్డాడని పోలీసు శాఖ తెలిపింది. ఈ క్రమంలో అతను దట్టమైన పొగ పీల్చడం వల్ల ఊపిరికి తీవ్ర ఇబ్బంది పడ్డాడు. అతని కుడి చేతికి కూడా గాయమయ్యింది. అతను ఇప్పుడు డిశ్చార్జ్ అయ్యాడు. మరోవైపు, 6 ఏళ్ల చిన్నారి "ఆశ్చర్యకరంగా ఎక్కువగా గాయపడలేదు" అని పోలీసులు తెలిపారు.
"నికోలస్ బోస్టిక్ వీరోచిత చర్య వల్ల ఐదు ప్రాణాలు కాపాడబడ్డాయి. ఈ సంఘటనలో అతని నిస్వార్థత స్ఫూర్తిదాయకం. అతను తన ధైర్యం, దృఢత్వం, అటువంటి ప్రమాదకరమైన పరిస్థితుల్లోనూ స్థిరమైన ప్రశాంతతతో అనేకమందిని ఆకట్టుకున్నాడు. లఫాయెట్ పోలీస్ డిపార్ట్మెంట్, లఫాయెట్ ఫైర్ డిపార్ట్మెంట్, మేయర్ టోనీ రోస్వార్స్కీ నికోలస్ జోక్యానికి ఎప్పటికీ రుణపడి ఉంటారు. అతని చర్యలకు అతన్ని బహిరంగంగా గుర్తించాలనుకుంటున్నారు" అని పత్రికా ప్రకటన విడుదల చేశారు. ఈ ట్వీట్ తరువాత అతనికి కావాల్సిన సాయం కోసం అతని పేరుమీద ఫండ్ రెయిజింగ్ కూడా మొదలయ్యింది.
